Guiropa libru stiʼ Samuel 4:1-12
4 Ora gunna Is-Bóset, xiiñiʼ Saúl, biiticabe Abner ndaaniʼ guidxi Hebrón, guizáʼ bidxibi ne laaca guizáʼ bidxibi guiráʼ ca israelita que.
2 Guyuu chupa hombre lade ca xpinni xiiñi’ Saúl, tobi que lá’ Baaná ne stobi que lá’ Recab. Nácacabe xaíque stiʼ ca grupu ni rigaxha stiʼ binni. Bixhózecabe nga Rimón, beerotita que, de tribu stiʼ Benjamín. (Dxiqué beedagaca Beerot ti guidxi stiʼ tribu stiʼ Benjamín.
3 Peru bixooñelú ca beerotita Guitaim ne dede yanna nabézacabe xquidxi binni).
4 Napa Jonatán, xiiñiʼ Saúl, ti xiiñiʼ láʼ Mefibóset. Nachiitaʼ ñeebe. Dxi nápabe gaayuʼ iza, beeda ti razón de Jezreel maʼ guti Saúl ne Jonatán. Ora gunna gunaa ni rapa laabe que xi bizaaca la? nagueendaca guyuáʼ* laabe ne ziguxooñené laabe, peru neza zécabe, tantu cadxibi gunaa que, bisaba laabe ne gucaná ñeebe.
5 Ti dxi biree ca xiiñiʼ Rimón, beerotita que —Recab ne Baaná— zécabe ra lidxi Is-Bóset ne yendácabe raqué biaʼ galaa dxi, ora peʼ jma nandáʼ, ne óraque nga rasi Is-Bóset ti ratu.
6 Biuu Recab ne Baaná ra lidxi Is-Bóset, ne bí’nicabe casi ñaca ziyúbicabe trigu, peru bidxígacabe espada ndaanibe ne biree guxooñecabe.
7 Ora guyuucabe ndaaniʼ yoo que nexheʼ Is-Bóset lu cama ndaaniʼ cuartu stiʼ. Óraque bidxígacabe espada ndaanibe ne biiticabe laabe; despué bigácabe íquebe ne zinécabe ni. Guzácabe guidubi gueelaʼ que neza zécabe Arabá.
8 Yendácabe Hebrón ne yenécabe ique Is-Bóset ra nuu rey David ne gúdxicabe laa: «Raríʼ nuu ique Is-bóset, xiiñiʼ Saúl, enemigu stiluʼ, ni gucalaʼdxiʼ ñuuti lii. Yannadxí cuquixe Jehová ni biʼniʼ Saúl ne ca xiiñiʼ, rey stinneʼ».
9 Para ná David rabi Recab ne biʼchiʼ Baaná, ca xiiñiʼ Rimón, beerotita que: «Casi peʼ nuu Jehová —ni bilá naa de guiráʼ ca yuubaʼ stinneʼ—,
10 hombre ni beedatidxi naa “maʼ guti Saúl”, zácaxa ná galán ngue ni beedatidxi naa, guleza niguixeʼ laa pur ni biʼniʼ, peru gunaazeʼ laa ne biiteʼ laa Ziclag.
11 Pa nga bineʼ laabe, ¿cadi rábitu ngaca zuneʼ ca hombre qué iquiiñeʼ ni biiti ti hombre ndaaniʼ lidxi ne lu cama stiʼ sin guzaabiʼ gastiʼ la? ¿Ñee cadi rábitu naquiiñeʼ guquixeʼ laatu pur rini stiʼ hombre ca ne guuteʼ laatu la?».
12 Óraque biʼniʼ mandar David ca xpinni guutica’ laacabe. Bigácabe náʼ ne ñee guiropaʼ hombre riʼ ne bigaandacabe laacaʼ cueʼ cisterna stiʼ Hebrón. Laaca gucuaacabe ique Is-Bóset zinécabe ni Hebrón ne raqué bicaachicabe ni, ra gaʼchiʼ Abner.
Nota
^ O «biáʼ».
