Josué 13:1-33
13 Yanna, maʼ huaniisi Josué ne maʼ nagola. Ngue runi gudxi Jehová laabe: «Maʼ huaniisiluʼ ne maʼ zigólaluʼ, peru nuuruʼ stale layú ni chiguicaatu.
2 Ndiʼ nga ca layú ni cayaadxaʼ guicaatu: guiráʼ layú stiʼ ca filisteu ne stiʼ ca guesurita
3 (dede ra nuu ti náʼ guiiguʼ Nilo* ni nuu ladu rindani gubidxa* de Egipto hasta ra nuu frontera stiʼ Ecrón, ladu guiaʼ, laacani nga ca layú stiʼ ca cananeu), dede ra nuu ca layú stiʼ gaayuʼ hombre ni runi mandar ca filisteu: ca gazeu, ca asdodita, ca asquelonita, ca guitita ne ca ecronita, ca layú stiʼ ca avim,
4 ladu gueteʼ; guidubi naca layú stiʼ ca cananeu; Meará, ni naca layú stiʼ ca sidonio, dede Afec, hasta ra nuu frontera stiʼ ca amorreu;
5 ne ca layú stiʼ ca guebalita ne guidubi naca Líbano, ladu rindani gubidxa, dede Baal-Gad, ni nuu ñee dani Hermón, hasta Lebó-Hamat;*
6 guiráʼ ca ni nabeza lade dani dede ra nuu Líbano hasta Misrefot-Maim, ne guiráʼ ca sidonio. Zaxhaʼ laacabe ca layú stícabe para guicaa ca israelita. Ni caquiiñeʼ si gúniluʼ nga quíʼziluʼ layú ca casi herencia lu guidxi Israel, casi maca bineʼ mandar lii gúniluʼ.
7 Yanna, gudiiziʼ layú riʼ lu gaʼ tribu ne lu galaa tribu stiʼ Manasés».
8 Sti galaa tribu ca laaca maʼ gucuaa herencia stiʼ, zaqueca ca rubenita ne ca gadita maʼ gucuaacaʼ herencia bidii Moisés laacaʼ ladu rindani gubidxa de guiiguʼ Jordán, purtiʼ maca bidii Moisés, siervu stiʼ Jehová,* laacabe ca layú riʼ:
9 dede Aroer, ni nuu ruaa valle* stiʼ Arnón, ne guidxi ni nuu galaa valle ca ne guiráʼ ca lugar ra nasoo ne planu stiʼ Medebá hasta Dibón;
10 ne guiráʼ ca guidxi stiʼ Sehón, rey stiʼ ca amorreu ni biʼniʼ mandar Hesbón, hasta ra nuu frontera stiʼ ca ammonita;
11 laaca gucuaacabe Galaad ne ca layú stiʼ ca guesurita ne ca maacatita, guidubi naca dani Hermón ne guidubi naca Basán hasta Salecá;
12 guidubi naca ra runi mandar rey Og de Basán, ni biʼniʼ mandar Astarot ne Edréi. (laabe nga tobi de ca últimu hombre de refaím). Bi’ni’ ganar Moisés laacabe ne gulee laacabe de raqué.
13 Peru qué nibee ca israelita que ca guesurita ne ca maacatita, nga runi dede yanna nabeza Guesur ne Maacat galahuiʼ guidxi Israel.
14 Tribu si stiʼ ca levita nga qué nudii Moisés laacaʼ ti herencia. Herencia sticaʼ nga ca ofrenda ni raʼtaʼ lu bele para Jehová, Dios stiʼ Israel, casi biʼniʼ prometerbe laacaʼ.
