Guiropa libru stiʼ Samuel 22:1-51
22 Ndiʼ nga ti canción ni bicaa David para Jehová, dxi bilá Jehová laabe de lu náʼ guiráʼ ca enemigu stibe ne de lu náʼ Saúl.
2 Nabe:
«Jehová nga guié naroʼbaʼ stinneʼ ni nuu ra nasoo, ra zanda gucacheluáʼ,* ni rulá naa.
3 Naca Dios stinneʼ ti guié naroʼbaʼ, ra nuube rucacheluáʼ,laabe nga escudu stinneʼ, nápabe stale poder ne rulabe naa,* zeeda gácabe casi ti lugar ra nasoo ne ra nuube zanda guxooñeʼ,rulabe naa; lii nga rulaluʼ naa de ca binni qué iquiiñeʼ.
4 Rucaaridxeʼ Jehová, laabe nga naquiiñeʼ guisácabe,ne qué zuniná ca enemigu stinneʼ naa.
5 Gudiñentaa ca ola stiʼ guendaguti guidubi vuelta de naa;bichibi ca hombre qué iquiiñeʼ que naa purtiʼ stálecaʼ casi guiiguʼ ni rundaahua.
6 Bindiibi dxiichiʼ Baʼ* naa;ne gudíxhecabe trampa para guuticabe naa.
7 Ora jma peʼ cadxibeʼ bicaariʼdxeʼ Jehová,qué nusaana de nucaariʼdxeʼ Dios stinneʼ.
Dede lugar ra jma nandxóʼ binadiágabe stidxeʼ,ne ora bicaariʼdxeʼ laabe para gacanebe naa, binadiágabe naa.
8 Bizulú gucaditi guidxilayú ne biniibi dxacha;biniibi dxacha guibáʼne gucadítini purtiʼ guizáʼ bidxiichibe.
9 Biree guʼxhuʼ de ndaaniʼ xiibene biree ti bele ni runitilú de ndaaniʼ ruaabe,ne de laabe caree buu ni cá guí.
10 Dede bizuxibi guibáʼ ora zeeda yétebe,ne biaana ca za cahui que xañeebe.
11 Zeeda pápabe, dxíʼbabe ti querubín.
Málasi bihuínnibe lu ca xhiaa ti ángel.*
12 Óraque bíʼnibe ti lugar para chuʼbe, de guelacahuine de za yaaseʼ ni dxaʼ tipa de nisa.
13 De lu biaaniʼ stibe biree guí.
14 Para bizulú Jehová bixhidxi guibáʼ;gundisaʼ Dios ni nuu guibáʼ ridxi stiʼ para gunadiágacabe laa.
15 Bindaabe ca flecha stibe ne zaqué bicheechebe laacaʼ;guleebe rayu ne bichebe lucaʼ.
16 Bixeleʼ nisadóʼ ne bihuinni layú ra nexheʼ ni;bihuinni ca base stiʼ guidxilayú ra bidxiichi Jehovápur bi ni biree neza xii.
17 De ra jma nasoo bisigaanabe;gucuaabe naa ne guleebe naa de ndaaniʼ nisa ziáʼ.
18 Bilabe naa de enemigu ni jma nadipaʼ stinneʼ,de ca binni ni nanala’dxi’ naa, ne jma nadípacaʼ qué naa.
19 Bicaalúcabe naa ca dxi peʼ cadideʼ ra nagana,peru gucané Jehová naa.
20 Guleebe naa ne yenebe naa ti lugar ra qué zanda guninácabe naa;*bilabe naa purtiʼ cayechenebe naa.
21 Riguixe Jehová naa ora runeʼ ni jneza;riguíxebe naa purtiʼ nayá nuu nayaʼ.
22 Purtiʼ dede yanna canazayaʼ lu ca neza stiʼ Jehováne qué huadi’di’ ndaaniʼ iqueʼ gusaanaʼ Dios stinneʼ purtiʼ cadi jneza ni.
23 Qué zusiaandaʼ guiráʼ ca decisión* stibe;qué zucheeniaʼ ca ley stibe.
24 Ziaanaʼ nayá nezalube,zapaʼ cuidadu cadi guneʼ xiixa ni cadi jneza.
25 Jehová quixe naa ora guneʼ ni jneza,purtiʼ nayá nuaa’ nezalube.
26 Qué zusaanaluʼ ca ni qué rusaana lii;Ne zácaluʼ nacha’hui’ né ti hombre* ni qué gapa donda;
27 zácaluʼ nacha’hui’ né tuuxa ni nayá ladxidóʼ,peru qué zudiiluʼ lugar quite tuuxa ni rusiguii lii.
