Guiropa libru stiʼ Samuel 8:1-18
8 Gudiʼdiʼ si ti tiempu, biʼniʼ ganar David ca filisteu, bíʼnibe laacaʼ esclavu ne gúxhabe laacaʼ Meteg-Amá.
2 Laaca biʼniʼ ganarbe ca moabita. Gudíxhebe laacaʼ layú ne bíʼnibe laacaʼ chonna grupu: biitibe primé ne guiropa grupu que, peru guionna que maʼ qué ñuutibe laacaʼ. Para beeda gaca ca moabita esclavu stiʼ David ne gudíxecaʼ laabe impuestu.
3 Dxi zeʼ Hadadézer, xiiñiʼ Rehob, rey stiʼ Zobá, ziyubi guni mandar sti biaje ca layú ni nuu gaxha de guiiguʼ Éufrates, biʼniʼ ganar David laabe.
4 Gunaazeʼ David ti mil gadxe gayuaa soldadu ni dxiʼbaʼ maniʼ stibe ne gande mil soldadu ni rié a pie. Despué bininá David ñee* ca caballu ni ruaʼ carru ni rié lu guerra stibe, peru guleechú ti gayuaa caballu ni qué ñuniná.
5 Ora beeda ca siriu de Damasco zeeda gacanecaʼ rey Hadadézer de Zobá, biiti David veintidós mil soldadu sticaʼ.
6 De raqué gudixhe David chuʼ grupu de soldadu ndaaniʼ guidxi Siria de Damasco, ne beeda gaca ca siriu que esclavu stiʼ David ne gudíxecabe laabe impuestu. Ratiica cheʼ David racané* Jehová laa para guni ganar.
7 Laaca guxha David ca xpinni Hadadézer ca escudu redondo de oro ni zinecaʼ. Ne yenebe cani Jerusalén.
8 Laaca ziné David stale cobre stiʼ guidxi Bétah ne Berotái, chupa guidxi stiʼ Hadadézer.
9 Despué, gunna rey Toi de guidxi Hamat binduuxeʼ David interu naca ejércitu stiʼ Hadadézer.
10 Ngue runi biseendaʼ rey Toi Joram, xiiñiʼ, ra nuu rey David para guinabadiidxaʼ laabe ximodo nuube ne guni felicitar laabe pur biʼniʼ ganarbe Hadadézer (purtiʼ nabé bicaalú Hadadézer rey Toi ne gudindenebe laa stale biaje). Yené Joram stale cosa risaca de plata, oro ne cobre para David.
11 Ne guleechú rey David ca cosa riʼ para Jehová, cásica bíʼninebe plata ne oro ni gúxhabe guiráʼ ca guidxi ni biʼniʼ ganarbe:
12 Siria, Moab, ca ammonita, ca filisteu ne ca amalequita. Ne laaca guleechube guiráʼ cosa ni gúxhabe Hadadézer xiiñiʼ Rehob, rey stiʼ Zobá.
13 Ne jmaruʼ si binibiáʼ binni David ra biiti dieciocho mil edomita ndaaniʼ ti lugar ni runibiáʼcabe casi valle de Zidi.
14 Ne biʼniʼ mandarbe cheʼ ca soldadu stibe ndaaniʼ guidxi Edom. Guidubi naca ndaaniʼ guidxi que guluube grupu de soldadu, ne beeda gaca ca edomita esclavu stiʼ David. Ratiica cheʼ David, racané* Jehová laa para guni ganar.
15 Ne biʼniʼ mandar David guidubi naca guidxi Israel, laaca biyúbibe gaca ni jneza ndaaniʼ guidxi que ne qué nuquiichinabe laacaʼ.
16 Joab, xiiñiʼ Zeruyá, nga naca xaíque stiʼ ejércitu stiʼ David ne Jehosafat, xiiñiʼ Ahilud, nga ziné ti registru para rey que.
17 Sadoc, xiiñiʼ Aitub, ne Ahimélec, xiiñiʼ Abiatar, nga nácacaʼ sacerdote, ne Seraya naca secretariu.
18 Benaya, xiiñiʼ Jehoiadá, nga biʼniʼ mandar ca keretita ne ca peletita, ne ca xiiñiʼ David gúcacaʼ tuuxa ni napa ti puestu risaca* ndaaniʼ guidxi que.
