Guionna carta stiʼ Juan 1:1-14
1 Naa nga ancianu que, ne cuseendaʼ carta riʼ para lii, Gayo, hermanu ni dxandíʼ nadxieeʼ.
2 Hermanu ni nadxieeʼ, runeʼ orar para cheʼ ni lii galán lu guiráʼ cosa ne chuʼluʼ nazaaca, cásica nuuluʼ yanna.
3 Nabé biecheʼ ora beeda ca hermanu ne gúdxicaʼ naa dede yanna runi creluʼ ni dxandíʼ,* ne cadi cusaana de saluʼ lu ni dxandíʼ.
4 Gástiruʼ sti cosa ni jma rusiecheʼ naa que gannaʼ canazá ca xiiñeʼ lu ni dxandíʼ.
5 Hermanu ni nadxieeʼ, cusihuínniluʼ cadi caxéleluʼ de Dios* pur ni cayúniluʼ para ca hermanu neca qué runibiaʼluʼ laacaʼ.
6 Huaníʼcabe nezalú congregación pabiáʼ nadxiiluʼ ca hermanu. Canabaʼ lii de favor gacaneluʼ laacabe, bidii ni caquiiñecabe para viaje stícabe ne biʼniʼ ni modo riuulaʼdxiʼ Dios.
7 Purtiʼ bireecabe para guni predicárcabe lá* Dios, ne qué nicaacabe gastiʼ stiʼ ca binni de xcaadxi guidxi.
8 Naquiiñeʼ guidxaagalunu ca hermanu casi laacabe ra lídxinu,* zacá nga racanenu para gaca predicar ni dxandíʼ.
9 Biseendaʼ ti carta ra nuu congregación, peru qué rulabi Diótrefes ni rucaʼdu, purtiʼ riuulaʼdxiʼ gaca xaíque lade ca hermanu.
10 Nga runi, pa chaaʼ racá la? zusihuinneʼ xi cayúnibe, purtiʼ caniʼbe mal de laadu.* Peru cadi nga si, laaca qué rinabe guidxaagalube ca hermanu né respetu. Ne ca ni racalaʼdxiʼ guni ni la? ruyúbibe modo gucueezabe laacaʼ ne rúnibe pur guiládxibe laacaʼ de ndaaniʼ congregación.
11 Hermanu ni nadxieeʼ, cadi gácaluʼ casi ca ni runi cosa malu, sínuque guca casi ca ni runi ni jneza. Ni runi cosa galán la? zeeda de Dios. Ni runi cosa malu la? qué huayuuyaʼ Dios.*
12 Guiráʼ hermanu riníʼ bien de Demetrio ne pur modo nabánibe rihuinni dxandíʼ ni riníʼcabe. Laadu laaca rinidu pabiáʼ nacháʼhuibe, ne lii nánnaluʼ dxandíʼ ni rinidu.
13 Náparuaʼ stale ni gabeʼ lii, peru maʼ qué racalaʼdxeʼ gucaaʼ ni né pluma ne tinta,
14 purtiʼ rabeʼ mayaca guuyaʼ lii ti ganda güinu* diidxaʼ.
Gatadxí ladxidoʼloʼ.*
Cuseendaʼ ca amigu diuxi stiluʼ. Bidii diuxi stinneʼ cada tobi de ca amigu.*
Nota
^ O «nácaluʼ fiel lu ni dxandíʼ».
^ O «cusihuínniluʼ fiel lii».
^ O «xlá».
^ O «Nuunu obligadu gácanu hospitalariu né ca hermanu casi laacabe».
^ O «caniʼbe cosa malu de laadu».
^ O «qué runibiáʼ Dios».
^ O «guiniʼno».
^ O «Gápaluʼ paz».
^ O «Guníʼ lá cada tobi de ca amigu ora gudiiluʼ diuxi laacaʼ».
