Primé libru de Samuel 5:1-12
5 Gucuaa si ca filisteu Arca stiʼ Dios ni dxandíʼ, bireenecaʼ ni de Ebenézer ne zinecaʼ ni Asdod.
2 Despué yené ca filisteu Arca stiʼ Dios ni dxandíʼ ra templu stiʼ* Dagón ne bizuhuaacaʼ ni gaxha de estatua stiʼ Dagón.
3 Sti dxi que, nacándaruʼ biasa ca binni de Asdod ne biiyacaʼ nexherilú estatua stiʼ Dagón layú. Biábani biaʼsi peʼ frente de Arca stiʼ Jehová. Para gundísacabe ni ne bizuhuaacabe ni sti biaje ra maca zuhuaani.
4 Sti dxi que, nacándaruʼ biásacabe ne biiyacabe nexherilú estatua stiʼ Dagón layú sti biaje frente de Arca stiʼ Jehová. Biaaxha ique Dagón ne guiropaʼ chú náʼ, néxhecani ra puertaʼ templu que. Peru ra naca estatua que casi benda la?* qué ñaca gastiʼ.
5 Nga runi, dede yanna, ndaaniʼ guidxi Asdod, nin ti sacerdote stiʼ Dagón ne nin ti binni qué ruzuhuaañee ra puertaʼ templu stiʼ Dagón ora chuʼcaʼ ndaanini.
6 Biʼniʼ castigar Jehová ca binni de Asdod ne ca guidxihuiiniʼ stini. Bininabe laacaʼ ra bidiibe lugar gaca huaraca’ de almurrana.
7 Ora biʼyaʼ ca hombre de Asdod ni cazaaca que, guniʼcaʼ: «Maʼ qué zanda gápanu Arca stiʼ Dios stiʼ Israel raríʼ purtiʼ nabé naná cusabanabe laanu ne zaqueca cayúnibe Dagón, dios stinu».
8 Ngue runi biseendacaacabe ca hombre ni runi mandar ca filisteu ne gunabadiidxacabe laacaʼ: «¿Xi guninenu Arca stiʼ Dios stiʼ Israel?». Para bicábicaʼ: «Chinenu Arca stiʼ Dios stiʼ Israel Gad». Para yenécabe ni raqué.
9 Yesaanasícabe Arca que raqué, biʼniʼ castigar Jehová ca binni guidxi que ne guizáʼ bidxíbicaʼ. Guiráʼ ca binni de guidxi que, ca ni nahuiiniʼ zaqueca ca ni huaniisi, guca huaraca’ de almurrana.
10 Ngue runi yenécabe Arca stiʼ Dios ni dxandíʼ ndaaniʼ guidxi Ecrón. Peru casi yendanécabe Arca que raqué, bizulú ca ecronita cucaaca’ ridxi: «¡Beedanetu Arca stiʼ Dios stiʼ Israel raríʼ para guutini laadu ne gunduuxeni guidxi stidu!».
11 De raqué biseendacaacabe guiráʼ ca hombre ni runi mandar ca filisteu ne gúdxicabe laacaʼ: «Lacuee Arca stiʼ Dios stiʼ Israel de raríʼ. Lagudxiguetaʼ ni ra gucuaatu ni pacaa zátinu ne zanitilú guidxi riʼ». Guiráʼ binni nabeza ndaaniʼ guidxi que cadxibi gatiʼ. Nabé naná modo bisabanáʼ Dios ni dxandíʼ laacabe:
12 guiráʼ ni qué ñati que guca huaraca’ de almurrana. Guizáʼ biguáʼ ca binni que ridxi, canábacaʼ chuʼ tu gacané laacaʼ, tantu nadipaʼ cucaa ca binni que ridxi dede guibáʼ rindá stídxicaʼ.
