Primé libru de Samuel 3:1-21
-
Gulí Dios Samuel para gaca profeta (1-21)
3 Que nusaana Samuel, baʼduhuiiniʼ que, de ñuni xhiiñaʼ Jehová, ne gucané Elí laabe. Ca dxi que maʼ huaxiéʼ rudii Jehová xiixa mensaje binni ne laaca maʼ huaxiéʼ tu ricaa visión.
2 Ti dxi, nexheʼ Elí ti lugar ra maca raʼtaʼ (tiempu que maʼ qué ruuyabe).
3 Caʼruʼ guizuíʼ lámpara stiʼ Dios, ne nexheʼ Samuel ra templu* stiʼ Jehová, ra nuu Arca stiʼ Dios.
4 Para bicaa ridxi Jehová Samuel, ne laa bicabi: «Raríʼ nuaaʼ».
5 Óraque biree guxooñeʼ Samuel zeʼ ra nuu Elí ne ná: «Señor stinneʼ, bicaa rídxiluʼ naa, ¿njaʼ? Raríʼ nuaaʼ». Para ná Elí rabi labe: «Coʼ, cadi naa diaʼ bicaariʼdxeʼ lii. Yegataʼ, yegasi». Para biree Samuel zeʼ zigataʼ.
6 Biguetaʼ bicaa ridxi Jehová laabe: «¡Samuel!». Óraque biasa Samuel zeʼ ra nuu Elí ne rábibe laa: «Señor stinneʼ, bicaa rídxiluʼ naa, ¿njaʼ? Raríʼ nuaaʼ». Para bicabi Elí laabe: «Coʼ, xiiñeʼ, cadi naa diaʼ bicaariʼdxeʼ lii. Yegataʼ, yegasi».
7 (Caʼruʼ diʼ gunibiáʼ Samuel Jehová ne qué huayuu dxi gudii Jehová laabe ti mensaje).*
8 Para biguetaʼ bicaa ridxi Jehová laabe, ne ndiʼ maʼ guionna biaje: «¡Samuel!». Para biasa Samuel zeʼ ra nuu Elí ne rábibe laa: «Bicaa rídxiluʼ naa, ¿njaʼ? Raríʼ nuaaʼ».
Óraque bidii Elí cuenta Jehová ngue cucaa ridxi baʼduhuiiniʼ que.
9 Ngue runi ná Elí rabi Samuel: «Guyé, yegataʼ, ne pa guiníʼnebe lii sti biaje la? gudxi laabe “Guníʼ, Jehová, cucaadiagaʼ lii. Naa nga siervu stiluʼ”». Para biree Samuel zeʼ zigataʼ.
10 De raqué, casi maca biʼniʼ Jehová ni chonna biaje, bicaa ridxi laabe: «¡Samuel, Samuel!». Para bicabi Samuel laabe: «Guníʼ, cucaadiagaʼ lii. Naa nga siervu stiluʼ».
11 Óraque ná Jehová rabi Samuel: «Biaa, chiguneʼ xiixa ndaaniʼ guidxi Israel ne tutiica gunadiaga ni guizáʼ zadxibi.*
12 Dxi ca zuneʼ cumplir primé ne últimu ni maʼ gunieeʼ zazaaca Elí ne familia stiʼ.
13 Napa xidé gábiluʼ laabe zusabanaʼyaʼ familia stibe tobi si tiru ne laabe maʼ nánnabe xiñee: cadi cayuni respetar ca xiiñibe Dios ne cadi caguu jnézabe laacaʼ.
14 Nga runi bineʼ jurar familia stiʼ Elí, nin sacrificiu nin ofrenda qué zanda guxhá ra bichee familia stiʼ Elí».
15 Para guʼtaʼ Samuel ne biaana raqué dede ora birá gueelaʼ. De raqué biásabe ne bixhélebe ca puertaʼ lidxi Jehová. Cadxíbibe gábibe Elí ni gudxi Dios laabe.
16 Peru bicaa ridxi Elí Samuel ne ná rabi laabe: «¡Samuel, xiiñeʼ!». Para bicábibe laa: «¿Xi laa?».
17 Óraque gunabadiidxaʼ Elí laabe: «¿Xi gúdxibe lii? Gudxi naa, cadi gucaachiluʼ gastiʼ. Zusabanáʼ Dios lii pa qué gábiluʼ naa xi guiráʼ gúdxibe lii».
18 Ngue runi gudxi Samuel laabe guirani; qué nucaachiʼ gastiʼ. Óraque ná Elí rabi laabe: «Jehová nga guníʼ ni. Laabe nánnabe xii nga ni jma jneza gúnibe».
19 Ziniisi Samuel ne qué nixeleʼ Jehová de laabe ne qué nusaana de ñuni cumplir* guiráʼ ni gudxi laabe.
20 Guidubi naca guidxi Israel, dede Dan hasta Beer-Seba, bidiicaʼ cuenta gulí Jehová Samuel para gaca profeta stiʼ.
21 Ne bihuínniruʼ Jehová ndaaniʼ guidxi Siló lu visión, purtiʼ ndaaniʼ guidxi Siló nga gudxi Jehová Samuel xi racalaʼdxiʼ guni ora bidii Jehová laabe mensaje stiʼ.
