Josué 11:1-23
11 Ora gunna Jabín, rey stiʼ Hazor ni bizaaca riʼ, biseendabe ti mensaje ra nuu ca rey riʼ para guieegucaʼ laabe: ra nuu Jobab, rey stiʼ Madón, ne ra nuu rey stiʼ Simrón, rey stiʼ Acsaf,
2 ra nuu ca rey ni nabeza lade dani ni nuu ladu guiáʼ, ca ni nabeza ra napampa* ladu gueteʼ de Kinéret, ca ni nabeza Sefelá ne guriá guidxi Dor ladu riaaziʼ gubidxa,
3 ra nuu ca cananeu ni nuu ladu rindani gubidxa ne ladu riaaziʼ gubidxa, ca amorreu, ca hitita, ca perizita, ca jebuseu ni nabeza lade dani ne ra nuu ca heveu ni nabeza ñee dani Hermón, lu layú stiʼ Mizpá.
4 Ngue runi guirácabe bireenécabe ejércitu stícabe, guizáʼ stálecabe casi yuxi ni ríʼ guriá nisadóʼ, ne yenécabe stale caballu ne stale carru ni rié lu guerra.
5 Guiráʼ ca rey riʼ guyuucaʼ de acuerdu tindenecaʼ guidxi Israel, ngue runi bireecaʼ zecaʼ ne gudíxhecaʼ campamentu sticaʼ gaxha de ra ridá nisa ndaaniʼ guidxi Merom.
6 Para gudxi Jehová Josué: «Cadi guidxíbiluʼ laacabe, purtiʼ guixíʼ biaʼ hora riʼ, mápeca biiti guidxi Israel guirácabe. Zuninaluʼ ñee* ca caballu stícabe ne zucaaguiluʼ guiráʼ carru stícabe».
7 Ne ora nuucabe Merom, gaxha de ra ridá nisa, málasi bedandá Josué ne ca hombre ni rié lu guerra ne bicaalucaʼ laacabe.
8 Bisaana Jehová laacabe lu náʼ guidxi Israel, biiti ca israelita laacabe ne guzanándacaʼ laacabe dede Sidón guidxi roʼ que, Misrefot-Maim ne dede ra nuu valle* stiʼ Mizpé ladu rindani gubidxa; biiti ca israelita guiráʼ xixécabe, nin tobi qué nilá.
9 Para biʼniʼ Josué ni gudxi Jehová laa: bininá ñee ca caballu stícabe ne bicaa guí guiráʼ carru stícabe.
10 Laaca biguetaʼ Josué, gucuaa guidxi Hazor ne biitibe rey stini né espada, purtiʼ lade guiráʼ ca guidxi que Hazor nga guidxi jma nadipaʼ.
11 Biiticabe guiráʼ ca binni nabeza raqué né espada ne zaqué binitilúcabe guidxi que. Nin tobi qué nilá. De raqué bicaaguibe guidxi Hazor.
12 Gucuaa Josué guiráʼ guidxi stiʼ ca rey riʼ ne biitibe laacaʼ né espada. Binduuxebe laacaʼ, casi maca biʼniʼ mandar Moisés, siervu stiʼ Jehová,* gaca ni.
13 Qué nucaa guí guidxi Israel nin ti guidxi ni nuu lu loma, guidxi Hazor si bicaa guí Josué.
14 Biaanané ca israelita guiráʼ ni gúxhacabe ca guidxi que ne guiráʼ maniʼ sticaʼ. Peru biiticabe guiráʼ ca binni que né espada. Nin ti binni qué nilá.
15 Laaca ni gudxi Jehová Moisés, siervu stiʼ, ngaca biʼniʼ mandar Moisés guni Josué ne zaqué biʼniʼ Josué ni. Bíʼnibe guiráʼ xixé cosa ni gudxi Jehová Moisés naquiiñeʼ gaca.
16 Gucuaa Josué guidubi layú riʼ, ca layú ni nuu lade dani, guidubi naca Négueb, guiráʼ layú stiʼ Gosén, Sefelá, Arabá ne ca layú ni nuu lade dani ne ñee dani stiʼ Israel,
17 laaca gucuaabe ca layú ni nuu lu dani Halac, ni nuu gaxha de Seír, hasta Baal-Gad, ni nuu ndaaniʼ valle stiʼ Líbano, ñee dani Hermón; gunaazebe guiráʼ rey stiʼ ca lugar riʼ ne biitibe laacaʼ.
18 Xadxí gudindené Josué guiráʼ ca rey riʼ.
19 Ninruʼ stiʼ guidxi qué niná ñuniné ca israelita ti acuerdu para chuʼ paz entre laacaʼ, ca heveu si ni nabeza Gabaón biʼniʼ ni. Xcaadxi guidxi que la? gupa xidé gudinde ca israelita para gucuaacaʼ cani.
20 Jehová nga biquidxi ladxidóʼcabe para chitindenécabe guidxi Israel ti ganda gunitilube guiráʼ xixecaʼ, nin ti guidxi qué ñabe. Naquiiñeʼ guinitilú guirácani, casi biʼniʼ mandar Jehová Moisés.
21 Tiempu que nga binduuxeʼ Josué ca anaquim ni nabeza lade dani, ca de Hebrón, ca de Debir ne ca de Anab, guiráʼ ca ni nabeza lade ca dani stiʼ Judá ne lade ca dani stiʼ Israel. Binitilú Josué laacabe ne xquídxicabe.
22 Nin ti anaquim qué ñaana lu layú stiʼ ca israelita. Biaanacabe Gaza, Gat ne Asdod.
23 Zaqué nga gucuaa Josué ca layú que, casi modo biʼniʼ prometer Jehová Moisés. De raqué bidii Josué ca layú que guidxi Israel casi herencia para guiaaziʼ ni lu ca tribu que biaʼ raca tocar cada tobi. Ne maʼ qué ñuuruʼ guerra ca lugar que.
Nota
^ O «Arabá».
^ O «Zugaluʼ tendón ñee».
^ Laani nga ti lugar ra napampa ni nuu lade dani.
^ O «hombre ni biʼniʼ xhiiñaʼ Jehová».
