Génesis 28:1-22
28 Ngue runi bicaa ridxi Isaac Jacob, guluube ndaayaʼ laa ne gúdxibe laa: «Cadi guichaganaluʼ nin tobi de ca xiiñidxaapaʼ Canaán.
2 Guyé Padán-Aram, ra lidxi Betuel —bixhoze jñaaluʼ—, ne raqué bichaganáʼ tobi de ca xiiñidxaapaʼ Labán, bizaʼnaʼ jñaaluʼ.
3 Dios ni jma napa poder zaguu ndaayaʼ lii, zúnibe gápaluʼ xiiñiluʼ ne zutálebe ca ni zá de lii. Ne lii dxandíʼ peʼ zácaluʼ ti grupu naroʼbaʼ de stale guidxi.
4 Zudiibe lii ndaayaʼ stiʼ Abrahán —lii ne ca ni zá de lii— para guicaaluʼ guidxi ra huabézaluʼ casi binni de sti guidxi, ra maʼ bidii Dios Abrahán».
5 De raqué biseendaʼ Isaac Jacob Padán-Aram. Ne guyé Jacob ra nuu Labán, xiiñiʼ Betuel, arameu que. Labán nga bizanaʼ Rebeca, jñaa Jacob ne Esaú.
6 Biiyaʼ Esaú guluu Isaac ndaayaʼ Jacob, ne biseendaʼ Isaac Jacob Padán-Aram chiyubi xheelaʼ raqué ne ora guluube ndaayaʼ laa, guniʼbe: «Cadi guichaganaluʼ nin tobi de ca xiiñidxaapaʼ Canaán».
7 Laaca biiyabe bizuubaʼ Jacob stiidxaʼ bixhoze ne jñaa ne zeʼ Padán-Aram.
8 Ne bidii Esaú cuenta qué riuulaʼdxiʼ bixhoze xpiaʼ ca xiiñidxaapaʼ Canaán.
9 Ngue runi, aparte de ca xheelaʼ Esaú ni maca napa, guyebe ra nuu Ismael —xiiñiʼ Abrahán— ne bichaganabe bizaʼnaʼ Nebayot, ni láʼ Mahalat, xiiñidxaapaʼ Ismael.
10 Biree Jacob de Beer-Seba ne zeʼ Harán.
11 Neza zebe que yendabe ti lugar, ne cumu maʼ biaaziʼ gubidxa la? biaanabe raqué gueelaʼ que. Ne gucuaabe ti guié ni nuu raqué, gudixhe chaahuibe ni para quixhe íquebe luni ne gúʼtabe raqué.
12 Óraque gúpabe ti bacaandaʼ, biiyabe ti escalera ni zuhuaa lu guidxilayú ne rindani dede guibáʼ, caguiʼbaʼ ne cayete ca ángel stiʼ Dios luni.
13 Laaca biiyabe Jehová luguiáʼ de laani ne caníʼ:
«Naa nga Jehová, Dios stiʼ bixhózeluʼ Abrahán, ne Dios stiʼ Isaac. Layú ra néxheluʼ ca zudieeʼ ni lii ne laaca zudieeʼ ni ca ni zá de lii.
14 Zaca ca ni zá de lii stale casi yudé ni nuu lu guidxilayú. Zareeche ca xiiñiluʼ neza rindani gubidxa ne neza riaaziʼ gubidxa, ladu guiaʼ ne ladu gueteʼ. Ne guiráʼ ca familia ni nuu lu guidxilayú, zacaacaʼ ndaayaʼ* pur lii ne pur ca ni zá de lii.
15 Qué zusaanaʼ lii ne zapaʼ lii ra tiica si cheluʼ, ne zudxiguetaʼ lii ndaaniʼ guidxi riʼ. Qué zusaanaʼ lii dede ora maʼ bineʼ cumplir ni maʼ bidieeʼ stiidxaʼ lii».
16 Ora bibani Jacob guníʼ: «Dxandíʼ peʼ nuu Jehová lugar riʼ, ne qué lica gannaʼ ni».
17 Óraque bidxíbibe ne guniʼbe: «¡Guizáʼ nandxóʼ lugar ra nuaaʼ riʼ! Raríʼ nga ra lidxi Dios, ne raríʼ nga puertaʼ stiʼ guibáʼ».
18 Ngue runi siadoʼroʼ biasa Jacob, gucuaabe guié ra gudixhe íquebe que, bizuhuaabe ni casi ti columna ne bindaatebe aceite luni.
19 Ngue runi, gulee labe lugar que Betel.* Dxiqué la? Luz nga láʼ guidxi que.
20 Ne biʼniʼ Jacob promesa riʼ: «Pa qué gusaana Dios naa, gápabe naa neza ziaaʼ, ne gudiibe pan gahuaʼ ne lari gacuaʼ
21 ne pa guibiguetaʼ sin guizaacaʼ gastiʼ ra lidxi bixhozeʼ, óraca dxandíʼ peʼ maʼ bisihuinni Jehová naca Dios stinneʼ.
22 Guié riʼ, ni maʼ bizuhuaaʼ casi ti columna, zácani lidxi Dios, ne dxandíʼ peʼ, Dios stinneʼ, zudieeʼ lii chii por ciento de lu guiráʼ ni gudiiluʼ naa».
