Riníʼ xheelaluʼ o runi xiixa ni ruchiichi lii, ne lii rúniluʼ casi ora cadi cadxiichiluʼ. Peru ora gudii xheelaluʼ cuenta nuu xiixa ni cayácaluʼ la? ruzulú rinabadiidxaʼ lii stale cosa para ganna xi cayácaluʼ. Jma ridxiichiluʼ óraque. ¿Xi zanda gúniluʼ para guni controlarluʼ guendaridxiichi stiuʼ ora guizaaca xiixa zacá yaʼ?

•  Ni naquiiñeʼ gánnaluʼ

•  Ni zanda gúniluʼ

•   Raca huará binni ora nabé ridxiichi. Caadxi investigación rusihuinni xi rizaaca binni ora nabé ridxiichi: rapa presión alta, raca huará ladxidóʼ, rapa depresión ne problema de digestión. Laaca qué randa rasi binni ora ridxiichi, guizáʼ riuu xizaa, raca huará ladi ne rapa ataque cerebral. Nga runi ná Biblia: «Bisaana de guidxiichiluʼ ne bisaana de guidaaluʼ xiana; cadi guidxiichiluʼ dede gúniluʼ cosa malu» (Salmo 37:8).

•   Laaca raca huará binni ora rutopa xiana. Xiana ni rutopa binni ndaaniʼ ladxidóʼ zeeda gaca ni casi ti guendahuará ni runiná dentru de laa. Zándaca gueeda gácaluʼ ti binni ni runi cosa feu sin guituí lú o ti binni ni nabé runi criticar. Ne pa zacá lii la? zaca nagana para stobi cuezané lii ne zápaluʼ stale guendanagana lu xquendaxheelaluʼ.

•   Biiyaʼ ca cualidad galán napa xheelaluʼ. Bicaa chonna cualidad ni riuuláʼdxiluʼ de xheelaluʼ. Ora guidxiichiluʼ sti biaje pur xiixa ni gúnibe, bietenalaʼdxiʼ ca cualidad bicaaluʼ que. Nga zacané lii guni controlarluʼ xiana stiluʼ.

   Textu ni zanda gacané lii: «Laudii diuxquixe» (Colosenses 3:15).

•   Biziidiʼ guni perdonarluʼ. Primé, biyubi ximodo gúʼyaluʼ ca cosa ca casi modo ruuyaʼ xheelaluʼ ni. Ndiʼ zanda gacané lii chuʼluʼ lugar stibe, ne casi ná Biblia, guiéneluʼ sentimientu stiʼ xcaadxi (1 Pedro 3:8). De racá gunabadiidxaʼ laca lii: «¿Dxandíʼ nabé naná ni bíʼnibe naa ne pur nga qué zanda guneʼ perdonar laabe la?».

   Textu ni zanda gacané lii: «Galán gúnibe pa qué gulábibe ni gúnicabe laabe» (Proverbios 19:11).

•   Guca nachaʼhuiʼ ora guiniʼluʼ ni runi sentirluʼ ne biyubi modo gúniluʼ ni. Guzéʼtenu ti ejemplu, lugar de guiniʼluʼ «Aque malu lii nga ora qué riníʼneluʼ naa para gábiluʼ naa paraa nuuluʼ», galán guiniʼluʼ «Racaʼ preocupar ora guuyaʼ maʼ huadxí ne qué gannaʼ pa bizaacaluʼ xiixa». Pa qué gácaluʼ naduxhuʼ ora guiniʼluʼ la? zacané ni lii guni controlarluʼ xiana stiuʼ.

   Textu ni zanda gacané lii: «Lagüíʼ diidxa jneza, ni guiaba binni» (Colosenses 4:6).

•   Bicaadiaga chaahuiʼ. Despué de guiniʼluʼ, bidii lugar guicabi xheelaluʼ ne cadi gucueezaluʼ laabe. Ora maʼ bilúxebe, biʼniʼ repetir caadxi de cani gúdxibe lii para gúʼyaluʼ pa biene chaahuiluʼ laabe. Né gucaadiágasiluʼ laabe zacané ni lii guni controlarluʼ xiana stiluʼ.

   Textu ni zanda gacané lii: «Naquiiñeʼ chuʼtu listu para gucaadiágatu, cadi casi zetu gundaa ruaatu xiixa diidxaʼ» (Santiago 1:19, TNM).