Cayuuyadxí María Magdalena guibáʼ laga cuchaa nisa cayete lú. Cá Señor ni guizáʼ nadxiibe lu ti yaga, nuucabe primavera, biaʼ galaa dxi, málasi biteeguʼ ti guelacahui guidubi región que (Lucas 23:44, 45). Para gucuaa María ti lari gudixhe lu xiqueʼ ne gudiidxi ca gunaa ni nuu gaxha de laa. Bindaa guelacahui que biaʼ chonna hora, ngue runi cadi ti eclipse diʼ ni purtiʼ ti eclipse rindaa chupa chonna si minutu. Zándaca binadiaga María ne ca binni ni nuu gaxha de Jesús ruidu stiʼ ca maniʼ huiiniʼ ni ribidxiaa huaxhinni. Caadxi de ca ni cayuuyaʼ ni cazaaca que guizáʼ bidxíbicaʼ ne guniʼcaʼ: «Dxandíʼ peʼ Xiiñiʼ Dios laabe» (Mateo 27:54). Zándaca guníʼ ique ca discípulo stiʼ Jesús ne xcaadxi binni zaqué nga cusihuinni Jehová nuu triste ne cadxiichi purtiʼ biiticabe Xiiñiʼ.

 Guizáʼ cayuubaʼ ladxidóʼ María Magdalena pur guiráʼ ni cazaaca que, peru nuube guiaanabe lugar ra cá Jesús (Juan 19:25, 26). Qué zanda guininu pabiáʼ cayacaná Jesús ne caquiiñeʼ jñaabe chuʼ tu quixhedxí ladxidóʼ.

 Guizáʼ gucané Jesús María Magdalena, ne yanna racalaʼdxiʼ gunaa riʼ guni xiixa pur laabe. Guyuu ti tiempu biʼniʼ binni menu María ne guluuni laa triste, peru gucané Jesús laabe. Yanna maʼ runi respetar binni María, maʼ nuu nayecheʼ sti biaje ne napa ti fe naguidxi. ¿Xi gucané laabe para gúpabe fe ca yaʼ? ¿Xi zanda guizíʼdinu de ejemplu stiʼ María yaʼ?

 Guizáʼ gucaná María Magdalena purtiʼ guyuu caadxi demonio nabé malu lu cuerpu stiʼ, peru lu Biblia riete gucané Jesús laabe ne gulee ca demonio malu que lu xcuérpube. Nabé bininá ca demonio binni tiempu bibani Jesús, purtiʼ riuucaʼ lu xcuerpu binni ne runi controlarcaʼ laacabe. Qué gánnanu xi peʼ bíʼnicabe María, peru ni nánnanu nga gulee Jesús gadxe demonio lu cuerpu stibe (Lucas 8:2).

 Yanna huaxa maʼ nayecheʼ nuu María. Peru ¿ximodo zanda gusihuínnibe cudiibe xquixe peʼ Jesús yaʼ? Gúcabe tobi de ca xpinni Jesús ne bíʼnibe xiixa pur laa. Qué gapa Jesús ne ca apóstol ni gocaʼ, lari ni gácucaʼ ne ti lugar ra gásicaʼ. Huaxiéʼ bueltu gúpacabe ne cadi cayúnicabe dxiiñaʼ. Caquiiñecabe tuuxa ni gacané laacabe né ca gastu stícabe para ganda guni predicárcabe ne gusiidicabe.

 Gucané María ne xcaadxi gunaa Jesús ne ca apóstol stiʼ. Zándaca caadxi de ca gunaa que gúpacaʼ bueltu purtiʼ nánnanu bidiicaʼ de ni nápacaʼ para guni tendercaʼ laacabe (Lucas 8:1, 3). Qué riete diʼ lu Biblia pa laacabe bíʼnicabe guendaró, gudiibicabe lari o biyúbicabe ti lugar ra guiaana Jesús ne ca apóstol stiʼ. Peru ni nánnanu nga gucané ca gunaa riʼ biaʼ gande binni de guidubi ladxidoʼcaʼ. Pur ni biʼniʼ ca gunaa riʼ gunda biʼniʼ predicar Jesús ne ca apóstol stiʼ jma stale binni. Nanna María qué zanda quixe ni biʼniʼ Jesús pur laa, neca zacá gucané biaʼ gúndatiʼ ne nánnanu guizáʼ nayecheʼ guyuube.

