Éxodo 25:1-40
25 Ne gudxi Jehová Moisés:
2 «Gudxi ca binni de Israel gudiicaʼ de ni nápacaʼ para naa. Tutiica si gacalaʼdxiʼ gudii xiixa naa de guidubi ladxidóʼ la? laguicaa ni.
3 Ndiʼ nga ca cosa ni zanda gudiicabe ni naquiiñeʼ guicaatu: oro, plata, cobre,
4 hilu azul, guicha ladi dendxuʼ dieʼ moradu, hilu naxiñáʼ rini, lino de ni jma galán, guicha ladi chiva,
5 guidi ladi dendxuʼ barracu dieʼ naxiñáʼ, guidi ladi foca, yaga acacia,
6 aceite para ca lámpara, ne aceite ni rindáʼ naxhi* para gaca preparar aceite santo* ne para gaca inciensu* ni rindáʼ naxhi,
7 ne guié de ónice ne xcaadxi guié para guicá lu efod* ne lu pectoral.*
8 Naquiiñeʼ gúnicabe ti lugar para guni adorárcabe naa, ne naa zabezaʼ ládecabe.
9 Naquiiñeʼ gúnicabe tabernáculo* riʼ ne guiráʼ ca cosa stini casi diseñu ni chigulueeʼ lii.
10 »Naquiiñeʼ gúnitu ti arca* de yaga acacia de chupa codo* arondaʼ de ziuulaʼ, ti codo arondaʼ de xilaga ne ti codo arondaʼ de nasoo.
11 De racá naquiiñeʼ guni forrarluʼ ni de oro puru pur dentru ne pur fuera. Laaca naquiiñeʼ gúniluʼ ti moldura de oro guidubi vuéltani.
12 Biʼniʼ tapa aníu de oro ni guca fundir ne bicaa cani luguiáʼ de guidapaʼ ñee arca ca: chupa aníu ti ladu ne xhupa aníu sti ladu.
13 Laaca naquiiñeʼ gúniluʼ vara de yaga acacia ne guni forrarluʼ cani de oro.
14 Naquiiñeʼ gutiidiluʼ ca vara ca ndaaniʼ ca aníu ni cá cueʼ Arca ca para ganda guácabe ni.
15 Naquiiñeʼ guiaana ca vara ca ndaaniʼ ca aníu stiʼ Arca ca. Cadi naquiiñeʼ guireecani.
16 Ne ndaaniʼ Arca ca naquiiñeʼ cu’lu’ ca tabla sti’ Testimonio.*
17 »Ne laaca naquiiñeʼ gúniluʼ tapa stini de oro puru, de chupa codo arondaʼ de ziuulaʼ ne ti codo arondaʼ de xilaga.
18 Naquiiñeʼ gúniluʼ chupa querubín de oro. Napa xidé guzaʼluʼ cani né martíu lu guiropaʼ ladu neza ziuulaʼ tapa ca.
19 Biʼniʼ ca querubín ca lu guiropaʼ punta tapa ca, tobi cada punta.
20 Naquiiñeʼ guchiaa ca querubín ca guiropaʼ xhiaacaʼ luguiáʼ para guchiica’ tapa ca. Naquiiñeʼ chuʼ tobi frente de stobi ne guyadxícani lu tapa ca.
21 Ne lii naquiiñeʼ quíxheluʼ tapa ca lu Arca ca, ne ndaaniʼ Arca ca zaguuluʼ ca tabla stiʼ Testimonio ni chigudieeʼ lii.
22 Racá nga guihuinneʼ nezaluluʼ ne de luguiáʼ tapa ca zanieniaʼ lii. Ne dede racá, lade guiropaʼ querubín ni nuu lu arca ra riaapaʼ Testimonio* zudieeʼ lii ca mandamientu ni naquiiñeʼ gábiluʼ ca israelita.
23 »Laaca naquiiñeʼ gúniluʼ ti mexaʼ de yaga acacia de chupa codo de ziuulaʼ, ti codo de xilaga ne ti codo arondaʼ de nasoo.
