Guiropa carta para ca Corintios 10:1-18
10 Naa nga Pablo, cayacaʼ nachaʼhuiʼ né laatu ne canieniaʼ laatu né diidxaʼ nadóʼ casi ñaca caniʼné Cristu laatu. Nuu tu ná ridxibeʼ ora maʼ nuaaʼ ládetu, peru ora maʼ qué guinneʼ la? guizáʼ napaʼ valor.
2 Ne ora maʼ chaaʼ ra nuutu, ribezaʼ maʼ bichaa ca ni ná riníʼ íquedu casi riníʼ ique binni guidxilayú, ti cadi tindeniaʼ laacaʼ casi caníʼ iqueʼ guneʼ ni.
3 Purtiʼ neca nabánidu ndaaniʼ guidxilayú riʼ, qué ridíndedu casi runi binni guidxilayú.
4 Purtiʼ ca ni* riquiiñedu para gucáʼludu la? cadi nácacani casi ca ni riquiiñeʼ binni guidxilayú, sínuque nápacani poder purtiʼ zeedacani de Dios ne zanda gusábacani ca cosa ni zuhuaa dxiichiʼ casi ti torre.
5 Purtiʼ cusábadu guiráʼ idea falsu ne guiráʼ ni rucueeza binni para cadi gunibiáʼ Dios. Ruseguyoodo guiráʼ ni riníʼ ique binni ti guzuubacaʼ stiidxaʼ Cristu.
6 Ne ora maʼ bisihuínnitu ruzuubatu diidxaʼ lu guiráʼ cosa la? oracaruʼ nga maʼ zanda guni castigardu guiráʼ ca ni qué ruzuubaʼ diidxaʼ.
7 Laatu runi juzgartu ca cosa ca pur ni rihuinni si. Pa tuuxa guiníʼ maʼ xpinni Cristu laa la? naquiiñeʼ guiníʼ ique chaahuiʼ ndiʼ: cásica xpinni Cristu laabe la? laadu laacaʼ.
8 Bidii Señor laadu autoridad para gacanedu laatu iguidxi fe stitu ne cadi para gutuñeedu laatu, nga runi qué nituí luaʼ pa ñuneʼ presumir pur laani.
9 Purtiʼ qué racalaʼdxeʼ guchibeʼ laatu né ca carta ni rucaaʼ ra nuutu.
10 Purtiʼ nuu tu riníʼ: «Nabé naduxhuʼ riniʼbe lú ca carta ni rucaabe ne nabé ridindenebe laanu, peru ora maʼ nuube ládenu ruluíʼ qué zanda gúnibe gastiʼ ne qué gánnabe guiniʼbe».
11 Ca ni riníʼ zacá, naquiiñeʼ gánnacaʼ zúnidu guiráʼ ni rucaʼdu lu ca carta stidu ora maʼ nuudu ládecaʼ.
12 Purtiʼ qué ruchaagadu laadu né ca presumidu ne qué racaláʼdxidu gácadu casi laacaʼ. Riniʼcaʼ jneza ni cayúnicaʼ pur modo riníʼ íquecaʼ, ne zacá rusihuínnicaʼ nácacaʼ binni ni qué riene.
13 Peru qué zuni presumirdu pur dxiiñaʼ ni cayuni sti binni ni nuu fuera de ra nexheʼ gúnidu dxiiñaʼ, sínuque zuni presumirdu pur ca cosa ni gúnidu biaʼ ra gudixhe Dios gúnidu dxiiñaʼ, ne dede ra nuutu nga rugaanda ni.
14 Qué nireʼdu fuera de ra gudixhe Dios gúnidu xhiiñaʼ dxi guyuudu ra nuutu, sínuque laadu nga ca primé ni yené ca noticia galán ni caníʼ de Cristu ra nuutu.
15 Qué runi presumirdu pur dxiiñaʼ ni cayuni sti binni ni nuu fuera de ra nexheʼ gúnidu dxiiñaʼ. Peru ribézadu guiroobaʼ fe stitu ti guiroobaʼ dxiiñaʼ bínidu ládetu. Óraca maʼ zanda gúnidu jma.
16 Zanda guni predicardu ca noticia galán ndaaniʼ ca guidxi ni nuu zitu de xquídxitu, ti cadi guni presumirdu pur dxiiñaʼ ni maʼ biʼniʼ xcaadxi ra raca caber laacaʼ gúnicaʼ.
17 «Peru ni runi presumir la? guni presumir ca cosa ni maʼ biʼniʼ Jehová».*
18 Purtiʼ cadi binni nga runi aprobar laca laa, sínuque Jehová* nga runi decidir tu laa guni aprobar.
