Jonás 2:1-10
2 Óraque biʼniʼ orar Jonás Jehová, Dios stiʼ, de ndaaniʼ benda que
2 ne ná:
«Tantu cadxibeʼ bicaariʼdxeʼ Jehová ne laa bicabi naa.
De ndaaniʼ Baʼ* bicaariʼdxeʼ lii gacaneluʼ naa.
Ne binadiágaluʼ naa.
3 Ora bilaaluʼ naa ndaaniʼ nisa, galaa nisadóʼ bani,gudubayú ca corriente stini naa.
Biaba ca ola naroʼbaʼ stiluʼ luguiaʼyaʼ.
4 Ne gunieeʼ: “¡Maʼ zitu nuaaʼ de nezaluluʼ!
¿Ximodo guuyaʼ templu nandxóʼ* stiluʼ sti biaje yaʼ?”.
5 Gudubayú nisa que naa ne biaʼ qué ñateʼ siaʼ;dede ra jma gueteʼ biaanaʼ ndaaniʼ ni.
Birenda guixi nisadóʼ iqueʼ.
6 Biaazeʼ dede gueteʼ ra rindani ca dani.
Bineʼ sentir casi ñaca maʼ gaacheʼ ndaaniʼ baʼ ne maʼ qué ziuu dxi guireeʼ.
Peru lii, Jehová Dios stinneʼ, guleeluʼ naa de ndaaniʼ baʼ.
7 Ora bineʼ sentir mayaca gateʼ, bietenaladxeʼ Jehová.
Óraque yendá oración stinneʼ ra nuuluʼ, ra nuu templu nandxóʼ stiluʼ.
8 Ca ni runi adorar bidóʼ ni qué lica risaca, maʼ bisaanacaʼ ni dxandíʼ nadxii laacaʼ.
9 Peru naa né ruaaʼ zudieeʼ xquixe lii ne zuneʼ sacrificiu para lii.
Zuneʼ cumplir ca promesa ni maʼ bineʼ lii.
Jehová, lii nga ni rulá».
10 De raqué biʼniʼ mandar Jehová benda que guidxiʼbaʼ Jonás ruaa nisadóʼ.
