Guiníʼ íquenu profeta Elías, caxubináʼ guicharuaa laga caníʼ ique. Cumu casi gúnnabe maʼ gutiʼ rey Acab la? zándaca caníʼ íquebe guiráʼ biaje bicaalú rey malu riʼ laabe. ¡Guizáʼ maʼ biʼniʼ huantar Elías! Stale biaje, Acab ne xheelaʼ, reina Jezabel, guzanándacaʼ ne bichíbicaʼ laabe, dede gucaláʼdxicaʼ ñuuticaʼ laabe. Ne rey Acab qué ñuni gastiʼ pur nucueeza Jezabel de ñuni mandar ñati ca profeta stiʼ Jehová. Cumu guiropaʼ binni riʼ ruyúbicaʼ puru para laasicaʼ la? biyúbicaʼ tu guuti Nabot, ti hombre nachaʼhuiʼ ne qué nuzaabiʼ gastiʼ, né ca xiiñiʼ. Pur ngue, bidii Elías laabe ti mensaje de juiciu stiʼ Jehová ne descendencia stibe. Yanna, maʼ guca cani guníʼ Dios. Maʼ gutiʼ Acab casi maca bizeeteʼ Jehová (1 Reyes 18:4; 21:​1-​26; 22:37, 38; 2 Reyes 9:​26).

 Peru nanna Elías caquiiñeruʼ guni huantar. Nabániruʼ Jezabel ne guiráʼ ni rúnibe cayuninaruʼ ni familia stiʼ Elías ne guidxi que. Zadxaagaluruʼ Elías xcaadxi guendanagana ne nuuruʼ stale ni gusiidibe Eliseo, compañeru stibe ne ni chichuu xlugarbe. Yanna, guininu de ca últimu guionnaʼ dxiiñaʼ biʼniʼ Elías. Ra guidúʼyanu modo gucané fe stibe laabe guni huantarbe, guiníʼ íquenu ximodo zanda guquídxinu fe stinu lu ca últimu dxi nabáninu riʼ.

 Xiiñiʼ Acab ne Jezabel nga Ocozías, ne laabe nga rey cubi stiʼ Israel. Lugar de niziidibe de ca error stiʼ bixhózebe ne jñaabe la? laaca bíʼnibe ca cosa malu ni bíʼnicaʼ (1 Reyes 22:52). Laaca runi adorar Ocozías Baal. Religión ra biʼniʼ adorárcabe Baal biʼniʼ promovércabe gaca prostituir binni ndaaniʼ yuʼduʼ que, ne dede guzaaquicaʼ xcuidi para sacrificiu. ¿Ñee ziuu xiixa ni gucaa Ocozías guchaa la? ¿Ñee zacanebe guidxi que gusaana conducta feu napa que ne gácacaʼ leal Jehová la?

 Málasi bizaaca rey malu riʼ ti desgracia. Biábabe lade ca reja ni napa ruaa cuartu stibe ne gucanabe stale. Neca zaqué, qué lica nuyúbibe ñacané Jehová laabe. Lugar de ngue, biseendabe caadxi mensajeru Eqrón, xquidxi ca filisteu, para guinabadiidxacaʼ dios Baal-zebub pa ziándabe. Ni bíʼnibe riʼ, guizáʼ bichiichini Jehová. Ngue runi biseendaʼ Jehová ti ángel ra nuu Elías para chiguidxaagalú ca mensajeru que. Ne bidii profeta que ti mensaje guizáʼ naná para rey que. Guizáʼ naroʼbaʼ pecadu biʼniʼ Ocozías, purtiʼ pur ni bíʼnibe que bisihuínnibe casi ora gastiʼ Dios ndaaniʼ guidxi Israel. Ngue runi Jehová guníʼ qué ziásabe lu cama stibe dede ora gátibe (2 Reyes 1:2-4).

 Qué lica nusihuinni Ocozías nuu arrepentidu, ne naduxhuʼ gunabadiidxabe ca mensajeru que: «¿Ximodo rihuinni hombre ni bidxaagalú laatu ne gudxi laatu ca diidxaʼ ca yaʼ?». Para gúdxicabe laa nabé sencíu modo racu profeta que lari, óraque nagueendaca guníʼ Ocozías: «Elías nga» (2 Reyes 1:7, 8). Risácapeʼ nga guininu nabé sencíu modo bibani profeta que, purtiʼ puru xhiiñaʼ Dios biʼniʼ, ngue runi qué ñaca nagana ñunibiáʼcabe laabe pur modo gúcube lari. Peru Ocozías qué ñaca zacá, purtiʼ laa puru si bidxiichi gucuá ique, cásica bixhoze ne jñaa. Ejemplu stiʼ Elías rusietenalaʼdxiʼ laanu caquiiñeʼ chinándanu conseju stiʼ Jesús, gaca guielunu sencíu, nga riníʼ, cadi guibaninenu stale cosa risaca (Mateo 6:22-24).