24 Naquiiñeʼ guni forrarluʼ ni de oro puru ne gúniluʼ ti moldura de oro guidubi vuéltani.
25 Guidubi vuéltani guluu ti franja de tapa bicuini* de xilaga ne ti moldura de oro guidubi vuelta franja ca.
26 Laaca zúniluʼ tapa aníu de oro ne bicaa cani cada squina ra cá guidapaʼ ñeeni.
27 Naquiiñeʼ guicá ca aníu ca gaxha de franja stini, ne ndaanini tidiʼ ca vara ni zaquiiñeʼ para guanécabe mexaʼ ca.
28 Naquiiñeʼ gúniluʼ ca vara ca de yaga acacia, guni forrarluʼ cani de oro ne zaquiiñecani para guácabe mexaʼ ca.
29 »Ne laaca naquiiñeʼ gúniluʼ para laani bladuʼ ne copa, laaca naquiiñeʼ gúniluʼ jarra ne tazón para guixiiné ofrenda.* Biʼniʼ cani de oro puru.
30 Ne lu mexaʼ ca, cadi naquiiñeʼ guiaadxaʼ nezaluáʼ pan ni rudiitu para Dios.*
31 »Zúniluʼ ti candelabru de oro puru. Naquiiñeʼ guzaʼluʼ ni né martíu ne gácani de ti pieza si. Zápani ti base, ti eje galaani, zápani nani, xcuuchi, mudu* ne guieʼ.
32 Zaree xhoopaʼ náʼ lu eje ni nuu galaa candelabru ca: chonna náʼ ti ladu ne chonna náʼ sti ladu.
33 Ti ladu ca, cada nani zapa chonna xcuuchi ni napa forma guieʼ almendro, chonna mudu ne chonna guieʼ, ti xcuuchi, ti mudu ne ti guieʼ. Ne sti ladu ca, cada nani zapa chonna xcuuchi ni napa forma guieʼ almendro, chonna mudu ne chonna guieʼ, ti xcuuchi, ti mudu ne ti guieʼ. Zacá nga gaca xhoopaʼ náʼ ni guiree lu eje ni nuu galaa candelabru ca.
34 Ne eje ni nuu galaa candelabru ca zapa tapa xcuuchi ni napa forma guieʼ almendro, tapa mudu ne tapa guieʼ, ti xcuuchi, ti mudu ne ti guieʼ.
35 Luguiáʼ de primé mudu stiʼ eje ca zaree chupa náʼ, luguiáʼ de guiropa mudu stiʼ eje ca zaree xhupa náʼ, ne luguiáʼ de guionna mudu stiʼ eje ca zaree xhupa náʼ. Zacá nga gaca xhoopaʼ náʼ ni guiree lu eje ni nuu galaa candelabru ca.
36 Ca mudu stini, ca nani ne interu candelabru ca naquiiñeʼ gácacani de ti pieza si de oro puru, ne guzaʼluʼ cani né martíu.
37 Lu candelabru ca zúniluʼ gadxe lámpara. Ora guicaguí ca lámpara ca, zuzaanicani lugar ni nuu frente de laani.
38 Ca pinza ne ca braseru* stini naquiiñeʼ gácacani de oro puru.
39 Napa xidé iquiiñeʼ ti talentu* de oro puru para cháʼ candelabru riʼ ne ca herramienta stini.
40 Biiyaʼ gúniluʼ cani casi peʼ diseñu ni bilueeʼ lii lu dani ca.
Nota
^ O «bálsamo».
^ O «aceite ni riquiiñeʼ ora gaca nombrar tuuxa».
^ Ti codo nga 44.5 cm. Biiyaʼ apén. B14.
^ O «caja», «cofre».
^ O «ca tabla de guié ni zeeda gaca casi ti testigu».
^ O «caja ra riaapaʼ ca tabla de guié ni zeeda gaca casi ti testigu».
^ Biaʼ 7.4 cm. Biiyaʼ apén. B14.
^ O «botón stiʼ guieʼ».
^ Ti talentu nga 34.2 kg. Biiyaʼ apén. B14.
