Primé libru de Samuel 31:1-13
-
Guti Saúl ne guionnaʼ xiiñiʼ (1-13)
31 Ca dxi que cadindené ca filisteu guidxi Israel. Peru bixooñelú ca israelita de ca filisteu ne stale de laacaʼ gúticaʼ lu dani Guilboa.
2 Guizáʼ gaxha guzananda ca filisteu Saúl ne ca xiiñiʼ, ne biiticabe Jonatán, Abinadab ne Malki-Súa, ca xiiñiʼ Saúl.
3 De raqué, nabé feu modo gudíndecabe gaxha de ra nuu Saúl. Ora biʼyaʼ ca arqueru que Saúl, bindaacaʼ flecha laabe ne gucuani laabe.
4 Óraque gudxi Saúl hombre ni ruaʼ ca guiibaʼ stiʼ: «Gucuaa espada stiluʼ ne bitaabi ni naa. Purtiʼ qué racalaʼdxeʼ gueeda ca hombre ni qué runi ni ná Dios ca* ne guninacaʼ naa dede guuticaʼ naa». Peru qué niná hombre qué ñuni ni purtiʼ guizáʼ cadxibi. Ngue runi gucuaa Saúl espada stiʼ ne biiti laca laa.
5 Ora biʼyaʼ hombre que maʼ guti Saúl, gucuaa espada stiʼ ne laaca biiti laa.
6 Zaqué nga ti dxi si guti Saúl, guionnaʼ xiiñibe ne hombre ruaʼ ca xquiibabe.
7 Ora biʼyaʼ ca israelita ni nuu ndaaniʼ valle* que ne ca ni nabeza gaxha de guiiguʼ Jordán bixooñelú ca hombre de guidxi Israel ne maʼ guti Saúl ne ca xiiñiʼ, bisaanacaʼ ra nabézacaʼ ne bixooñelucaʼ. Despué de ngue beeda ca filisteu ne maʼ laacaʼ gulézacaʼ raqué.
8 Sti dxi que, ora yegaxha ca filisteu ca cosa risaca stiʼ ca hombre ni maʼ guti que, yendácabe Saúl ne guionnaʼ xiiñiʼ, néxhecaʼ maʼ gúticaʼ lu dani Guilboa.
9 Para bigácabe ique Saúl ne gúxhacabe guiráʼ cosa stibe ni yenebe lu guerra, ne biseendacabe razón ndaaniʼ ca guidxi stiʼ ca filisteu ti gánnacaʼ xi bizaaca, bireeche noticia riʼ lade ca binni que ne dede ndaaniʼ ca yuʼduʼ stiʼ ca bidóʼ stícabe.
10 De raqué gucuaacabe guiráʼ cosa ni yenebe lu guerra ne yesaanacabe cani ndaaniʼ yuʼduʼ stiʼ ca bidóʼ stiʼ Astoret* ne bicaacabe cuerpu stibe lu muru stiʼ Bet-San.
11 Ora gunna ca binni de Jabés-Galaad ni biʼniʼ ca filisteu que Saúl,
12 biree guiráʼ ca soldadu nadipaʼ stiʼ guidxi Jabés-Galaad ne biʼniʼ viajarcaʼ guidubi gueelaʼ para chindétecaʼ cuerpu stiʼ Saúl ne ca xiiñiʼ lu muru stiʼ Bet-San. De raqué biguétacabe Jabés ne raqué bizaaquicabe laacaʼ.
13 Despué bicaachicabe ca dxita ladi Saúl ne ca xiiñiʼ xaʼnaʼ yaga tamarisco ni nuu Jabés ne qué ñócabe gastiʼ* gadxe gubidxa.
Nota
^ O «ni qué ñaca circuncidar ca».
^ Laani nga ti lugar ra napampa ni nuu lade dani.
^ O «biʼniʼ ayunárcabe».