 Gucalaʼdxiʼ Ocozías nuquixe ni Elías, ngue runi biseendaʼ ti grupu de 50 soldadu ne xaíque stiʼ para guinaazecaʼ laabe. Ora bidxélacabe Elías «zuba ique dani», a xaíque stiʼ ca soldadu que gudxi laabe guiétebe purtiʼ ngue nga ná rey que, zándaca para guuti laabe. ¡Guníʼ ique si! Neca nanna ca soldadu que Elías nga «hombre biseenda Dios», guníʼ íquecaʼ jneza nga guchíbicaʼ laabe. ¡Peru cadi zaqué ni! Purtiʼ Elías gudxi xaíque stiʼ ca soldadu que: «Pa dxandíʼ Dios biseendaʼ naa la? guiaba guí de guibáʼ ne gunduuxeni lii ne cincuenta hombre stiluʼ». Oraqueca biʼniʼ Dios ni gunábabe que. Biaba «guí de guibáʼ» ne binduuxeni guirácabe (2 Reyes 1:9, 10). Modo gutiʼ ca soldadu que rusietenaláʼdxini laanu rusabanáʼ Jehová cani runi menu ne qué runi respetar ca xpínnibe (1 Crónicas 16:21, 22).

 Despué, biseendaʼ Ocozías sti xaíque ne 50 soldadu. Guiropa xaíque riʼ jma qué iquiiñeʼ que primé que. Nécaxa cayuuyabe reeche ca dé stiʼ 51 soldadu ni gutiʼ lu dani que, peru qué ñénebe. Ngue runi, gúdxibe Elías laaca ni gudxi primé xaíque que laa, peru cadi ngasi, sínuque gúdxibe laa guiete nagueendaca. ¡Guizáʼ nahuátibe! Purtiʼ laaca gúticabe cásica gutiʼ primé grupu que. Peru ni jma nahuati nga rey que. Neca zaqué biseendabe sti grupu de soldadu. Peru guionna xaíque que biluíʼ jma nuu xpiaaniʼ. Nabé humilde guca hombre que purtiʼ bidxíñabe Elías ne gunábabe laa gusisaca xquendanabánicabe. Cumu Elías xpinni Dios laa la? bisihuínnibe riabe binni casi modo runi Jehová, pur modo bicábibe hombre que. Óraque gudxi ángel stiʼ Jehová Elías chiné ca soldadu que. Para biree Elías zeʼ ne gúdxibe laacaʼ ca diidxaʼ ni maca guníʼ Jehová zazaaca rey que. Gúcani cásipeʼ modo guníʼ Jehová, ne gutiʼ Ocozías. Chupa iza si biʼniʼ mandarbe (2 Reyes 1:11-17).

 ¿Ximodo biʼniʼ huantar Elías ca binni rebelde ne tercu ni nuube lade que yaʼ? ¿Cadi dxandíʼ risaca pregunta ca tiempu riʼ la? ¿Huayuu biaje huayuni sentirluʼ triste ora tuuxa ni nadxiiluʼ qué náʼ chinanda ca conseju ne racalaʼdxiʼ guni ni cadi jneza la? ¿Ximodo zanda guni huantar binni xiixa casi nga yaʼ? Zanda gánnanu stale de laani pur lugar bidxelaʼ ca soldadu que Elías «ique dani». Qué gánnanu xiñee zúbabe raqué, peru nánnanu naca Elías ti hombre ni nabé runi orar. Zándaca purtiʼ stúbibe nuube lugar que ne zaqué jma zadxíñabe gaxha de Dios ni nadxiibe (Santiago 5:16-18). Laanu laca zanda guyúbinu oportunidad para chuʼnu stúbinu ne guinínenu Dios ra iquiiñenu lá, gábinu laabe ca guendanagana nápanu ne cani riguu xizaa laanu. Pa gúninu ni, zanda guni huantarnu ca binni malu ne rebelde nuu gaxha de laanu.