15 Para bidii Moisés ti herencia tribu stiʼ ca rubenita, según biaʼ familia sticaʼ,
16 Gucuaacabe dede Aroer, ni nuu ruaa valle stiʼ Arnón, ne gucuaacabe guidxi ni nuu galaa valle ca ne guiráʼ lugar ra nasoo ne planu ni nuu cueʼ Medebá;
17 Hesbón ne guiráʼ ca guidxihuiiniʼ stini, ca ni nuu ca lugar ra nasoo ne planu, Dibón, Bamot-Baal, Bet-Baal-Meón,
18 Jáhaz, Quedemot, Mefaat,
19 Quiryataim, Sibmá, Zéret-Sáhar ni nuu lu dani ra nuu valle,
20 Bet-Peor, ñee dani Pisgá, Bet-Jesimot,
21 guiráʼ ca guidxi ni nuu lugar ra nasoo ne planu, ne guiráʼ ra runi mandar Sehón, rey stiʼ ca amorreu ni biʼniʼ mandar Hesbón. Binitilú Moisés rey Sehón ne ca xaíque stiʼ ca madianita, ca ni biʼniʼ mandarbe: Eví, Réquem, Zur, Hur ne Reba, laacabe nga ca ni guleza lu ca layú que.
22 Lade ca binni ni biiti ca israelita né espada nuu Balaam, hombre ni runi adivinar xiiñiʼ Beor que.
23 Frontera stiʼ ca rubenita nga guiiguʼ Jordán; guiráʼ layú riʼ, ca guidxi stini ne ca guidxihuiiniʼ nuu luni, laacani nga herencia ni gucuaa ca rubenita según biaʼ familia sticaʼ.
24 Laaca bidii Moisés ti herencia tribu stiʼ Gad, según biaʼ familia stiʼ ca gadita,
25 gucuaacabe Jazer, guiráʼ layú stiʼ Galaad ne galaa layú stiʼ ca ammonita hasta Aroer, ni nuu frente de Rabá;
26 ne dede Hesbón hasta Ramat-Mizpé ne Betonim, ne dede Mahanaim hasta ra nuu frontera stiʼ Debir;
27 ne ca ni nuu ndaaniʼ valle, Bet-Haram, Bet-Nimrá, Sucot ne Zafón, ndiʼ nga xcaadxi layú ra biʼniʼ mandar rey Sehón de Hesbón, ne frontera stícani nga guiiguʼ Jordán, ladu gueteʼ de nisadóʼ Kinéret,* ne ladu rindani gubidxa de guiiguʼ Jordán.
28 Ca guidxi ne ca guidxihuiiniʼ ni nuu lu ca layú riʼ nga herencia ni gucuaa ca gadita, según biaʼ familia sticaʼ.
29 Laaca bidii Moisés ti herencia galaa tribu stiʼ Manasés, según biaʼ familia sticaʼ.
30 Gucuaacabe dede ra nuu Mahanaim ne guidubi naca Basán, guiráʼ ra biʼniʼ mandar rey Og de Basán ne guiráʼ ca guidxihuiiniʼ de yoo de lari stiʼ Jaír, ni nuu Basán, biaʼsi 60 guidxihuiiniʼ.
31 Peru ca xiiñiʼ Makir, xiiñiʼ Manasés, gucuaacaʼ galaa de Galaad, zaqueca Astarot ne Edréi, ca guidxi ra biʼniʼ mandar rey Og ni nuu Basán, ndiʼ nga ni gucuaa galaa de ca xiiñiʼ Makir según biaʼ familia sticaʼ.
32 Ndiʼ nga ca herencia ni bidii Moisés laacabe lu pampa stiʼ Moab, chericaʼ guiiguʼ Jordán, ladu rindani gubidxa de Jericó.
33 Peru qué nudii Moisés nin ti herencia tribu stiʼ ca levita. Purtiʼ Jehová, Dios stiʼ Israel, nga herencia stícabe, casi maca biʼniʼ prometer laacabe.
Nota
^ O «dede ra nuu Sihor».
^ Lit. «frente».
^ O «entrada stiʼ Hamat».
^ O «hombre ni biʼniʼ xhiiñaʼ Jehová».
^ Laani nga ti lugar ra napampa ni nuu lade dani.
^ Laca laani nga laguna stiʼ Genesaret o nisadóʼ stiʼ Galilea.
