Génesis 15:1-21
15 Bizaaca si guiráʼ ndiʼ, gupa Abrán ti visión ra gudxi Jehová laabe ca diidxaʼ riʼ: «Abrán, cadi guidxíbiluʼ. Naa nga escudu stiluʼ. Guizáʼ naroʼbaʼ ni chiguiáxaluʼ».
2 Peru bicabi Abrán: «Jehová, Señor ni runi mandar guiráʼ xixé ni nuu, ¿xi chigudiiluʼ naa pa caʼruʼ gapaʼ xiiñeʼ yaʼ? Guiráʼ ca ni napaʼ Eliezer, ti hombre de Damasco, guiaanané cani».
3 Ne laaca guniʼbe: «Caʼruʼ gudiiluʼ naa nin ti xiiñeʼ, ne ti mozo stinneʼ* nga gusaananiáʼ herencia».
4 Peru óraque bicabi Jehová laabe: «Coʼ, qué zacaa diʼ hombre ca herencia stiluʼ. Ti xiiñiluʼ* nga chiguicaa ni».
5 Óraque yenebe laa fuera ne gúdxibe laa: «Por favor, biiyadxí guibáʼ ne bigaba ca beleguí ca... ¿zanda ugábaluʼ guirácani la?». Ne óraque gúdxibe laa: «Cásica stálecani, zacaca nga zeeda gaca ca xiiñiluʼ stale».
6 Gupa Abrán fe Jehová, ne laa biiyaʼ laabe casi ti binni runi ni jneza.*
7 Ne laaca guníʼrube: «Naa nga Jehová, ni gulee lii de Ur guidxi stiʼ ca caldeu para gudieeʼ lii layú riʼ».
8 Peru gunabadiidxaʼ Abrán laabe: «Jehová, Señor ni runi mandar guiráʼ xixé ni nuu, ¿ximodo zanda gannaʼ pa dxandíʼ zacaaʼ layú riʼ yaʼ?».
9 Gudxi Dios laabe: «Gulí ti vaquiá de chonna iza, ti chiva de chonna iza, ti dendxuʼ barracu de chonna iza, ti guuguhuiiniʼ ne ti palomahuiiniʼ para gudiiluʼ laacame naa».
10 Óraque gucuaabe ca maniʼ riʼ ne bichuugube cada tobi chupa galaa, ca pájaru que si coʼ. Despué gudíxhebe ti galaa de cada maniʼ que cueʼ sti galaa que.
11 Ne bizulú biete ca pájaru ni ró beela luguiáʼ ca maniʼ ni biitibe que, peru bichibi Abrán laacame.
12 Ra mayaca guiaaziʼ gubidxa, gucuá ti bacaandaʼ Abrán, ne biaba ti guelacahui luguiabe.
13 Óraque gudxi Dios Abrán: «Naquiiñeʼ gánnaluʼ zabeza ca ni zá de lii ndaaniʼ sti guidxi ne ca binni de raqué zúnicaʼ laacabe esclavu ne zuninacaʼ laacabe tapa gayuaa iza.
14 Peru zuneʼ juzgar guidxi ni guni laacabe esclavu ne despué zareecabe de raqué né stale cosa.
15 Despué de guibánilu’ galán xadxí, zátilu’ dxi maʼ nagólalu’ ne zielu’ en paz ra nuu ca bixhozebiidalu’.
16 Peru tidiʼ si tapa generación, zabiguetaʼ ca ni zá de lii raríʼ, purtiʼ caʼruʼ guedandá dxi guneʼ castigar ca amorreu».
17 Ra maʼ biaaziʼ gubidxa ne maʼ nacahui, bihuinni ti horno ni caree guʼxhuʼ ndaaniʼ ne gudiʼdiʼ ti bele lade ca trozo beela stiʼ ca maniʼ que.
18 Ne dxi que, biʼniʼ Jehová ti acuerdu né Abrán ora guníʼ: «Zudieeʼ ca ni zá de lii layú riʼ, dede ra nuu guiiguʼ stiʼ Egipto hasta guiiguʼ Éufrates, guiiguʼ roʼ que:
19 layú stiʼ ca quenita, stiʼ ca quenizita, stiʼ ca cadmonita,
20 stiʼ ca hitita, stiʼ ca perizita, stiʼ ca refaím,
21 stiʼ ca amorreu, stiʼ ca cananeu, stiʼ ca guirgaseu ne stiʼ ca jebuseu».
