Génesis 4:1-26
4 Ne gupa Adán relación sexual né xheelaʼ ne gucaxiiñiʼ Eva. Ora gule Caín guníʼ Eva: «Gucané Jehová naa gapaʼ ti hombrehuiiniʼ».
2 Despué, gúpabe Abel, biʼchiʼ Caín.
Guca Abel pastor ni rapa dendxuʼ ne Caín biʼniʼ dxiiñaʼ lu layú.
3 Gudiʼdiʼ si tiempu, bidii Caín caadxi de ni gundisaʼ lu layú casi ofrenda para Jehová.
4 Peru Abel bidii caadxi dendxuʼ stiʼ de ca ni gule primé, ne zá stícame. Yanna, guyuulaʼdxiʼ* Jehová modo naca Abel ne gucuaabe ofrenda stiʼ,
5 peru qué ñuuláʼdxibe* modo naca Caín ne qué nicaabe ofrenda stiʼ. Nga runi, guizáʼ bidxiichi Caín ne guyuu triste.*
6 Óraque ná Jehová rabi Caín: «¿Xiñee guizáʼ cadxiichiluʼ ne nuuluʼ triste pue?
7 Pa guchaaluʼ ne gúniluʼ ni jneza, ¿ñee cadi rábiluʼ zusiécheluʼ naa* sti biaje la? Peru, pa qué guchaaluʼ ne qué gúniluʼ ni jneza, zabézaruʼ pecadu lii ra puertaʼ yoo para guni dominarni lii. Yanna, ¿rábiluʼ zanda gucueezaluʼ ni la?».
8 Despué de ngue, gudxi Caín Abel: «Chuu lu layú». Ne laga nuucabe raqué, biaaxha Caín luguiáʼ biʼchiʼ ne biitibe laa.
9 De raqué gunabadiidxaʼ Jehová Caín: «¿Paraa nuu Abel, bíʼchiluʼ?». Laa bicabi: «Qué gannaʼ diaʼ. ¿Ñee naa nga rapaʼ bicheʼ la?».
10 Ngue runi gudxi Dios laabe: «¿Xi maʼ bíʼniluʼ pue? ¡Bicaadiaga guʼyuʼ! Dede layú cucaa ridxi rini stiʼ bíʼchiluʼ naa.
11 Ne yanna cayaca maldecirluʼ ne maʼ cheluʼ de lu layú ni maʼ bixheleruaa para gueʼ rini stiʼ bíʼchiluʼ, rini ni lii bixhiiluʼ.
12 Ora guʼnuʼ dxiiñaʼ lu layú, qué zudiini lii ni gudxiibaluʼ.* Zuxooñeluluʼ ne zieluʼ cheríʼ chericaʼ lu guidxilayú».
13 Óraque gudxi Caín Jehová: «Castigu ni cacaaʼ pur donda stinneʼ nabé naróʼbani para guneʼ huantar ni.
14 Yannadxí caládxiluʼ naa de región riʼ,* ne zareeʼ de luluʼ. Zuxooñeluaʼ ne ziaaʼ cheríʼ chericaʼ lu guidxilayú riʼ, ne tutiica guidxela naa dxandíʼ peʼ zuuti naa».
15 Ngue runi, gudxi Jehová Caín: «Pa gaca nga la? ni guuti lii zaguixe ni gadxe biaje».
Ne gudixhe Jehová ti señal* para Caín, para cadi guuticabe laabe pa guidxélacabe laabe.
16 Despué biree Caín de nezalú Jehová ne yendeza lu ti región ni láʼ Nod,* ni nuu ladu rindani gubidxa stiʼ Edén.
17 De raqué gupa Caín relación sexual né xheelaʼ, guca xiiñiʼ xheelabe ne gupa Enoc. Despué, bicuí Caín ti guidxi ne gulee labe ni Enoc, casi lá xiiñibe.
18 Gudiʼdiʼ si tiempu, beeda gaca Enoc bixhoze Irad; Irad beeda gaca bixhoze Mehujael; Mehujael beeda gaca bixhoze Metusael, ne Metusael beeda gaca bixhoze Lamec.
19 Bichaganáʼ Lamec chupa gunaa. Primé que láʼ Adá, ne guiropa que láʼ Zilá.
20 Gupa Adá Jabal. Jabal nga primé ni guleza ndaaniʼ yoo de lari ne gúcabe ganaderu.
21 Bíʼchibe biree lá Jubal. Laa nga guca primé de ca binni ni bixhidxi arpa ne flauta.
22 Peru Zilá gupa Tubal-Caín, hombre ni biʼniʼ guiráʼ clase herramienta de cobre ne de guiibaʼ. Ne bizaʼnaʼ Tubal-Caín biree lá Naamá.
23 Óraque gudixhe Lamec ca diidxaʼ riʼ para Adá ne Zilá, ca xheelaʼ:
«Lagucaadiaga stidxeʼ, ca xheelaʼ Lamec.Lagucaadiaga ca diidxaʼ stinneʼ:
biiteʼ ti hombre ni bininá naa,ya, ti hombrehuiiniʼ ni guluu golpe naa.
24 Pa ni guuti Caín naquiiñeʼ quixe ni gadxe biaje,ni guuti Lamec naquiiñeʼ quixe ni setenta y siete biaje».
25 Ne gupa Adán relación sexual né xheelaʼ sti biaje, gupa xheelabe ti hombrehuiiniʼ. Ne gulee lá Eva laabe Set,* purtiʼ guníʼ: «Maʼ bidii Dios naa sti xiiñeʼ* para chuʼ xlugar Abel, purtiʼ biiti Caín laabe».
26 Laaca gupa Set ti xiiñiʼ, gulee labe laa Enós. Tiempu que nga bizulú bicaa binni ridxi lá Jehová para gacané laacaʼ.
Nota
^ O «biʼniʼ aprobar».
^ O «qué ñuni aprobarbe».
^ Lit. «ne bituumbuʼ lube».
^ O «zápaluʼ aprobación stinneʼ».
^ Lit. «stipa stini».
^ Lit. «lu guidxilayú».
^ Zándaca raríʼ caniʼni de ti advertencia ni gudixhe Dios.
^ O «ra nabeza ni guládxicabe».
^ Riníʼ lá riʼ “ni bibí” o “ni guluucabe”.
^ O «Ma’ gulí Dios sti xiiñe’ para naa».