28 Purtiʼ rulaluʼ ca binni humilde,peru qué rulábiluʼ ca ni rudxiibaʼ laca laa, ne rindételu’ laacaʼ.
29 Purtiʼ lii nga lámpara stinneʼ, Jehová;ora nuaa’ ra nacahui, Jehová nga ruzaaniʼ naa.
30 Zanda gucaaluáʼ guiráʼ ca ni raxha stiʼ binni purtiʼ lii racaneluʼ naa;né poder stiʼ Dios zanda guicayaʼ lu ti muru.
31 Guirutiʼ zanda quiñeyú neza stiʼ Dios ni dxandíʼ;nayá ca diidxaʼ ni riníʼ Jehová.
Nácabe ti escudu para guiráʼ ca ni ruyubi guilá ra nuube.
32 Purtiʼ ¿nuuruʼ xa sti Dios casi Jehová?
Tu laa naca casi ti guié naro’ba’, pa cadi Dios stinu.
33 Zeeda gaca Dios ni dxandíʼ casi ti muru nadipaʼ para naa,ne zusiabe neza stinneʼ.
34 Racanebe naa gaca ñeeʼ casi ñee ti bidxiña;racanebe naa guzuhuaa chaahueʼ ora maʼ ziguiba’ ra nasoo.
35 Rusiidibe naa para chaaʼ lu guerra;ne nayaʼ zanda guzutipaʼ ti arcu de cobre.
36 Rudiiluʼ naa escudu stiluʼ ni rulá;ne rusisácaluʼ naa purtiʼ humilde lii.
37 Rusiroobaluʼ neza ra zizayaʼ;qué zuxooñeʼ ñeeʼ.
38 Zazayanandaʼ ca enemigu stinneʼ ne zunduuxeʼ laacaʼ;qué zabiguetaʼ dede ora guinitilucaʼ.
39 Zuniteluáʼ laacabe ne zutuañee laacabe, ti cadi guiásacabe;ziábacabe xañeeʼ.
40 Zudiiluʼ naa stipa para chaaʼ lu guerra;zuuyaʼ modo gunitiluluʼ guiráʼ ca ni cucaalú naa.
41 Zaládxiluʼ ca enemigu stinneʼ ne zuxooñecaʼ;zunduuxeʼ* ca ni nanalaʼdxiʼ naa.
42 Canábacabe chuʼ tu gacané laacabe, peru guirutiʼ tu gulá laacabe;dede cucaarídxicabe Jehová, peru cadi cacabi laacabe.
43 Zuutuaʼ laacabe dede ra guneʼ laacabe yudé;zuneʼ laacabe yudé ne zuutuañeeʼ laacabe casi rutuñeecabe beñe lu calle.
44 Zulaluʼ naa ora maʼ caníʼ ca binni xquidxeʼ mal de naa.
Zápaluʼ naa para gacaʼ xaíque stiʼ ca guidxi roʼ;ti guidxi ni qué lica runebiaʼyaʼ zuni ni rabeʼ.
45 Dede zazá xibi ca binni de sti guidxi ora gueedacaʼ ra nuaaʼ;ne zuzuubacabe stiidxaʼ pur ni gunadiágacabe de naa.
46 Zadxibi daataʼ ca binni de sti guidxi;ne dede cayacadíticabe zareecabe de ndaaniʼ ca guidxi nadipaʼ stícabe.
47 ¡Nabani Jehová! ¡Guisaca Guié naroʼbaʼ stinneʼ!
¡Guisaca Dios stinneʼ, guié naroʼbaʼ ni rulá naa!
48 Dios ni dxandíʼ nga reeda para guquixe ni gúnicabe naa;rusaanabe ca guidxi ca lu nayaʼ;
49 rulabe naa de ca enemigu stinneʼ.
Rindísalu’ naa luguiáʼ de ca ni rucaalú naa;lii nga rulaluʼ naa de lu náʼ hombre qué iquiiñeʼ.
50 Nga runi Jehová, zudieeʼ xquixe peʼ lii lade guiráʼ ca guidxi ca,ne zuundaʼ* para gusisacaʼ laluʼ:
51 rúnibe stale cosa naro’ba’ para gulabe* rey stibe;qué ziuudxí gusaana de gannaxhiibe David,hombre ni maʼ gulibe, ne ca ni zá de laa».
Nota
^ Raríʼ caniʼni de ti castillo o ti lugar ni napa muru guidubi vuelta.
^ O «lu bi».
^ O «naroʼbaʼ».
^ O «ca decisión judicial».
^ Lit. «hombre ni nadipaʼ».
^ Lit. «zusiganeʼ».
^ O «zuxhidxeʼ música».
^ O «guni ganar».