 Tiempu riʼ, nabé runi binni menu ca binni ni racané xcaadxi. Peru cadi zacá diʼ ruuyaʼ Dios laacabe. Nga runi, guiníʼ íquenu pabiáʼ biecheʼ Jehová ora biʼyaʼ cayacané María Jesús ne ca apóstol stiʼ. Cásica María, stale xpinni Cristu tiempu riʼ racanecaʼ xcaadxi. Pa gúninu xiixa favor binni o gábinu laa xiixa diidxaʼ ni cuʼ gana laa, guizáʼ zusiéchenu ladxidóʼ Jehová (Proverbios 19:17; Hebreos 13:16).

 Dxi zeʼ Jesús Jerusalén para guni celebrar Pascua lu iza 33, laaca zeʼ María Magdalena lade ca gunaa ni zinanda Jesús (Mateo 27:55, 56). Nanna dxíchinu guizáʼ bidxagayaabe ora gúnnabe gunaazecabe ne biʼniʼ juzgárcabe Jesús. Laaca bidxagayaabe ora gúnnabe biʼniʼ gobernador Poncio Pilato ni ná ca xaíque yuʼduʼ ne ni ná binni, ne biʼniʼ mandar gucaacabe Jesús lu ti yaga. Zándaca biiyaʼ María Maestru stiʼ naze rini, maʼ bidxaga ne nuáʼ ti yaga ra chigucaacabe laa (Juan 19:6, 12, 15-17).

 Biaʼ galaa dxi, lu guelacahui que, nuu María Magdalena ne xcaadxi gunaa «cueʼ yaga ra cá Jesús» (Juan 19:25). Biaana María raqué ne biiyabe ora canabaʼ Jesús Juan gapa jñaa. Laaca binadiágabe ora bicaa Jesús ridxi Bixhoze ne ora guníʼ ante gatiʼ: «¡Maʼ guca cumplir ni!». Guizáʼ gucadé ladxidóʼ María Magdalena, peru neca maʼ guti Jesús, biaanarube gaxha de ra baʼ ra guluu José de Arimatea cuerpu stiʼ Jesús (Juan 19:30; Mateo 27:45, 46, 57-61).

 Laaca rusietenalaʼdxiʼ ejemplu stiʼ María laanu zanda gacanenu ca hermanu stinu ni cadíʼdicaʼ lu xiixa guendanagana. Neca qué zanda gúninu xiixa para cadi gacanácabe, peru zanda gácanu nadxibalú ne guianu laacabe. Ora cadídinu lu xiixa guendanagana, guizáʼ galán gápanu ti xhamígunu ni gacané laanu. Pa chuʼnu gaxha de ca xhamígunu ora caquiiñecaʼ laanu, zaguixhedxí nga ladxidóʼcabe ne laaca zusihuínninu nadxiinu laacabe ne nadxiinu Jehová (Proverbios 17:17).

 Guluusícabe Jesús ndaaniʼ baʼ que, María nga tobi de ca gunaa ni guzíʼ «guixi rindáʼ naxhi para cuʼcaʼ cuerpu stiʼ Jesús» (Marcos 16:1, 2; Lucas 23:54-56). Biluxe si sábadu que, siadóʼ guieʼruʼ zeʼ María ne xcaadxi gunaa ra baʼ ra gudíxhecabe Jesús ne zándaca ziníʼ íquecabe xi gúnicabe para guniibicabe guié ni nuchii baʼ que (Mateo 28:1; Marcos 16:1-3). Peru gastiʼ qué nucueeza ca gunaa riʼ, bíʼnicabe guiráʼ ni nuu lu nácabe ne bisaanacabe xcaadxi cosa que lu náʼ Jehová.

