Primé libru de Samuel 26:1-25
26 Gudiʼdiʼ si ti tiempu, guyé ca hombre de Zif Guibeá ne gúdxicaʼ Saúl: «Nucachilú David lu loma stiʼ Hakilá, frente de Jesimón».*
2 Ngue runi bietené Saúl chonna mil soldadu ni jma nanna tinde de guidxi Israel lu desiertu stiʼ Zif para guyúbicaʼ David.
3 Gudixhe Saúl campamentu stiʼ guriá ti neza, lu loma stiʼ Hakilá, frente de Jesimón. Ne cumu lu desiertu que nabeza David la? binadiágabe zeeda Saúl zeedayubi laabe.
4 Ngue runi biseendaʼ David caadxi xpinni para chiguuyaʼ pa dxandíʼ ngue nuu Saúl lu desiertu que.
5 De raqué guyé David dede ra naguixhe Saúl campamentu stiʼ, ne biiyabe paraa nisiaasiʼ Saúl ne paraa nisiaasiʼ xaíque stiʼ ejércitu stiʼ, Abner xiiñiʼ Ner. Nisiaasiʼ Saúl galaa campamentu que, ne guidubi vuelta de laa nexheʼ ca soldadu stiʼ.
6 Óraque gunabadiidxaʼ David Ahimélec, hitita que, ne Abisái xiiñiʼ Zeruyá, biʼchiʼ Joab: «¿Tu chiné naa ra nuu campamentu stiʼ Saúl?». Para bicabi Abisái: «Naa chiniáʼ lii».
7 Neca nacahui purtiʼ maʼ huaxhinni, gunda yendá David ne Abisái ra nuu campamentu que. Yendácabe Saúl nisiaasiʼ ne daabi lanza stiʼ layú, cueʼ ique. Abner ne ca soldadu que la? néxhecaʼ guidubi vuelta de laabe.
8 Para ná Abisái rabi David: «Yannadxí Dios peʼ cusaana enemigu stiluʼ lu naluʼ. Bidii lugar naa gutaabeʼ laabe layú né lanza riʼ. Ti biaje si zuneʼ ni, maca biiteʼ laabe».
9 Peru ná David rabi Abisái: «Qué chiguninaluʼ laabe. Guirutiʼ zanda guniná binni ni maʼ gulí Jehová sin gaʼniʼ donda ique».
10 Ne laaca guníʼ David: «Casi peʼ nuu Jehová, Jehová peʼ guuti laabe o laaca si zedandá dxi zátibe cásica rati guiráʼ binni o zándaca guuticabe laabe lu xiixa guendaridinde.
11 Cumu maʼ nannaʼ ximodo ruuya’ Jehová ca cosa ca la? ¡nin que ziuu dxi gunena’ya’ binni ni maʼ gulí Jehová! Nga runi gucuaa lanza stibe ne jarra nisa ca ne chuu».
12 Óraque gucuaa David lanza que ne jarra nisa ni zuhuaa cueʼ ique Saúl, ne bireecabe de raqué. Guiruti’ ñuuya’ laacabe ne guirutiʼ ñanna pa guyécabe raqué. Guiráʼ ca soldadu que nisiaasicaʼ. Guirutiʼ nibani purtiʼ bidii Jehová lugar guicá bacaandaʼ laacabe.
13 De raqué gudi’di’ David ndaaniʼ ti valle* ne gudxi’ba’ ique ti dani, zitu de ra nuu Saúl ne ca xpinni.
14 Ne raqué bicaa ridxi David ca soldadu que ne bicaa rídxibe Abner xiiñiʼ Ner: «¡Abner! ¡Canieniáʼ lii!» Para bicabi Abner laabe: «¿Tuu nga cucaa ridxi rey stinneʼ zacá pue?».
15 Para ná David rabi Abner: «¿Cadi naluʼ hombre lii la? Gastiʼ stobi casi lii ndaaniʼ guidxi Israel. Yanna, ¿xiñee qué ñatanaluʼ para ñápaluʼ rey stiluʼ pue? Purtiʼ nin ñánnaluʼ guyuu ti soldadu ndaaniʼ campamentu ca para guuti laabe.
16 Qué ñúniluʼ xhiiñaluʼ. Casi peʼ nuu Jehová, naquiiñeʼ gátitu, purtiʼ qué ñápatu señor stitu, hombre ni maʼ gulí Jehová. ¡Gudxi naa! ¿Paraa nuu lanza stibe ne jarra nisa zuhuaa cueʼ íquebe que?».
17 Óraque binibiáʼ Saúl stidxi David ne ná rabi laabe: «David, xiiñeʼ, ¿ñee lii nga la?». Para bicabi David laabe: «Ajaʼ, naa ndiʼ, rey stinneʼ».
18 Ne guníʼ: «Señor stinneʼ, ¿xiñee canazanándaluʼ naa pue? ¿Xi bineʼ? ¿Paraa bicheeʼ?
19 Rey stinneʼ, canabaʼ lii gucaadiágaluʼ naa. Pa Jehová cucaa lii sanándaluʼ naa, zudieeʼ laabe ti ofrenda de biidxiʼ para guicaabe.* Peru pa hombre cucaa lii gúniluʼ ni la? guni castigar Jehová laacabe. Purtiʼ maʼ guládxicabe naa ne maʼ bixhélecabe naa de xquidxi Jehová. Casi ñaca ñábicabe naa “¡Guyé, yeguni adorar xcaadxi dios!”.
20 Yanna canabaʼ lii cadi guixii rini stinneʼ zitu de nezalú Jehová. Rey stinneʼ, zeedaluʼ casi ñaca canazanándaluʼ ti biuu, casi ñaca nuuluʼ guinaazeluʼ ti pájaru guiʼxhiʼ».*
21 Para ná Saúl rabi laabe: «Ma’ bicheeʼ. Biguetaʼ, David, xiiñeʼ, maʼ qué zuneʼ diaʼ lii gastiʼ, purtiʼ yannadxí bisihuínniluʼ rusisácaluʼ xquendanabaneʼ. Ti guendahuati ndiʼ cayuneʼ. Ne nannaʼ cadi jneza ni».
22 Para bicabi David laabe: «Raríʼ nuu lanza stiluʼ, rey. Biseendaʼ tobi de ca xpínniluʼ gueedacaa ni.
23 Ma’ Jehová quixe ca ni runi ni jneza ne ca ni ruzuubaʼ stiidxaʼ. Purtiʼ, neca bisaana Jehová lii lu nayaʼ yannadxí, qué ñunenaʼyaʼ hombre ni maʼ gulí Jehová.
24 Cásica bisisacaʼ xquendanabániluʼ, zaqueca gusisaca Jehová xquendanabaneʼ. Ne gulabe naa de intiica guendanagana».
25 Óraque gudxi Saúl laabe: «Dios cuʼ ndaayaʼ lii, David, xiiñeʼ. Zúniluʼ stale cosa ne zareendú guiráʼ ni gúniluʼ». De raqué biree David zeʼ, ne Saúl la? biguetaʼ ra lidxi.
Nota
^ O zándaca «lu desiertu».
^ Laani nga ti lugar ra napampa ni nuu lade dani.
^ Lit. «chúʼxiibe».
^ Casi berexunaxi.
