Coʼ, planeta stinu riʼ qué ziuu dxi guinitilú ni, guicaguí ni o chuʼ stobi xlugar ni. Biblia rusiidiʼ bizáʼ Dios Guidxilayú para cueza binni luni ne qué ziuu dxi gusaana de guibánicaʼ lu ni.

•   «Cani runi jneza zudii Dios laacaʼ guidxilayú, ne qué ziuu dxi gusaana de guibánicaʼ lu ni» (Salmo 37:29).

•   «Guluube guidxilayú riʼ ra naquiiñeʼ guiaana ni; qué ziuu dxi guiniibi ni de ra nuuni» (Salmo 104:5).

•   «Peru guidxilayú riʼ qué ziuu dxi guiluxe» (Eclesiastés 1:4).

•   «Purtiʼ ndiʼ nga ni maʼ guníʼ Jehová, Ni bizáʼ guibáʼ, Dios ni dxandíʼ, Ni bizáʼ guidxilayú ne Ni bi’ni’ ni, Ni gudixhestí ni, cadi bizáʼsibe ni, sínuque bizaʼbe ni para cueza binni luni» (Isaías 45:18).

 Qué zudii Dios lugar gunduuxeʼ binni Guidxilayú pur contaminación, pur guerra o pur sti cosa. Purtiʼ Biblia ná: «Zunitilú lu cani binitilú guidxilayú» (Apocalipsis 11:18). ¿Ximodo chigúnibe ni yaʼ?

 Zabee Dios ca gobiernu nuu lu Guidxilayú riʼ purtiʼ qué ñánnacaʼ ñápacaʼ ni ne ziuu ti gobiernu perfectu ni nuu guibáʼ xlugárcabe (Daniel 2:44; Mateo 6:9, 10). Rey stiʼ gobiernu ca nga Jesucristu, Xiiñiʼ Dios (Isaías 9:6, 7). Dxi guyuu Jesús lu Guidxilayú, biʼniʼ controlar ca desastre natural ni rizaaca lu ni (Marcos 4:35-41). Cumu naca Jesús Rey lu Reinu stiʼ Dios la? zuni controlarbe Guidxilayú riʼ ne guiráʼ ni nuu luni. Zuni chaahuibe Guidxilayú riʼ para gaca ni cásica guca jardín ni guyuu Edén que (Mateo 19:28; Lucas 23:43).

 Coʼ, cadi zacá diʼ ni. Riníʼcabe zacá purtiʼ cadi jneza modo riénecabe 2 Pedro 3:7, ra ná: «Peru ibáʼ ne guidxilayú ni nuu yanna ri la? cadi nisa di unitilú cani, sínuque ma gudixhe Dios unitilú ni ne gui». Guidúʼyanu chupa puntu risaca ni zacané laanu guiénenu ca diidxaʼ riʼ:

1.   Ndaaniʼ Biblia, ca diidxaʼ guibáʼ, Guidxilayú ne gui zanda gapa cani stale significadu. Guzéʼtenu ti ejemplu, Génesis 11:1 ná: «Yanna, guidubi guidxilayú guníʼ ti idioma si ne ca diidxaʼ queca». «Guidxilayú» ni rieeteʼ raríʼ caquiiñeʼ Biblia ni para guiníʼ binni ni nuu luni.

2.   Lu contextu stiʼ 2 Pedro 3:7 cusiene xi raca significar «ibáʼ», «guidxilayú» ne «gui» ni rieeteʼ luni. Ca versículo 5 ne 6 caníʼ de Diluviu guca ca dxi stiʼ Noé. Guti guiráʼ binni que, peru planeta stinu qué ninitilú. Cani binitilú Diluviu que nga ca binni malu que, o «guidxilayú» que (Génesis 6:11). Laaca binitilube «ibáʼ», o ca gobiernu ni biʼniʼ mandar dxiqué. Ngue runi, qué ninitilú diʼ planeta stinu, sínuque ca binni malu que. Noé ne familia stiʼ bilacaʼ dxi binitilú ca binni malu que ne biguetaʼ bidálecabe despué de Diluviu que (Génesis 8:15-18).

 Cásica binitilú nisa stiʼ Diluviu ca binni que, zacaca nga «gui», o destrucción ni rieeteʼ lu 2 Pedro 3:7, zunitilú ni guiráʼ ca binni malu ne cadi planeta stinu riʼ. Dios ná ziuu «ti guidxilayú cubi ne ti ibáʼ cubi» ra zaca puru si ni jneza (2 Pedro 3:13). «Guidxilayú cubi» ca, o ca binni nachaʼhuiʼ, zapa «ti ibáʼ cubi», o ti gobiernu cubi, ne laani nga Reinu stiʼ Dios. Ora guni mandar Reinu riʼ, zaca Guidxilayú riʼ ti paraísu (Apocalipsis 21:1-4).