 Zándaca María nga primé ni yendá ra baʼ que. Peru ora yendabe raqué guizáʼ bidxagayaabe purtiʼ maʼ guleecabe guié ni nuseeguʼ ruaaʼ ni ne guirutiʼ nuu ndaaniʼ ni. Ne oraqueca bireebe ziguxooñebe ne zebe ra nu Pedro ne Juan ne gúdxibe laacaʼ ni bíʼyabe, zanda guxuíʼlunu cayabi María laacabe: «¡Maʼ guleecabe Señor ndaaniʼ baʼ que, ne qué gánnadu paraa gudíxhecabe laabe!». Para biree Pedro ne Juan zecaʼ ra baʼ que, biiyacaʼ guirutiʼ nuu ndaaniʼ ni ne biguétacaʼ ra lídxicaʼ (Juan 20:1-10). a

 Para biguetaʼ María ra baʼ que, zuhuaa stubi ne cayuunaʼ. Ne laga cayuunabe gutagudaabe para gúʼyabe ndaaniʼ baʼ que. ¡Qué guirá guni crebe zinécabe Jesús! Ne óraque biiyabe zuba chupa ángel ndaaniʼ baʼ que, nácucaʼ lari blancu ne guizáʼ bidxagayaabe. Gunabadiidxaʼ ca ángel que laabe: «¿Xiñee cayuunaluʼ pue?». Para gúdxibe laacaʼ ni maca gúdxibe ca apóstol que: «Purtiʼ zinécabe Señor stinneʼ ne qué gannaʼ paraa gudíxhecabe laa» (Juan 20:11-13).

 Guníʼ si María ca diidxaʼ ca, bidxiguetalú ne biiyaʼ zuhuaa ti hombre atrá de laa. Guníʼ íquebe jardineru que ni. Gunabadiidxaʼ hombre que laabe: «Gunaa, ¿xiñee cayuunaluʼ pue? ¿Tu cuyúbiluʼ?». Para bicábibe: «Señor, pa lii yeneluʼ laabe, gudxi naa paraa gudíxheluʼ laabe ti chicaaʼ laabe» (Juan 20:14, 15). Peru ¿ñee zanda xa guindani María laasi ti cuerpu naroʼbaʼ ne nadipaʼ casi Jesús? Qué lica niníʼ ique María nga purtiʼ napa gana gacané.

 Ora guni sentirnu maʼ qué gápanu stipa para guni huantarnu ca guendanagana ni nápanu, zanda chinándanu ejemplu stiʼ María Magdalena. Pa puru si guiníʼ íquenu ca guendanagana ni nápanu la? zadxíbinu ne maʼ qué zanda gúninu gastiʼ. Peru pa gúninu guiráʼ ni nuu lu nanu ne gusaananu ca xcaadxi cosa ca lu náʼ Jehová, zabeendunu stale cosa galán (2 Corintios 12:10; Filipenses 4:13). Ni jma risaca nga zusiéchenu ladxidóʼ Jehová. Ne nga peʼ nga ni biʼniʼ María, ne nabé galán modo guluu Dios ndaayaʼ laabe.

 Cadi jardineru que nga caniʼné María, sínuque caníʼnebe Jesús, Señor ni nabé nadxiibe. Peru qué ñunibiáʼ diʼ María Jesús ne zeʼ. Cadi cayene diʼ María ni cazaaca que, maʼ biasa Jesús de lade gueʼtuʼ casi ti espíritu nadipaʼ. Biquiiñeʼ Jesús poder stiʼ para bihuinni nezalú María né gadxé cuerpu. Despué de biasa Jesús de lade gueʼtuʼ, stale tu laa qué ñunibiáʼ laabe, dede nin ca ni maca runibiáʼ laabe (Lucas 24:23-26; Juan 21:4).

 ¿Xi biʼniʼ Jesús para gunibiáʼ María laa yaʼ? Jesús guníʼ: «¡María!». Nagueendaca bidxiguetalú María ne guníʼ: «¡Rabbóni!». Zándaca biquiiñeʼ María diidxaʼ riʼ stale biaje para guniʼné Jesús. ¡Nánnanu guizáʼ biecheʼ María! Ngue runi gunaazebe Jesús ne qué nabe gundaabe laa (Juan 20:16).

