Jonás 3:1-10
3 Óraque guniʼné Jehová Jonás sti biaje:
2 «Guyé Nínive, guidxi risaca que, ne gudxi ca binni de raqué ni chitidxeʼ lii».
3 Bizuubaʼ Jonás stiidxaʼ Jehová ne biree zeʼ Nínive. Naca Nínive ti guidxi naroʼbaʼ,* para tidilaagacabe ndaaniʼ ni naquiiñeʼ sácabe chonna gubidxa.
4 Guyuu Jonás ndaaniʼ guidxi que ne guidubi ti dxi guzabe guniʼbe: «Dentru de 40 dxi zanitilú Nínive».
5 Peru bisihuinni ca binni de Nínive nápacaʼ fe Dios. Biʼniʼ mandarcaʼ gaca ti ayuno* ne gacuʼ* binni lari nachonga,* dede ca ni nahuiiniʼ hasta ca ni huaniisi.
6 Ora yendá ca diidxaʼ ni caníʼ Jonás que ra nuu rey stiʼ Nínive, biasa de lu trono stiʼ, gulee lari risaca stiʼ* ne gucu lari nachonga ne gurí ndaaniʼ dé ludé.*
7 Ne laaca biʼniʼ mandarbe gábicabe ca binni de Nínive ca diidxaʼ riʼ:«Ndiʼ nga ni maʼ gudixhe rey ne ca hombre risaca stiʼ naquiiñeʼ gaca, nin ti hombre ne nin ti maniʼ —nin ca dendxuʼ ne nin ca vaca— cadi lica naquiiñeʼ gocaʼ gastiʼ. Cadi naquiiñeʼ gocaʼ gastiʼ ne laaca cadi naquiiñeʼ guecaʼ nisa.
8 Naquiiñeʼ gacuʼ* ca hombre ne ca maniʼ ca lari nachonga, guni rogarcaʼ Dios de guidubi ladxidoʼcaʼ ne gusaanacaʼ ca cosa malu ni rúnicaʼ, ne maʼ cadi guninacaʼ guirutiʼ.
9 Tila zacá guiá Dios ni dxandíʼ laanu ne maʼ cadi guni ni cá ique ne guiete xiana stiʼ ti cadi guuti laanu».
10 Ora biʼyaʼ Dios ni dxandíʼ modo bichaacabe ne ni bíʼnicabe, biá laacabe* ne maʼ qué nuseendaʼ castigu ni guníʼ ñeedané luguiácabe.
Nota
^ Lit. «risaca para Dios».
^ O «cadi gó binni gastiʼ».
^ O «cuaʼquiʼ».
^ O «lari stiʼ rey».
^ O «ceniza».
^ O «cuaʼquiʼ».
^ O «bichaa ni naguixhe ique guni».