 Yanna maʼ bedandá ora guni nombrar Elías ni chiguiaana xlugar. Guidúʼyanu xi chiguizaaca. Ziree Elías ne Eliseo de Guilgal ne Elías gudxi Eliseo guiaana raqué, purtiʼ laasi nuu cheʼ Betel. Riaanani biaʼ 11 kilómetru de Guilgal. Peru Eliseo ná: «Cásipeʼ nabani Jehová ne nabániluʼ, naa qué zusaanaʼ lii». Guirópacabe yendácabe Betel ne raqué gudxi Elías Eliseo laasi cheʼ Jericó, ti guidxi ni nuu biaʼ 22 kilómetru de raqué. Ne ngueca bicabi Eliseo laabe. Yanna maʼ nuucabe Jericó, chiguzulúcabe biaje neza guiiguʼ Jordán ni riaana biaʼ 8 Kilómetru. Sti biaje guca Eliseo firme. ¡Qué nádibe gusaanabe Elías! Ne ndiʼ maʼ chonna biaje bizaaca ni zaqué (2 Reyes 2:1-6).

 Cusihuinni Eliseo guendarannaxhii, ti cualidad nabé risaca. Zaqueca nga modo gunnaxhii Rut Noemí, rihuinni ni ora qué rixálenu de tuuxa ne qué rinanu gusaananu laa (Rut 1:15, 16). Yánnapeʼ nga jma caquiiñeʼ gapa ca xpinni Dios cualidad riʼ. ¿Ñee rusisácanu ni casi biʼniʼ Eliseo la?

 Zándaca biecheʼ Elías ora biʼyaʼ pabiáʼ nadxii xcompañeru huiinibe laabe. Cumu bisihuinni Eliseo cualidad riʼ la? gúpabe privilegiu de gúʼyabe últimu milagru stiʼ Elías. Ruaa guiiguʼ Jordán, ti guiiguʼ ni napa corriente nadipaʼ ne napa ra ziáʼ, raqué nga gudxibi Elías xhaba ne ¡bixeleʼ guiiguʼ que! Ne laaca biiyaʼ 50 hombre xiiñiʼ ca profeta que milagru riʼ. Ca hombre riʼ nuucaʼ lade ti grupu ni zeʼ dxi zidale para guicaacaʼ capacitación ti ganda gusiidicaʼ modo guni adorárcabe Dios jneza ndaaniʼ guidxi que (2 Reyes 2:7, 8). Zándaca Elías nga cayuuyaʼ gaca capacitar ca hombre que. Caadxi iza ante, guníʼ ique Elías maʼ laasi cayuni ni ná Dios. Dede dxi que, Jehová caguu ndaayaʼ Elías pur biʼniʼ huantar ra bidiibe lugar guʼyaʼ Elías modo cadale ca xpínnibe ni cayuni ni nabe (1 Reyes 19:10).

 Despué de gudíʼdicabe guiiguʼ Jordán que, gudxi Elías Eliseo: «Guníʼ xi racaláʼdxiluʼ guneʼ pur lii ante gusaanaʼ lii». Maʼ nanna Elías maʼ cheʼ. Qué ñápabe envidia xcompañérube ne qué nidxiichibe pur ca privilegiu chiguicaa ne purtiʼ zusisácacabe laa, sínuque racaláʼdxibe gacanebe laa luni caquiiñeʼ. Ti cosa si gunabaʼ Eliseo laabe, ne ná: «Canabaʼ guicaaʼ chupa ndaa espíritu stiluʼ» (2 Reyes 2:9). Qué riníʼdini racaláʼdxibe guicaabe doble de espíritu santu ni gucuaa Elías. Ni canábabe nga ti herencia casi ni ricaa ca baʼduʼ lugola de dxiqué casi ná ley que, pur ca responsabilidad ni naquiiñeʼ guni cumplircaʼ casi xaíque ndaaniʼ ti familia (Deuteronomio 21:17). Yanna, cumu laabe nga chiguiaanabe xlugar Elías la? nánnabe naquiiñeʼ gácabe nadxibalú casi profeta que para guni cumplirbe dxiiñaʼ ni gucuaabe.

 Cumu guca Elías humilde la? gulézabe guicabi Jehová Eliseo. Ne gúdxibe Eliseo pa gudii Jehová lugar guʼyaʼ ora chiné laabe la? zacaabe ni gunábabe que. Ne laga zizácabe, ziyuíʼcabe diidxaʼ, bizaaca xiixa ni bidxagayaacabe (2 Reyes 2:10, 11).

 Málasi bihuinni ti biaaniʼ guibáʼ ni zeeda guidxiña laacabe. Binadiágacabe ti ruidu nadipaʼ casi ti bi yooxhoʼ ora maʼ zeeda guidxiña ti tormenta. Xiixa ni ruzaaniʼ gudiʼdiʼ nadipaʼ cueʼ guirópacabe ne bicaani laacabe guixélecabe. Nabé bidxagayaacabe. Ni biiyacabe nga ti carru ni cuzaaniʼ casi ñaca bele. Elías maʼ nanna maʼ bedandá ora cheʼ. ¿Zaguíʼbabe carru que la? Qué riete diʼ ni lu Biblia. Málasi bizulú biasa Elías lu bi chaʼhuiʼ chaʼhuiʼ ziguíʼbabe jma guiáʼ dede ra beeda ti bi nadipaʼ ziné laabe.

