Éxodo 37:1-29
37 Despué, bizá’ Bezalel Arca que de yaga acacia. Gúpani chupa codo* arondaʼ de ziuulaʼ, ti codo arondaʼ de xilaga ne ti codo arondaʼ de nasoo.
2 Biʼniʼ forrarbe ni de oro puru pur dentru ne pur fuera, ne bíʼnibe ti moldura de oro guidubi vuéltani.
3 De raqué bíʼnibe tapa aníu de oro ni guca fundir ne bicaabe cani luguiáʼ de guidapaʼ ñeeni: chupa aníu ti ladu ne xhupa aníu sti ladu.
4 Despué bíʼnibe vara de yaga acacia ne biʼniʼ forrarbe cani de oro.
5 De raqué bitiidibe ca vara que ndaaniʼ ca aníu ni cá cueʼ Arca que para ganda guácabe ni.
6 Laaca bíʼnibe ti tapa stini de oro puru, gúpani chupa codo arondaʼ de ziuulaʼ ne ti codo arondaʼ de xilaga.
7 Laaca bíʼnibe chupa querubín de oro, bizaʼbe cani né martíu lu guiropaʼ ladu neza ziuulaʼ tapa ca.
8 Biaana ti querubín ti punta ne biaana sti querubín sti punta. Bizaʼbe ca querubín que lu guiropaʼ ladu neza ziuulaʼ tapa ca.
9 Guiropaʼ querubín que nuchiaa xhiaaca’ ne nuchiicaʼ lu tapa que. Nuu tobi frente de stobi ne cayuuyadxícani lu tapa que.
10 De raqué bíʼnibe ti mexaʼ de yaga acacia ne gúpani chupa codo de ziuulaʼ, ti codo de xilaga ne ti codo arondaʼ de nasoo.
11 Despué biʼniʼ forrarbe ni de oro puru ne bíʼnibe ti moldura de oro guidubi vuéltani.
12 Laaca guluube ti franja de tapa bicuini* de xilaga guidubi vuéltani ne ti moldura de oro guidubi vuelta franja ca.
13 Laaca bíʼnibe tapa aníu de oro ni guca fundir ne bicaabe cani lu guidapa’ squina ra cá guidapaʼ ñeeni.
14 Biaana ca aníu que gaxha de franja que, ne biquiiñecani para tidiʼ ca vara ni guanécabe mexaʼ que.
15 Óraque bíʼnibe ca vara para guácabe mexaʼ que de yaga acacia ne biʼniʼ forrarbe cani de oro.
16 De raqué bíʼnibe ca cosa ni cheʼ lu mexaʼ que de oro puru: ca bladuʼ ne ca copa, zaqueca ca tazón ne ca jarra ni chiguiquiiñeʼ para ca ofrenda ni rixii.
17 Despué bíʼnibe candelabru que de oro puru. Bizaʼbe ni né martíu ne bíʼnibe ni de ti pieza si. Gúpani ti base, ti eje galaani, xcuuchi, mudu* ne guieʼ.
18 Lu eje ni nuu galaa candelabru que biree xhoopaʼ náʼ: chonna náʼ ti ladu ne chonna náʼ sti ladu.
19 Ti ladu ni, cada náʼ napa chonna xcuuchi ni napa forma guieʼ almendro, chonna mudu ne chonna guieʼ, ti xcuuchi, ti mudu ne ti guieʼ. Ne sti ladu ni, cada náʼ napa chonna xcuuchi ni napa forma guieʼ almendro, chonna mudu ne chonna guieʼ, ti xcuuchi, ti mudu ne ti guieʼ. Zaqué nga guca xhoopaʼ náʼ ni biree lu eje ni nuu galaa candelabru que.
20 Ne eje ni nuu galaa candelabru que napa tapa xcuuchi ni napa forma guieʼ almendro, tapa mudu ne tapa guieʼ, ti xcuuchi, ti mudu ne ti guieʼ.
21 Luguiáʼ de primé mudu stiʼ eje ca biree chupa náʼ, luguiáʼ de guiropa mudu stiʼ eje ca biree xhupa náʼ, ne luguiáʼ de guionna mudu stiʼ eje ca biree xhupa náʼ. Zaqué nga guca xhoopaʼ náʼ ni biree lu eje ni nuu galaa candelabru que.
22 Ca mudu stini, ca nani ne interu candelabru que gúcacani de ti pieza si de oro puru, ne guyáʼcani né martíu.
23 Despué bíʼnibe gadxe lámpara stini de oro puru, zaqueca ca pinza ne ca braseru stini.
24 Biquiiñebe ti talentu* de oro puru para bizaʼbe candelabru que ne ca herramienta stini.
25 Laaca bizaʼbe ti altar de yaga acacia para chaquiʼ inciensu. Gúcani cuadradu ne gúpani ti codo de ziuulaʼ, ti codo de xilaga ne chupa codo de nasoo. Ti pieza si guca altar que ne ca cachu stini.
26 Óraque biʼniʼ forrarbe luguiani de oro puru, ca ladu stini ne ca cachu stini. Ne laaca bíʼnibe ti moldura de oro guidubi vuéltani.
27 Xagueteʼ moldura que bicaabe chupa argolla de oro ti ladu ne xhupa argolla de oro sti ladu para tidiʼ vara ndaanicani para guácabe ni.
28 Despué bíʼnibe ca vara stini de yaga acacia ne biʼniʼ forrarbe cani de oro.
29 Laaca bíʼnibe aceite santo ni iquiiñeʼ ora gaca nombrar tuuxa, ne inciensu puru ni rindáʼ naxhi. Guca preparar chaahuicani.*
Nota
^ Ti codo nga 44.5 cm. Biiyaʼ apén. B14.
^ Biaʼ 7.4 cm. Biiyaʼ apén. B14.
^ O «botón stiʼ guieʼ».
^ Ti talentu nga 34.2 kg. Biiyaʼ apén. B14.
^ O «Gúcacani casi runi tuuxa ni nanna guni aceite rindáʼ naxhi».