 Óraque né diidxaʼ nadóʼ gudxi Jesús laabe: «Bindaa naa». Ne para quixhedxí ladxidoʼbe gudxi laabe: «Caʼruʼ quibaʼ ra nuu Bixhozeʼ». Caʼruʼ guedandá hora guibiguetaʼ Jesús guibáʼ. Nuuruʼ xcaadxi cosa ni chigúnibe lu Guidxilayú ne racaláʼdxibe gacané María laabe, ne ngaca nuu María guni. Para gudxi Jesús laabe: «Guyé ra nuu ca bicheʼ ne gudxi laacaʼ: “Chichibaʼ ra nuu Bixhozeʼ ne Bixhózetu, ra nuu Dios stinneʼ ne Dios stitu”» (Juan 20:17).

 ¡Guizáʼ risaca dxiiñaʼ bidii Jesús gunaa riʼ! ¡Gúcabe tobi de ca primé discípulo ni biʼyaʼ Jesús despué de biasa de lade gueʼtuʼ! Yanna huaxa maʼ zanda guiníʼnebe xcaadxi de noticia galán que. Guxuíʼlunu pabiáʼ nayecheʼ nuube ora gúdxibe ca discípulo: «¡Maʼ biiyaʼ Señor!». Nanna dxíchinu qué ñaandaʼ ca apóstol que ca diidxaʼ ni gudxi María laacaʼ purtiʼ nabé nayecheʼ nuu María ora guyuiʼné laacaʼ ni gudxi Jesús laa (Juan 20:18). Laaca ni guníʼ María nga ni guníʼ xcaadxi gunaa ni guyé ra baʼ stiʼ Jesús (Lucas 24:1-3, 10).

 ¿Xi biʼniʼ ca apóstol que óraque yaʼ? Biblia ná «para laacaʼ ruluíʼ guendahuati si ngue ni caníʼ ca gunaa que ne qué ñuni crecaʼ» (Lucas 24:11). Neca nachaʼhuiʼ ca hombre riʼ, peru pur modo biniisicaʼ guca nagana para laacaʼ ñápacaʼ confianza gunaa. Ne costumbre stiʼ ca rabinu ná qué zanda diʼ gaca ti gunaa testigu nezalú ti juez. Ne pur ngue, zándaca jma yenanda ca apóstol costumbre sticaʼ. Peru Jesús ne Jehová cadi zacá diʼ laacaʼ purtiʼ qué rúnicaʼ menu guirutiʼ. ¡Nabé sicarú privilegiu bidiicabe gunaa riʼ!

 Qué nidxiichi diʼ María purtiʼ qué ñuni cré ca apóstol que laa, sínuque guyuube nayecheʼ purtiʼ nánnabe runi cré Jesús laabe. Ne tiempu riʼ, laaca maʼ gucuaa ca xpinni Jesús ti dxiiñaʼ ne laani nga guni predicarcaʼ «ca noticia galán stiʼ Reinu» (Lucas 8:1). Maca gudxi Jesús ca xpinni cadi guiráʼ diʼ binni zusisaca dxiiñaʼ ni gúnicaʼ ne qué zuni crecaʼ laacabe (Juan 15:20, 21). Nga runi, galán chinándanu ejemplu stiʼ María Magdalena purtiʼ neca qué ñuni cré ca apóstol que laa, guyuu nayecheʼ ne qué nucueezaʼ ni laa de niníʼ maʼ biasa Jesús de lade gueʼtuʼ.

 Qué nindaa bihuinni Jesús nezalú ca apóstol ne ca discípulo stiʼ ne despué bihuínnibe nezalú jma de 500 hermanu (1 Corintios 15:3-8). Ne jmaruʼ si naguidxi guca fe stiʼ María Magdalena ora gudxi xcaadxi binni laa bihuinni Jesús nezalucaʼ ne laaca biguidxi fe stibe ora bíʼyabe Jesús. Ne zándaca laabe nga tobi de ca gunaa ni guyuu lu reunión ni guca Jerusalén lu Pentecostés, dxi biaba espíritu santu luguiáʼ ca xpinni Jesús (Hechos 1:14, 15; 2:1-4).

 Nanna dxíchinu guizáʼ naguidxi guca fe stiʼ María Magdalena. Quixhe íquenu chinándanu ejemplu stibe. Gápanu fe ne gusisácanu guiráʼ ni maʼ biʼniʼ Jesús pur laanu. Zanda gácanu casi María Magdalena pa gacanenu xcaadxi binni ne gápanu confianza qué ziuu dxi gusaana de gacané Jehová laanu.