Guiropa libru stiʼ Samuel 10:1-19
-
Biʼniʼ ganárcabe Ammón ne Siria (1-19)
10 Despué, guti rey stiʼ ca ammonita, nga runi maʼ xiiñibe Hanún nga beeda gaca rey.
2 Para ná David: «Zacaʼ nachaʼhuiʼ né Hanún, xiiñiʼ Nahás, cásica guca bixhózebe nachaʼhuiʼ né naa». De raqué biseendaʼ David ca mozo stiʼ para chitixhedxicaʼ ladxidóʼ rey que pur guti bixhozeʼ. Peru, ora yendá ca mozo stiʼ David lu ca layú stiʼ ca ammonita,
3 gudxi ca príncipe stiʼ ca ammonita Hanún, rey sticaʼ: «¿Ñee rábiluʼ dxandíʼ biseendaʼ David ca mozo stiʼ para si quixhedxí ladxidoʼloʼ pur guti bixhózeluʼ la? ¿Ñee cadi rábiluʼ biseendabe laacaʼ para gueeda gundaachicaʼ ximodo nuu ndaaniʼ guidxi riʼ ne despué guibiguétacaʼ para gunitilucaʼ ni la?».
4 Para gucuaa Hanún ca mozo stiʼ David, ne bigabe galaa guicha ruaacaʼ, bigabe xhábacaʼ galaa galaa dede lu beelaxáʼnacaʼ ne bidxiguétabe laacaʼ.
5 Ora gunna rey David ni bizaaca riʼ, ne cumu guizáʼ bisituícabe lu ca hombre riʼ la? biseendabe caadxi hombre chitidxi ca mozo stibe: «Laguiaana Jericó dede ora igaa guicha ruaatu, oracaruʼ maʼ guibiguétatu».
6 Gudiʼdiʼ si ti tiempu, bidii ca ammonita cuenta maʼ nanalaʼdxiʼ* David laacaʼ, para biseendacabe tu chitixe ca siriu de Bet-Rehob ne de Zobá para guieegucaʼ laacabe —biaʼsi gande mil soldadu ni rié a pie—, ne laaca gudíxecabe rey stiʼ Maacá ne ti mil xpinni ne doce mil hombre de Istob.*
7 Ora gunna David ni, biseendabe Joab ne guidubi ejércitu stibe, dede né ca soldadu ni jma nadipaʼ.
8 Laaca biree ca ammonita que ne yeguzuhuaacaʼ ra puertaʼ guidxi que para tíndecaʼ, ne ca siriu de Zobá ne Rehob, ca hombre de Istob* ne Maacá yeguzuhuaacaʼ sti ladu, lu ti layú ra napampa.
9 Ora biʼyaʼ Joab zeeda ca soldadu que nezalú ne nezadeche, gulibe ca soldadu ni jma nanna tinde de Israel ne bizuhuaa chaahuibe laacaʼ para tindenecaʼ ca siriu.
10 Xcaadxi hombre que la? biseendabe laacaʼ ra nuu bíʼchibe Abisái para guzuhuaa chaahuiʼ laacabe ne gucaalúcabe ca ammonita.
11 Ne guniʼbe: «Pa jma nadipaʼ ca siriu ca para naa la? gueedaluʼ gulaluʼ naa. Ne pa jma nadipaʼ ca ammonita para lii la? naa chaaʼ chigulaʼyaʼ lii.
12 Naquiiñeʼ gácanu nadxibalú ne cadi guidxíbinu tíndenu pur xquídxinu ne pur ca guidxi stiʼ Dios stinu, ne maʼ Jehová xcuenta guni ni racalaʼdxiʼ».*
13 Para biree Joab ne ca xpinni zigucaalucaʼ ca siriu peru ora biʼyaʼ ca siriu que laabe bixooñelucaʼ.
14 Ora biʼyaʼ ca ammonita bixooñelú ca siriu, laaca bixooñelucaʼ de Abisái ne guyuucaʼ ndaaniʼ guidxi que. Despué de ngue maʼ que nizananda Joab ca ammonita ne biguétabe Jerusalén.
15 Ora biʼyaʼ ca siriu maʼ biʼniʼ ganar guidxi Israel laacaʼ, guca reunircaʼ sti biaje.
16 Para biseendacaa Hadadézer ca siriu ni nuu gaxha de Guiiguʼ* que ne guyécabe Helam. Ne Sobac, xaíque stiʼ ejércitu stiʼ Hadadézer, nga zániru lúcabe.
17 Ora yetídxicabe ni David, nagueendaca biseendacaabe guidubi naca ejércitu stiʼ Israel. Gudíʼdibe guiiguʼ Jordán ne yendabe Helam. Óraque bizuhuaa chaahuiʼ ca siriu para gucaalucaʼ David ne gudíndenecaʼ laabe.
18 Peru bixooñelú ca siriu que de ca israelita. Biiti David gadxe gayuaa hombre ni rusá carru ni rié lu guerra ne cuarenta mil siriu ni riguiʼbaʼ caballu. Laaca bininabe Sobac, xaíque stiʼ ejércitu que, ne raqué gutiʼ.
19 Ora biʼyaʼ ca rey ni runi mandar Hadadézer biʼniʼ ganar ca israelita laacaʼ, nagueendaca bíʼnicabe ti tratu né ca israelita para cadi gucaalucaʼ laacabe ne guyuucabe dispuestu gúnicabe ni nacaʼ. Ne ca siriu que maʼ qué ninacaʼ ñacanecaʼ ca ammonita.
Nota
^ O «maʼ ribixhilaʼdxiʼ».
^ O «de Tob».
^ O «de Tob».
^ O «ni rabi jneza».
^ Laca laani nga guiiguʼ Éufrates.
