Josué 16:1-10
16 Ne layú ni guca tocar ca xiiñiʼ José ora biree suerte* que, rugaandani dede ra nuu guiiguʼ Jordán neza Jericó, hasta ra nuu ca guiiguʼ ni nuu Jericó, zeni lu desiertu stiʼ Jericó ne riguíʼbani lu ca dani stiʼ Betel.
2 Ne rugaandani guidubi naca Betel ni nuu ndaaniʼ guidxi Luz, ne zéruni dede lu frontera stiʼ ca arkita ni nuu Atarot,
3 riéteni lu frontera stiʼ ca jafletita, ladu riaaziʼ gubidxa, ne rugaandani hasta lu frontera stiʼ Bet-Horón ni nuu xagueteʼ ne Guézer, ne rilúxeni ruaa nisadóʼ.
4 Zacá nga gucuaa ca xiiñiʼ José —Manasés ne Efraín— ca layú sticaʼ.
5 Ndiʼ nga frontera stiʼ ca xiiñiʼ Efraín según biaʼ familia sticaʼ: frontera stícabe neza ra rindani gubidxa nga Atarot-Addar, ne zeni hasta Bet-Horón ni nuu luguiáʼ,
6 ne zeruʼ frontera riʼ dede ruaa nisadóʼ. Nuu Micmetat ladu guiaʼ, ne rudii frontera riʼ vuelta ladu rindani gubidxa neza ra nuu Taanat-Siló, ne ridíʼdini Janóah, ladu rindani gubidxa.
7 De Janóah ziyéteni Atarot ne Naará, rindani hasta Jericó ne rilúxeni ra nuu guiiguʼ Jordán.
8 De Tapúah, zeruʼ frontera riʼ ladu riaaziʼ gubidxa, ra nuu neza nisa stiʼ Caná, ne rilúxeni ruaa nisadóʼ. Nga nga herencia ni gucuaa tribu stiʼ Efraín según biaʼ familia sticaʼ.
9 Laaca gucuaa ca xiiñiʼ Efraín xcaadxi guidxi —guiráʼ ca guidxi riʼ ne ca guidxihuiiniʼ stícani— ni nuu lade herencia ni gucuaa tribu stiʼ Manasés.
10 Peru qué nibeecabe ca cananeu ni nabeza Guézer; nga runi dede yanna nabeza ca cananeu lade tribu stiʼ Efraín ne rúnicaʼ dxiiñaʼ nadipaʼ para laacabe.
