Primé libru de Samuel 13:1-23
13 Napa Saúl [?]* iza dxi guca rey, ne chupa iza biʼniʼ mandarbe guidxi Israel.
2 Para gulí Saúl chonna mil hombre de guidxi Israel. Chupa mil de laacabe nuu Micmash, ra nuu Saúl, lade ca dani stiʼ Betel. Ne sti mil que nuu Guibeá, ti guidxi ni nuu lu layú stiʼ tribu stiʼ Benjamín, ra nuu Jonatán. Ne restu binni guidxi que gúdxibe laacaʼ guibiguétacaʼ ra lídxicaʼ.*
3 De raqué, biʼniʼ ganar Jonatán caadxi soldadu filisteu ni nuu Gueba, ne gunna ca filisteu que xi bizaaca. Ne biʼniʼ mandar Saúl guxhídxicabe cachu guidubi naca guidxi que ne guiníʼcabe: «¡Hebreu caʼ, lagucaadiaga ndiʼ!».
4 Guidubi naca guidxi Israel binadiaga noticia riʼ: «Biʼniʼ ganar Saúl ca soldadu filisteu, yanna nanalaʼdxiʼ* ca filisteu guidxi Israel». Ngue runi biseendacaabe hombre para cheʼ Guilgal, ra nuu Saúl.
5 Laaca gucuaasaa ca filisteu para gucaalucaʼ guidxi Israel. Nápacabe treinta mil carru ni rié lu guerra, xhoopaʼ mil soldadu ni riguiʼbaʼ caballu ne aparte nápacabe stale soldadu casi yuxi ni ríʼ guriá nisadóʼ. Guyécabe Micmash, ladu rindani gubidxa de Bet-Aven ne gudíxhecabe campamentu stícabe raqué.
6 Ne ora biʼyaʼ ca hombre de guidxi Israel ca enemigu sticaʼ guizáʼ bidxíbicaʼ. Ngue runi bicachilucaʼ ndaaniʼ cueva, ndaaniʼ guiruyú, lu dani, ca lugar ni nuu ndaaniʼ yú* ne ndaaniʼ cisterna.
7 Ne caadxi de ca hebreu que dede gudíʼdicaʼ guiiguʼ Jordán ne guyecaʼ Gad ne Galaad. Saúl la? nuuruʼ Guilgal ne guiráʼ ca ni biaanané laabe raqué cadxíbicaʼ dede cayacadíticaʼ.
8 Gulézabe gadxe gubidxa dede bizaa dxi gudixhe Samuel gueeda. Peru biiyabe candaa Samuel para guedandá Guilgal ne maʼ careeche ca xpínnibe.
9 Ngue runi guníʼ Saúl: «Latané naa ca maniʼ ni bireechú para sacrificiu ni riaʼquiʼ ne para sacrificiu de paz». Ne bizulú bidiibe sacrificiu ni riaʼquiʼ.
10 Peru casi biluxe bidiibe sacrificiu que zeeda Samuel. Para bireebe zidxaagalube* Samuel.
11 Para ná Samuel rabi laabe: «¿Xi maʼ bíʼniluʼ pue?». Óraque ná Saúl: «Cumu biiyaʼ maʼ careeche ca xpinneʼ, maʼ bizaa dxi gudíxheluʼ ne caʼruʼ gueedaluʼ, ne maʼ cadagulisaa ca filisteu Micmash la?
12 guníʼ iqueʼ: “Zeeda ca filisteu Guilgal para gucaalucaʼ naa ne caʼruʼ guinabaʼ Jehová gacané naa”. Ngue runi bidieeʼ sacrificiu ni riaʼquiʼ».
13 Para ná Samuel rabi Saúl: «Ti guendahuati nga bíʼniluʼ. Qué ñúniluʼ ni biʼniʼ mandar Jehová, Dios stiluʼ, lii gúniluʼ. Pa ñúniluʼ ni la? ñacané Jehová lii para cadi nusaana de ñuni mandar ca ni zá de lii guidxi Israel.
14 Peru yanna, qué zandaa reinu stiluʼ. Zadxela Jehová ti hombre ni gusiecheʼ ladxidóʼ. Ne zuni Jehová laabe xaíque stiʼ xquidxi, purtiʼ qué ñúniluʼ ni biʼniʼ mandar Jehová lii gúniluʼ».
15 Para biree Samuel de Guilgal ne zeʼ Guibeá, ti guidxi ni nuu lu layú stiʼ tribu stiʼ Benjamín. Ne bigabaʼ Saúl ca hombre biaanané laa; biaʼsi xhoopaʼ gayuaa.
16 Peru Saúl, xiiñibe Jonatán ne ca hombre ni qué nusaana laabe que, biaanacaʼ Gueba, ni nuu lu layú stiʼ tribu stiʼ Benjamín. Ne ca filisteu que gudíxhecaʼ campamentu sticaʼ Micmash.
17 Ne biree chonna grupu de soldadu ra nuu campamentu stiʼ ca filisteu. Tobi que zeʼ neza zécabe Ofrá, ladu nuu ca layú stiʼ Sual,
18 sti grupu que zeʼ neza zécabe Bet-Horón, ne guionna grupu que zeʼ neza ra nuu frontera ra rihuinni valle* stiʼ Zeboím, ni nuu neza ra nuu desiertu.
19 Ca dxi que, gastiʼ nin ti herreru lu guidubi naca ca layú stiʼ Israel, purtiʼ maca guníʼ ca filisteu: «Qué zudiʼnu lugar guni ca hebreu nin ti espada ne nin ti lanza para laacaʼ».
20 Ne guiráʼ ca israelita que napa xidé checaʼ ra nuu ca filisteu para gutúxhucabe cubu aradu sticaʼ, picu, jacha ne gudxíu.
21 Napa xidé quixe ca israelita ti pim* para gutúxhucabe cubu aradu, picu, rastriu de chonna punta, jacha sticaʼ ne guni chaahuicabe puya sticaʼ.
22 Ngue runi, ora biree ca xpinni Saúl ne Jonatán chitíndecaʼ, qué gápacaʼ nin espada nin lanza. Saúl si ne xiiñibe Jonatán nápacaʼ guiibaʼ para tindenecaʼ.
23 Ne maʼ gudiʼdiʼ ti grupu de soldadu filisteu valle stiʼ Micmash.
Nota
^ Cadi zeeda númeru ca lu textu hebreu.
^ Lit. «yoo de lari sticaʼ».
^ O «ribixhilaʼdxiʼ».
^ O «ndaaniʼ sótano».
^ Lit. «zinduube ndaayaʼ».
^ Laani nga ti lugar ra napampa ni nuu lade dani.
^ Laani nga ti medida ni gudixenécabe dxiqué, zándaca nanaani biaʼ 0.67 siclo. Biiyaʼ apén. B14.
