Primé libru de Samuel 6:1-21
-
Bidxiguetaʼ ca filisteu Arca que ca israelita (1-21)
6 Biaʼsi gadxe beeu guzanécabe Arca stiʼ Jehová lu ca layú stiʼ ca filisteu.
2 Biseendacaa ca filisteu que ca sacerdote ne ca hombre ni runi adivinar ne gunabadiidxacabe laacaʼ: «¿Xi guninedu Arca stiʼ Jehová pue? ¿Ximodo zanda gudxiguétadu ni?».
3 Para bicábicaʼ: «Pa chigudxiguétatu Arca stiʼ acuerdu* stiʼ Jehová, Dios stiʼ Israel, laguseendaʼ ti ofrenda. Cadi guiaandaʼ laatu guseendatu ti ofrenda pur donda para laabe, zacatiʼ zanda guiándatu ne zánnatu xiñee cayuni castigarbe laatu».
4 Para gunabadiidxaʼ ca filisteu que: «¿Xi caquiiñeʼ guséʼndadu casi ofrenda pur donda yaʼ?». Para bicábicabe laacaʼ: «Cumu gaayuʼ hombre nga runi mandar ca filisteu la? laguseendaʼ gaayuʼ almurrana de oro ne gaayuʼ biziña de oro. Purtiʼ ngueca guendananá biaba luguiáʼ cada tobi de laatu ne ca ni runi mandar laatu.
5 Caquiiñeʼ guzaʼtu almurrana ne biziña purtiʼ laacani nga cunduuxecani guidxi riʼ. Ne naquiiñeʼ gusisácatu Dios stiʼ Israel. Zándaca zacá maʼ qué zuninabe laatu, dios stitu nin ca layú stitu.
6 Cadi guquídxitu ladxidoʼto casi biʼniʼ ca binni de Egipto ne faraón. Bisabanáʼ si Dios stiʼ Israel laacaʼ, oraqueru’ bidiicaʼ lugar cheʼ ca israelita, para biree ca israelita de raqué.
7 Laguyubi ti carreta nacubi ne ti mancuerna vaca ni napa chupa yuzehuiiniʼ ni qué hualiibi lu ti ayubu. Laugaanda laacame carreta ca ne lagudxiguetaʼ ca yuzehuiiniʼ ca ndaaniʼ currá sticaʼ ti cadi chinándacame jñaacame.
8 Lagudxiibaʼ Arca stiʼ Jehová lu carreta ca, ne cueʼ Arca ca lagudxiibaʼ ti caja ra dxaʼ ca cosa de oro ni chiguseendatu para laabe casi ofrenda pur donda. Ne lagudii lugar cheni,
9 laatu laguuyadxí si. Pa guicaani neza Bet-Semes, neza xquídxini la? zánnanu Dios stiʼ Israel nga biseendaʼ guendananá riʼ luguianu. Peru, pa guicaani gadxé ladu, zánnanu cadi laadibe biʼniʼ castigarbe laanu, ti guendahuará si ni».
10 Para biʼniʼ ca hombre que guiráʼ ni gúdxicabe laacaʼ. Biyúbicabe ti mancuerna vaca ni napa yuzehuiiniʼ ne bigaandacabe laacame carreta, ne ca yuzehuiiniʼ que la? bidxiguétacabe laacame ndaaniʼ currá stícame.
11 De raqué bidxiibacabe Arca stiʼ Jehová lu carreta que. Laaca bidxiibacabe ti caja ra dxaʼ ca biziña de oro ne ca almurrana ni bizáʼcabe.
12 Ne gucuaa ca vaca que neza Bet-Semes. Zibidxiaacame ne qué ñuu ora nireecuéʼcame, nin ladu derechu nin ladu bigaʼ.* Ne zinanda ca hombre ni runi mandar ca filisteu que laacame dede ra nuu frontera stiʼ Bet-Semes.
13 Dxi que candisaʼ ca binni de Bet-Semes cosecha trigu. Ora gundisaʼ lúcabe ne bíʼyacabe Arca que, guizáʼ biéchecabe.
14 Para guyuu carreta que lu layú stiʼ Josué, betsemita que, ne raqué biaanadxini, gaxha de ti guié naroʼbaʼ. Óraque biquiiñecabe ca yaga stiʼ carreta que para gucaaguícabe ne bidiicabe ca vaca que Jehová casi ofrenda ni riaʼquiʼ.
15 Gundeteʼ ca levita que Arca stiʼ Jehová ne caja ra nuu ca cosa de oro que, ne gudíxhecabe cani lu guié naroʼbaʼ que. Dxi que, bidii ca hombre de Bet-Semes Jehová ofrenda ni riaʼquiʼ ne xcaadxi sacrificiu.
16 Ora biʼyaʼ gaayuʼ hombre ni runi mandar ca filisteu que ni bizaaca, dxiqueca biguétacaʼ Ecrón.
17 Ndiʼ nga ca almurrana de oro ni biseendaʼ ca filisteu para Jehová casi ofrenda pur donda: tobi stiʼ Asdod, tobi stiʼ Gaza, tobi stiʼ Asquelón, tobi stiʼ Gat ne stobi stiʼ Ecrón.
18 Biseendacabe gaayuʼ biziña de oro, tobi pur cada guidxi stiʼ ca hombre ni runi mandar ca filisteu (ca guidxi nadipaʼ* stícabe ne ca guidxihuiiniʼ ni nuu deche muru stícabe).
Ne dede yanna nuu guié naroʼbaʼ ra bizuhuaa Arca stiʼ Jehová lu layú stiʼ Josué, betsemita que, ne beeda gácani ti seña.
19 Peru biiti Dios ca hombre de Bet-Semes purtiʼ biiyadxicaʼ Arca stiʼ Jehová. Biitibe cincuenta mil setenta binni* de ndaaniʼ guidxi que, ne bizulú cayuunaʼ ca binni guidxi que pur ca ni gutiʼ que, purtiʼ biiti Jehová stale de laacabe.
20 Para gunabadiidxaʼ ca hombre de Bet-Semes: «¿Tu zanda guzuhuaa nezalú Jehová, ti Dios ni nayá? ¿Ñee qué zanda gusaana de guninabe laanu ne chebe ra nuu xcaadxi la?».
21 Ngue runi biseendatídxicabe ca binni ni nabeza Quiryat-Jearim: «Maʼ bidxiguetaʼ ca filisteu Arca stiʼ Jehová. Latáʼ gueedacatu ni».
Nota
^ O «izquierdo».
^ O «ca guidxi ni napa muru guidubi vuelta».
^ Lit. «70 hombre, 50,000 hombre».
