Primé libru de Samuel 7:1-17
7 Para beeda ca hombre de Quiryat-Jearim zinecaʼ Arca stiʼ Jehová, ne yenécabe ni ra lidxi Abinadab, ni nuu lu ti danihuiiniʼ. Ne gulícabe* Eleazar xiiñibe para gapa Arca stiʼ Jehová.
2 Xadxí guyuu Arca que Quiryat-Jearim, biaʼsi gudiʼdiʼ gande iza dede dxi yendanécabe ni raqué. De raqué guiráʼ ca binni de guidxi Israel bizulú biyubi* Jehová.
3 Para guniʼné Samuel guiráʼ ca binni de guidxi Israel, ne rábibe laacaʼ: «Pa de guidubi ladxidoʼto racaláʼdxitu guibiguétatu ra nuu Jehová la? lagusaʼbiʼ ca dios stiʼ xcaadxi guidxi ne ca bidóʼ stiʼ Astoret, lagudii interu xhiálmatu Jehová ne laguni ni násibe. Pa gúnitu ni la? zulabe laatu de lu náʼ ca filisteu».
4 Ngue runi bisaʼbiʼ ca israelita ca bidóʼ stiʼ Baal ne ca bidóʼ stiʼ Astoret, ne bíʼnicaʼ ni ná si Jehová.
5 De raqué gudxi Samuel laacabe: «Laguseendacaa guidubi naca guidxi Israel Mizpá ti guneʼ orar Jehová pur laatu».
6 Ngue runi, guyé guidubi guidxi que Mizpá. Guleecabe nisa ne bixhiicabe ni nezalú Jehová, ne dxi que, bíʼnicabe ti ayuno.* Raqué guníʼcabe: «Maʼ bichéʼnedu Jehová». Para beeda gaca Samuel juez stiʼ ca israelita ndaaniʼ guidxi Mizpá.
7 Ora gunna ca filisteu que nuu guiráʼ israelita Mizpá, biree ca hombre runi mandar ca filisteu que zitindenecaʼ guidxi Israel. Ne ora gunna ca israelita zeeda ca filisteu, guizáʼ bidxíbicaʼ.
8 Ngue runi gúdxicaʼ Samuel: «Cadi gusaanaluʼ de guinábaluʼ Jehová, Dios stinu, gacané laanu ne gulá laanu de lu náʼ ca filisteu».
9 Para gucuaa Samuel ti dendxuhuiiniʼ ne bidii laame Jehová casi ofrenda ni riaʼquiʼ. Biʼniʼ rogar Samuel Jehová gacané guidxi Israel, ne bicabi Jehová laabe.
10 Laga cudii Samuel ofrenda ni riaʼquiʼ que, zedadxiña ca filisteu para tindenecaʼ guidxi Israel. Guizáʼ nadipaʼ modo bixhidxi Jehová guibáʼ dxi que ne bichebe lú ca filisteu, zaqué nga biʼniʼ ganar guidxi Israel laacabe.
11 Biree ca hombre de Israel Mizpá zinándacaʼ ne ziyuuticaʼ ca filisteu, dede yendacaʼ ti lugar ni nuu ladu gueteʼ de Bet-Car.
12 Despué gucuaa Samuel ti guié ne gudixhe ni galahuiʼ de Mizpá ne Jesaná, ne gulee labe guié riʼ Ebenézer,* sicaríʼ guniʼbe: «Dede yanna cayacané Jehová laanu».
13 Zaqué nga maʼ laacabe biʼniʼ mandarcabe ca filisteu. Maʼ qué ñuuruʼ ca filisteu lu ca layú stiʼ Israel, ne biaʼ dxi bibani Samuel bisabanáʼ Jehová laacabe.
14 Ne biguetaʼ gucuaa guidxi Israel ca guidxi ni guxha ca filisteu laacaʼ, ca ni nuu dede Ecrón hasta Gat. Guxha ca israelita ca filisteu guiráʼ ca guidxi que ne ca layú stícani.
Ne laaca qué ñuudindené guidxi Israel ca amorreu.
15 Biʼniʼ juzgar Samuel guidxi Israel dede dxi gutiʼ.
16 Guiráʼ iza riebe ca lugar riʼ. Riebe Betel, Guilgal ne Mizpá, ne runi juzgarbe ca israelita ni nabeza ca lugar riʼ.
17 Despué ribiguétabe Ramá purtiʼ raqué nuu lídxibe, ne raqué laaca biʼniʼ juzgarbe guidxi Israel. Ne biʼniʼ Samuel ti altar para Jehová ndaaniʼ guidxi Ramá.
Nota
^ O «gucaná ladxidoʼcaʼ ne biinacaʼ nezalú».
^ O «qué ñócabe gastiʼ».
^ Riníʼ lá riʼ «guié ni racané».
