Primé libru de Samuel 29:1-11
-
Qué ñapa ca filisteu confianza David (1-11)
29 Para biseendacaa ca filisteu guiráʼ ca soldadu sticaʼ ndaaniʼ guidxi Afec, ne ca israelita que naguíxhecaʼ campamentu sticaʼ cueʼ ti lugar ra rindani nisa ni nuu Jezreel.
2 Ziné ca xaíque stiʼ ca filisteu que ca soldadu sticaʼ pur grupu de ti gayuaa ne de ti mil soldadu. Atrá de laacabe nanda Akís, David ne ca xpinni.
3 Peru ca príncipe stiʼ ca filisteu que gunabadiidxacaʼ: «¿Xi cayuni ca hebreu ca raríʼ pue?». Para ná Akís rabi laacabe: «David nga, mozo stiʼ rey Saúl de guidxi Israel. Biaʼ ti iza o jma de bisaanabe Saúl ne beedabe ra nuaaʼ. Ne dede dxi ca qué huayuuyaʼ gúnibe xiixa cosa malu».
4 Peru guizáʼ bidxiichiné ca príncipe stiʼ ca filisteu que Akís ne gúdxicaʼ laabe: «Guladxi hombre ca de raríʼ, gudxi laabe guibiguétabe guidxi ni bidiiluʼ laabe. Cadi gudiiluʼ lugar chinándabe laanu lu guerra riʼ, cadi málasi ra cadíndenu ca gucaalube laanu. Purtiʼ ni racalaʼdxiʼ hombre riʼ nga chiné ique ca soldadu stinu ra nuu señor stiʼ para guiaana bien né laabe.
5 ¿Ñee cadi David riʼ nga bizeetecabe dxi cuyaacabe ne cayuundacabe:
“Maʼ biiti Saúl mil soldadu,ne David, jma de chii mil” la?».
6 Ngue runi biseendacaa Akís David ne gúdxibe laa: «Casi peʼ nuu Jehová, naa ruuyaʼ lii casi ti hombre ni runi ni jneza, ne cayecheʼ purtiʼ nuuluʼ lade ejércitu stinneʼ ni cheʼ chitinde, purtiʼ naa qué huayuuyaʼ gúniluʼ xiixa cosa malu dede dxi beedaluʼ ra nuaaʼ. Peru ca xaíque stiʼ ca filisteu riʼ qué gápacaʼ confianza lii.
7 Nga runi, biguetaʼ ne cadi gúniluʼ xiixa ni guchiichi ca xaíque stiʼ ca filisteu».
8 Peru ná David rabi Akís: «¿Xi ga bineʼ yaʼ? Señor stinneʼ, biaʼ tiempu huayuaaʼ ra nuuluʼ, ¿ñee huayuuyaluʼ guneʼ xiixa cosa malu la? Rey stinneʼ, ¿xiñee qué zanda chiniáʼ lii chitindenenu ca enemigu stiluʼ pue?».
9 Para ná Akís rabi David: «Nannaʼ guizáʼ nacháʼhuiluʼ casi ti ángel stiʼ Dios. Peru maʼ gudxi ca príncipe stiʼ ca filisteu naa: “Cadi gudiiluʼ lugar chinándabe laanu ra chitíndenu riʼ”.
10 Nga runi, guixíʼ siadoʼroʼ, ora maʼ zedará gueelaʼ, lii ne ca xpinni señor stiluʼ, ni bedananda lii, laguiasa ne laché».
11 Ngue runi nacándaruʼ biasa David ne ca xpinni para guibiguétacaʼ xquidxi ca filisteu, ne ca filisteu que zecaʼ Jezreel.
