Ndiʼ nga ni ná ti libru ni caníʼ de ora rapa binni xiiñiʼ: «Qué zanda guchaaganu leche de lata né niidxi sti’ ti gunaa ni cugadxi». Ne galán ni para ti baʼduhuiiniʼ purtiʼ stubi stubi xcuerpu jñaabe maʼ zigudii laabe ni caquiiñebe.

 Guníʼ ique ndiʼ: Cada biaje gadxi baʼduhuiiniʼ ca ruchaa niidxi ca. Primeru redaneni stale proteína, vitamina, mineral ne nisa. Ne ora maʼ ziluxe baʼduhuiiniʼ ca de gadxi, rapa niidxi ca jma za para guidxá ndaanibe. Ne laaca ruchaa niidxi ca laga ziniisibe ne según temporada stiʼ iza.

 Laaca ruchaa niidxi ca según hora gadxi baʼduhuiiniʼ ca. Pa huaxhinni la? nápani stale hormona, casi melatonina, ni racané baʼduhuiiniʼ ca gasi’. Ne pa ridxi’ ni la? rapa ni xcaadxi hormona ni racané para gataná baʼduhuiiniʼ ca. Racané ca cambiu ri’ laabe para gánnabe pora nga naquiiñeʼ gatanabe ne pora gásibe.

 Ora casi gupa ti gunaa xiiñiʼ, ca primé dxi ca naguchi riree niidxi sti’ ne rábicabe ni calostro. Qué raca nagana para baʼduhuiiniʼ ca gueni ne nápani stale vitamina. Neca caadxi si guebe, peru guizá’ zacaneni laabe. Laaca napa calostro ca stale defensa, ni racané para cadi gaca huará ba’duhuiini’ ca. Ne laaca racané ni para gusiani ndaanibe.

 Cadi caquiiñe’ chuʼ gunaa ca xizaa pa zugaanda niidxi sti’, neca gapa cuachi. Purtiʼ stubi stubi niidxi ca ridale biaʼ caquiiñe’ baʼduhuiiniʼ ca.

 ¿Xi rábiluʼ yaʼ? Pur modo naca niidxi sti’ ti gunaa ne modo racaneni ti baʼduhuiiniʼ, ¿ñee rábitu beeda gaca ni pur evolución la? o guyuu tu bizáʼ ni?