Primé libru de Samuel 28:1-25
-
Guyé Saúl En-Dor ra nuu ti gunaa ni ná riniʼné gueʼtuʼ (1-25)
28 Ca dxi que, biseendacaa ca filisteu ca soldadu sticaʼ para chitindenecaʼ guidxi Israel. Ngue runi gudxi Akís David: «Maca nánnaluʼ, lii ne ca xpínniluʼ zinetu naa lu guerra riʼ».
2 Ora binadiaga David ni guniʼbe, gudxi laabe: «Señor stinneʼ, maʼ nánnaluʼ xi chiguneʼ». Óraque ná Akís rabi laabe: «Nga runi maʼ gulieeʼ lii para gápaluʼ naa guiráʼ dxi».*
3 Para tiempu riʼ maʼ guti Samuel ne bicaachicabe laabe Ramá, xquídxibe, ne guidubi naca guidxi Israel guyuu triste. Ne laaca maʼ gulee Saúl de ndaaniʼ guidxi que guiráʼ ca ni ná riniʼné gueʼtuʼ ne ca ni runi adivinar.
4 Guca reunir si ca filisteu, bireecaʼ zecaʼ Sunem ne raqué gudíxhecaʼ campamentu sticaʼ. Ngue runi laaca biseendacaa Saúl ca soldadu stiʼ guidxi Israel ne gudíxhecaʼ campamentu sticaʼ Guilboa.
5 Ora biʼyaʼ Saúl campamentu stiʼ ca filisteu, guizáʼ bidxibi ne bizulú bipapa ladxidóʼ.
6 Neca gunabadiidxaʼ Saúl Jehová, peru qué niquiiñeʼ Jehová nin ti bacaandaʼ, nin Urim ne nin ca profeta para guicabi laabe.
7 Últimu la? biʼniʼ mandar Saúl ca mozo stiʼ: «Laguyubi tuuxa ni riniʼné ca gueʼtuʼ. Napaʼ gana guinabadiidxaʼ laabe xiixa». Para ná ca mozo stibe rabi laabe: «Nuu ti gunaa ndaaniʼ guidxi En-Dor ni ná riniʼné gueʼtuʼ».
8 Para gucu Saúl sti clase lari, ti cadi gunibiáʼcabe laa, ne huaxhinni que bireenebe chupa de ca xpínnibe zécabe ra nuu gunaa que. Para rábibe gunaa que: «Canabaʼ lii guiníʼneluʼ ca espíritu ne gábiluʼ naa xi chiguizaaca. Naa gabeʼ lii tu guiníʼneluʼ».
9 Para bicabi gunaa que laabe: «Lii ca nánnaluʼ xi biʼniʼ Saúl, guládxibe ca ni riniʼné gueʼtuʼ ne ca ni runi adivinar de ndaaniʼ guidxi riʼ. Yanna, ¿xiñee zeeduʼ ra nuaaʼ pue? ¿Ñee nuuluʼ guuticabe naa la?».
10 Para biʼniʼ jurar Saúl laabe pur Jehová: «¡Casi peʼ nuu Jehová, guirutiʼ tu zaníʼ xi chigúniluʼ!».
11 Óraque ná gunaa que rabi laabe: «¿Tu racaláʼdxiluʼ guinieniáʼ?». Para rábibe laa: «Guniʼné Samuel».
12 Ora biʼyaʼ gunaa que «Samuel»,* bicaa ti ridxi ne rabi Saúl: «¿Xiñee gudxíteluʼ naa pue? ¡Saúl lii, ¿njaʼ?!».
13 Para ná rey Saúl rabi laabe: «Cadi guidxíbiluʼ. Gudxi naa, ¿xi cayuuyaluʼ?». Para bicabi gunaa que laabe: «Cayuuyaʼ tuuxa ziree de ndaaniʼ yú. Ruluiʼbe ti dios».
14 Óraque gunabadiidxaʼ Saúl laabe: «¿Ximodo laabe yaʼ?». Para bicabi gunaa que Saúl: «Ti binnigola laabe ne nácube ti lari ziuulaʼ sin manga». Ora bidii Saúl cuenta «Samuel» ngue cayuuyaʼ gunaa que, oraqueca bizuxibi ne gundeteʼ ique layú.
15 Para gunabadiidxaʼ «Samuel» Saúl: «¿Xiñee bicaaluʼ naa guendaʼ ra nuuluʼ?». Óraque ná Saúl rabi laabe: «Purtiʼ maʼ qué guidxelaʼ xi guneʼ. Cucaalú ca filisteu naa ne maʼ bisaana Dios naa ne maʼ qué nabe iquiiñebe ca profeta stibe ne nin ti bacaandaʼ para guicábibe naa. Nga runi biseendacaaʼ lii para gábiluʼ naa xi naquiiñeʼ guneʼ».
16 Para ná «Samuel» rabi laabe: «Yanna, ¿xiñee canabadiidxaluʼ naa pa nánnaluʼ maʼ bidxiideche Jehová lii ne nácaluʼ enemigu stibe yaʼ?
17 Zuni Jehová guiráʼ ni gudxi naa guinieeʼ: Zaxha Jehová lii reinu stiluʼ ne zudiibe ni stobi, zudiibe ni David.
18 Qué nuzuubaluʼ stiidxaʼ Jehová ne qué nunitiluluʼ ca amalequita, ca ni bichiichi laabe. Nga runi yannadxí cudii Jehová lugar guizaacaluʼ guiráʼ ndiʼ.
19 Laaca zudii Jehová lugar guiábaluʼ lii ne guidxi Israel lu náʼ ca filisteu. Guixíʼ lii ne ca xiiñiluʼ zedanándatu naa. Ne laaca zudii Jehová lugar guiaba ejércitu stiʼ guidxi Israel lu náʼ ca filisteu».
20 Oraqueca biaba Saúl layú. Guizáʼ bidxíbibe pur guiráʼ ni gudxi «Samuel» laabe. Ne cumu qué ñobe guidubi dxi ne guidubi gueelaʼ la? maʼ qué gápabe stipa.
21 Ora bidxiña gunaa que ra nuu Saúl ne biʼyaʼ modo nuube, gudxi laabe: «Señor stinneʼ, maʼ bineʼ ni gunábaluʼ naa, dede qué ñaʼyaʼ xpidaʼ ne bineʼ ni gúdxiluʼ naa.
22 Yanna, señor stinneʼ, bicaadiaga naa, gudó ti ndaa pan riʼ para gápaluʼ stipa ne guni huantarluʼ neza».
23 Peru qué ninabe ne guniʼbe: «Qué zahuaʼ diaʼ gastiʼ». Peru, cumu cá gunaa que tema lube ne ca xpínnibe laaca cayábicaʼ laabe gobe xiixa la? bíʼnibe ni nacaʼ. Biásabe layú que ne guribe ruaa cama.
24 Napa gunaa que ti yuzehuiiniʼ naróʼ ra lidxi, ngue runi nagueendaca biitibe laame. Laaca gucuaabe harina, biguuchanabe ni ne bíʼnibe pan sin levadura.
25 Para bidiibe ni gudó Saúl ne ca xpinni. Ne gueelaʼ queca bireecaʼ zecaʼ.
