Éxodo 11:1-10
11 De raqué, gudxi Jehová Moisés: «Zedaniáʼ sti plaga luguiáʼ faraón ne Egipto. Despué zudiibe lugar guireetu. Ne ora gudiibe lugar guireetu, ni chigúnibe nga chiládxibe laatu de raríʼ.
2 Yanna, guniʼné guidxi ca ne gudxi de guiráʼ hombre ne gunaa guinábacaʼ cosa de plata ne de oro ca vecinu sticaʼ».
3 Ne bicaa Jehová ca egipciu gácacaʼ nachaʼhuiʼ né xquídxibe. Dede beeda gaca Moisés ti hombre ni nabé biʼniʼ respetárcabe ndaaniʼ guidxi Egipto, cásica para ca ni runi xhiiñaʼ faraón ne zaqueca para ca egipciu.
4 Para gudxi Moisés faraón: «Ndiʼ nga ni maʼ guníʼ Jehová: “Biaʼ galaa gueelaʼ zazayaʼ ndaaniʼ guidubi guidxi Egipto.
5 Ne zati guiráʼ baʼduʼ primé ni nuu Egipto, dede baʼduʼ primé stiʼ rey faraón hasta baʼduʼ primé stiʼ esclava ni ruutuʼ biidxiʼ.* Laaca zati guiráʼ ca maniʼ ni gule primé.
6 Zunadiaga binni ti ridxi reciu ndaaniʼ guidubi guidxi Egipto de tantu naroʼbaʼ yuubaʼ sticaʼ, ti ridxi ni qué huayuu dxi gunadiaga binni ne maʼ qué zabiguetaʼ gunadiágacaʼ.
7 Peru ca israelita ne ca maniʼ sticaʼ la? nin ti biʼcuʼ qué zaduxhu laacaʼ. Zacá zánnatu maʼ gadxé modo runi tratar Jehová ca egipciu ne maʼ gadxé modo runi tratarbe ca israelita”.
8 Ne zeeda guiráʼ ca ni runi xhiiñaluʼ ra nuaaʼ, ziábacaʼ nezaluáʼ ne zaniʼcaʼ: “Bireené guidxi ni nanda lii ca de raríʼ”. Guizaaca si nga, zareʼdu». Guníʼ si Moisés ndiʼ, biree de ra nuu faraón ne guizáʼ zidxiichi.
9 Óraque gudxi Jehová Moisés: «Qué zucaadiaga faraón laatu, ne zazaacani para guneʼ stale milagru ndaaniʼ guidxi Egipto».
10 Guiráʼ ca milagru ni maʼ guca que, biʼniʼ Moisés ne Aarón cani nezalú faraón, peru bidii Jehová lugar gaca ladxidóʼ faraón naguidxi, para cadi gudii faraón lugar guiree ca israelita de xquidxi.
Nota
^ Lit. «ni runiné molinu de manu dxiiñaʼ».
