Primé libru de Samuel 10:1-27
10 Para gucuaa Samuel frascu ra da’ aceite que ne bindaatebe ni ique Saúl. Bidiibe laa ti bixidu’ ne rábibe laa: «Maʼ gulí Jehová lii para gácaluʼ xaíque stiʼ xquidxi.
2 Yannadxí, ora maʼ zeluʼ ne tídiluʼ Zelzá, gaxha de ra bigaachiʼ Raquel, lu layú stiʼ Benjamín, zadxaagaluluʼ chupa hombre. Ne zábicabe lii: “Maʼ bidxela ca burru canayúbiluʼ que. Maʼ gulee xaíque bixhózeluʼ laacame, yanna maʼ laatu nga cá íquebe, ne caniʼbe: «¿Ximodo guidxelaʼ xiiñeʼ pue?»”.
3 Peru lii guzá dede chindaluʼ ra nuu yaga naroʼbaʼ stiʼ Tabor. Raqué zadxaagaluluʼ chonna hombre ni zeʼ Betel para guni adorar Dios ni dxandíʼ. Tobi ziné chonna chivuhuiiniʼ, stobi ziné chonna pan ne stobi ziné ti jarra naroʼbaʼ ra daʼ vinu.
4 Zanabadiidxacabe lii ximodo nuuluʼ ne zudiicabe lii chupa pan. Gucuaa cani.
5 De racá zindaluʼ lu danihuiiniʼ stiʼ Dios ni dxandíʼ, raqué zuuyaluʼ ti grupu de soldadu filisteu. Ora maʼ yendaluʼ ndaaniʼ guidxi ca zuuyaluʼ ti grupu de profeta ziyete de lugar ra nasoo que. Ne ziníʼcabe casi riníʼ ca profeta, ne zániru caadxi binni lúcabe ziguxhídxicaʼ ti instrumentu ni napa cuerda, pandereta, flauta ne arpa.
6 Zudii espíritu stiʼ Jehová poder lii, ne laaca zaniʼluʼ casi riníʼ ca profeta. Zácaluʼ ti binni maʼ gadxé peʼ.
7 Ora guizaaca guiráʼ ndiʼ, biʼniʼ guiráʼ ni nuu lu naluʼ, purtiʼ Dios ni dxandíʼ nuuné lii.
8 De racá guzániru ne guyé Guilgal. Raqué guidúʼyanu para gudieeʼ sacrificiu ni riaʼquiʼ ne sacrificiu de paz. Raqué guleza naa gadxe gubidxa, ne ora chindayaʼ maʼ gabeʼ lii xi naquiiñeʼ gúniluʼ».
9 Casi peʼ bidxii deche Saúl ne bisaanabe Samuel, bizulú Dios bichaa ladxidoʼbe para gácabe ti binni maʼ gadxé, ne dxi queca bizaaca guiráʼ ni gudxi Samuel laabe.
10 Ne ora bireecabe zécabe ra nuu danihuiiniʼ que, biiyabe ti grupu de profeta. Óraque bidii espíritu stiʼ Dios laabe poder, ne guyuube lade ca profeta que ne bizulú caniʼbe casi riníʼ ca profeta.
11 Ora biʼyaʼ ca ni maca runibiáʼ laabe zebe lade ca profeta que ne laaca caniʼbe casi riníʼ ca profeta, nacaʼ: «¿Xi cayaca xiiñiʼ Quis pue? ¿Ñee laaca maʼ profeta Saúl la?».
12 Para ná tobi de ca hombre que: «¿Tu xiiñiʼ ca profeta ca pue?». Raqué nga biree dichu riʼ «¿Ñee laaca naca Saúl profeta la?».
13 Biluxe guníʼ si Saúl casi riníʼ ca profeta que, zebe lugar ra nasoo que.
14 Despué, ora biʼyaʼ xtiuʼ Saúl laa ne mozo que, gunabadiidxaʼ laacabe: «¿Paraa guyetu pue?». Para bicabi Saúl laabe: «Guyuudu yeyúbidu ca burru que, peru cumu qué nidxéladu laacame la? guyuudu ra nuu Samuel».
15 Para gunabadiidxaʼ xtiuʼ Saúl laacabe: «Lagabi naa, ¿xi gudxi Samuel laatu?».
16 Para bicabi Saúl xtiuʼ: «Gúdxibe laadu maʼ bidxélacabe ca burru que». Peru qué niníʼ Saúl gudxi Samuel laa zaca rey.
17 Para biseendacaa Samuel guidubi guidxi que gueedacaʼ Mizpá ne guzuhuaacaʼ nezalú Jehová.
18 Ne gudxi Samuel ca israelita: «Ndiʼ nga ni ná Jehová, Dios stiʼ Israel: “Naa nga gulee guidxi Israel de Egipto ne bilaʼyaʼ laacabe de lu náʼ Egipto ne ca rey ni biquiichináʼ laacabe.
19 Peru maʼ bicaanatu Dios ni rulá laatu, ni bilá laatu de guiráʼ cosa malu ne guiráʼ guendananá gudíʼditu. Laatu guniʼtu: «¡Gastiʼ naca! Gulí ti rey para guni mandar laadu». Yanna, laguzuhuaa nezalú Jehová pur tribu ne pur grupu de familia”».
20 Para biseendacaa Samuel guiráʼ tribu stiʼ Israel ne bichíñabe tribu pur tribu, ne tribu ni gulibe nga stiʼ Benjamín.
21 De raqué bichíñabe tribu stiʼ Benjamín, familia pur familia. Ne gulibe familia stiʼ ca matrita. Últimu la? gulibe Saúl, xiiñiʼ Quis. Para biyúbicabe Saúl guiráʼ ladu peru qué nidxélacabe laa.
22 Ngue runi gunabadiidxacabe Jehová: «¿Ñee nuu hombre ca raríʼ la?». Óraque bicabi Jehová: «Racá nuube, nucaachilube lade ca cosa beedanetu ca».
23 Para ziguxooñecabe ziyúbicabe laabe ne guleecabe laabe de raqué. Ne ora bizuhuaacabe Saúl lade ca binni guidxi que, biiyacabe guizáʼ nasoobe ne guirutiʼ ridiʼdiʼ ique de lu xíʼquebe.
24 Óraque ná Samuel rabi ca binni guidxi que: «¿Maʼ biiyatu tuu nga gulí Jehová la? Gástiruʼ stobi casi laabe ndaaniʼ guidxi riʼ». Ne guiráʼ ca binni que bicaacaʼ ridxi: «¡Viva rey stinu!».
25 De raqué bisiene Samuel guidubi naca guidxi que xi guiráʼ zanabaʼ ca rey laacabe, bicaabe ni lu ti libru ne gudíxhebe ni nezalú Jehová. De raqué gúdxibe guiráʼ ca binni que guibiguétacaʼ ra lídxicaʼ.
26 Laaca biguetaʼ Saúl Guibeá, ra lidxi, ne zinanda caadxi soldadu laabe, ni bicuudxi Jehová ladxidoʼcaʼ chinándacaʼ laabe.
27 Peru caadxi hombre qué iquiiñeʼ guníʼ: «¿Ndiʼ chigulá laanu la?». Bíʼnicabe menu laabe ne qué nusigáʼdecabe laabe gastiʼ. Peru qué niníʼ Saúl nin ti diidxaʼ.*
Nota
^ Lit. «casi ti mudu».
