Primé libru de Samuel 21:1-15
21 Despué, guyé David Nob, ra nuu sacerdote Ahimélec. Ne ora biʼyaʼ Ahimélec laabe, guizáʼ bidxibi dede cayacaditi, para gunabadiidxaʼ laabe: «¿Xiñee stúbiluʼ zeedaluʼ pue? ¿Xiñee guirutiʼ tu zedané lii?».
2 Óraque ná David rabi sacerdote Ahimélec: «Gunabaʼ rey ca naa guneʼ xiixa, peru gúdxibe naa: “Qué chiganna guirutiʼ xi gunabaʼ lii gúniluʼ ne guiráʼ ni bisieneʼ lii”. Yanna, maʼ gudxeʼ ca xpinneʼ cuézacaʼ naa ti lugar ra biaananiáʼ laacaʼ.
3 Nga runi, pa nápaluʼ gaayuʼ pan la? canabaʼ lii gudiiluʼ cani naa, o intiica si ni nápaluʼ».
4 Para bicabi sacerdote que David: «Pan si ni raʼtaʼ nezalú Dios napaʼ. Zanda gudieeʼ cani lii peru pa caʼruʼ gapa ca xpínniluʼ relación sexual né tuuxa gunaa».
5 Óraque ná David rabi sacerdote que: «Dxandíʼ peʼ cayabeʼ lii qué huayápadu relación sexual né tuuxa gunaa ca dxi riʼ, cásica qué rúnidu ni dxi ritíndenedu ca enemigu. Pa ora riuudu lu guerra rúnidu stipa chuʼ cuerpu stidu nayá, ¡laxa peʼ yanna purtiʼ nabé risaca ni cayúnidu riʼ!».
6 Ngue runi bidii Ahimélec laabe pan ni raʼtaʼ nezalú Dios, purtiʼ ngue si nga ni napa. Peru maʼ cadi nexheʼ pan que nezalú Jehová ndaaniʼ tabernáculo, purtiʼ maʼ gundísacabe ni dxi riásani ne gudíxhecabe pan ni guca gasi.
7 Dxi que, nuu tobi de ca mozo stiʼ Saúl raqué —xaíque stiʼ ca ni rapa dendxuʼ— purtiʼ gupa xidé biaanabe ra tabernáculo que, nezalú Jehová. Labe Doeg ne edomita laabe.
8 De raqué gunabadiidxaʼ David Ahimélec: «¿Qué gapuʼ ti lanza o ti espada racá la? Cumu maʼ caquiiñeʼ guneʼ ni gunabaʼ rey ca naa la? bireeʼ guxooñeʼ ne maʼ qué nicaaʼ espada nin ca guiibaʼ stinneʼ».
9 Para ná sacerdote que rabi laabe: «Napaʼ espada stiʼ Goliat, filisteu ni biitiluʼ ndaaniʼ valle* stiʼ Elá que. Atrá de efod ca nuuni, réndani ti lari. Laasini nga zanda gudieeʼ lii, yené ni pa chiguiquiiñeluʼ ni». Para rabi David laabe: «Jma peʼ galán nga, dané ni naa».
10 Dxi queca biree David de raqué purtiʼ canazananda Saúl laa. De raqué yendabe ra nuu Akís, rey stiʼ Gat.
11 Para ná ca mozo stiʼ rey Akís rábicaʼ laa: «¿Ñee cadi David, rey stiʼ guidxi Israel nga la? ¿Ñee cadi laabe nga bizeetecabe dxi cuyaacabe ne cayuundacabe:“Maʼ biiti Saúl mil soldadune David, jma de chii mil” la?».
12 Nabé bicaa ca diidxaʼ riʼ David guiníʼ ique, ne guizáʼ bidxíbibe Akís, rey stiʼ Gat.
13 Ngue runi bíʼnibe casi ora zeʼ xpiaanibe ne guzabe casi ti loco lade ca binni que. Ne bizulú bizaabe raya ca puertaʼ ni nuu ra entrada guidxi que, ne bidiibe lugar guiete nisa ruaabe.
14 Ora biʼyaʼ Akís laabe, gudxi ca mozo stiʼ: «¡Gastiʼ xpiaaniʼ hombre riʼ! ¿Xiñee netu laabe ra nuaaʼ?
15 ¿Ñee riaadxaʼ loco raríʼ para gueedanetu stobi guni guendahuati nezaluáʼ la? ¿Ñee natu zaguaaʼ laabe ra lidxeʼ la?».
Nota
^ Laani nga ti lugar ra napampa ni nuu lade dani.