 Nabé bidxagayaa Eliseo pur ni guca riʼ. Ra biiyabe ngue, gúnnabe zudii Jehová laabe chupa ndaa de espíritu stiʼ Elías para gácabe nadxibalú. Peru cadi nuube para guiníʼ íquebe ngue purtiʼ guizáʼ triste nuube. Qué gánnabe paraa zeʼ xhamígube ne pa ziuuruʼ dxi gúʼyabe laa. Bicaa Eliseo ridxi ne ná: «¡Bixhozeʼ huiineʼ, bixhozeʼ huiineʼ, ca carru de guerra stiʼ Israel ne ca hombre ni dxiʼbaʼ maniʼ sticaʼ!». Biiyaʼ Eliseo modo ziniti maestru ni gunnaxhii que ne maʼ qué nihuinni; óraque gucheza xhaba purtiʼ nuu triste (2 Reyes 2:12).

 Laga ziyasa Elías lu bi, ¿ñee binadiágabe cucaa ridxi xhamígube laabe la? ¿Ñee biinabe la? Modo tisi, zándaca nánnabe ora gapa binni ti amigu casi Eliseo la? zacané ni laa guni huantar ora tidiʼ lu guendanagana. Galán chinándanu ejemplu stiʼ Elías guyúbinu guidxaaganu binni ni nadxii Jehová ne ni riuulaʼdxiʼ guni ni nabe.

 ¿Paraa guyé Elías? Nuu religión rusiidiʼ zebe guibáʼ ra nuu Dios. Peru cadi zacá ni. Caadxi iza despué, Jesucristu guníʼ guirutiʼ huaguiibaʼ guibáʼ ante de laabe (Juan 3:13). Nga runi, ora riníʼ Biblia «zeʼ Elías guibáʼ lu ti bi yooxhoʼ», ¿xii nga nuuni gusiéneni yaʼ? (2 Reyes 2:11). Ora rieeteʼ diidxaʼ «guibáʼ» lu Biblia, cadi cuzeeteni ti lugar ra nabeza Jehová, sínuque ra nuu ca zá ne ra ripapa ca pájaru ca (Salmo 147:8). Lade ca zá ca nga gudxiibaʼ Elías. ¿Xi guca despué yaʼ?

 Bitiidiʼ si Jehová profeta ni jma nadxii riʼ ndaaniʼ guidxi Judá, para guni cumplir né dxiiñaʼ ni gucuaa. Relatu ni zeeda lu Biblia rusihuinni, zándaca biaanarube raqué despué de gadxe iza. Ca dxi que, Jehoram nga rey stiʼ Judá, ti rey nabé malu. Xheelabe nga xiiñiʼ Acab ne Jezabel, pur ngue rihuínniruʼ guendaquéiquiiñeʼ stiʼ guendaxheelaʼ que. Gudxi Jehová Elías gucaa ti carta para guiníʼ maʼ chigati Jehoram. Ne casi maca bieeteʼ que guizáʼ feu modo gútibe. Ne ni jma feu nga ná relatu que guirutiʼ ñuu triste ora gútibe (2 Crónicas 21:12-20).

 ¡Maʼ gadxé guca Elías de Jehoram, rey malu que! Qué gánnanu ximodo ne padxí gutiʼ Elías, peru nánnanu qué ñátibe casi gutiʼ Jehoram. Ora gutiʼ Elías, stale binni guyuu triste. Nabé triste guyuu Eliseo purtiʼ biniti xhamigu. Ne zándaca xcaadxi profeta que laaca zaqueca biʼniʼ sentircaʼ. Gudiʼdiʼ ti mil iza despué, bisihuinni Jehová rusisácaruʼ Elías, purtiʼ dxi bidxaa modo bihuinni Jesús lu dani que la? laaca bihuinni Elías ládecabe lu ti visión (Mateo 17:1-9). ¿Ñuuláʼdxiluʼ ñácaluʼ casi Elías, ñápaluʼ fe ni ñacané lii ñuni huantarluʼ ca guendanagana stiluʼ la? Pa zacá ni, cadi guiaandaʼ lii guyúbiluʼ xhamíguluʼ ni gannaxhii Dios, quixhe ique guni xhiiñaʼ Jehová ne guni orar gatigá de guidubi ladxidóʼ. Pa gúniluʼ ni, zadxélaluʼ ti lugar ndaaniʼ ladxidóʼ Jehová ne qué zareeluʼ de ndaaniʼ ladxidoʼbe.