Josué 18:1-28
18 Para bidagulisaa guidubi guidxi Israel Siló ne raqué bizuhuaacabe yoo ra raca reunión* purtiʼ maʼ gucuaacabe layú que.
2 Peru nuuruʼ xcadxe tribu lade ca israelita ni caʼruʼ guicaa herencia stiʼ.
3 Para ná Josué rabi ca israelita: «¿Xi cabézatu para guicaatu layú ni maʼ bidii Jehová, Dios stiʼ ca bixhozebiidatu,* laatu pue?
4 Lacuí chonna hombre de cada tribu. Chiguseendaʼ laacabe para chiguuyacabe layú ca ne maca ziyúnicabe mapa stini* biaʼ ra chiguicaa cada tobi. Ne guibiguétacabe ra nuaaʼ guilúxesicabe.
5 Naquiiñeʼ guindaatu layú ca gadxe ndaa. Ziaana Judá lu layú stiʼ, ladu gueteʼ, ne ca xiiñiʼ José ziaanacaʼ lu layú sticaʼ, ladu guiaʼ.
6 Ne laatu la? laguni mapa stiʼ layú ca ne laguindaa ni gadxe ndaa. Guilúxesitu, gueedanetu ni ra nuaaʼ ti cueeʼ suerte* nezalú Jehová, Dios stinu, para guihuinni paraa chiguicaatu.
7 Peru qué zacaa ca levita nin ti ndaa layú ládetu, purtiʼ herencia stícabe nga gácacabe sacerdote stiʼ Jehová; ne Gad, Rubén ne galaa tribu stiʼ Manasés maʼ gucuaacaʼ herencia sticaʼ ladu rindani gubidxa de guiiguʼ Jordán, ni bidii Moisés, siervu stiʼ Jehová,* laacaʼ».
8 De raqué guyuu ca hombre que listu para checaʼ, ne biʼniʼ mandar Josué ca ni chiguni mapa stiʼ layú que: «Laché, lachiguuya layú ca, laguni mapa stini ne laguibiguetaʼ ra nuaaʼ ti cueeʼ suerte nezalú Jehová, raríʼ ndaaniʼ guidxi Siló, para guihuinni paraa guicaatu».
9 Para biree ca hombre que zecaʼ, guyecaʼ lu layú que, bíʼnicaʼ mapa stini ne gundaacaʼ ni gadxe ndaa según biaʼ ca guidxi nuu raqué, ne bicaacaʼ guirani lu ti libru. Biluxesícabe, biguétacabe ra nuu Josué, ra campamentu nuu Siló.
10 De raqué, ndaaniʼ guidxi Siló, gulee Josué suerte nezalú Jehová para guihuinni paraa chiguicaacabe. Raqué nga gudiiziʼ Josué layú que lu ca israelita según biaʼ guca tocar laacaʼ.
11 Ra biree suerte que, guca tocar ti ndaa layú tribu stiʼ Benjamín según biaʼ familia sticaʼ, ne layú ni gucuaacabe nuuni galaa layú ni gucuaa ca xiiñiʼ Judá ne ca xiiñiʼ José.
12 Ladu guiaʼ, ruzulú frontera stícabe ra nuu guiiguʼ Jordán, ne zeʼ frontera riʼ guriá guidxi Jericó, ladu guiaʼ. Ne ziguíʼbani lu ca dani ni nuu ladu riaaziʼ gubidxa ne rindani hasta lu desiertu stiʼ Bet-Aven.
13 Ne zeruʼ frontera riʼ de ra nuu guriá guidxi Luz, ladu gueteʼ, laca laani nga Betel, ne ziyete frontera riʼ Atarot-Addar lu dani ni nuu Bet-Horón ni nuu xagueteʼ.
14 Ne zeruʼ frontera riʼ ladu riaaziʼ gubidxa ne rudiini vuelta ladu gueteʼ, ra nuu dani ni nuu neza Bet-Horón, ladu gueteʼ; rilúxeni ra nuu Quiryat-Baal, laca laani nga Quiryat-Jearim, ti guidxi stiʼ Judá. Ndiʼ nga frontera stícabe ladu riaaziʼ gubidxa.
15 Dxaaganécabe Quiryat-Jearim ladu gueteʼ, ne zeʼ frontera riʼ neza ladu riaaziʼ gubidxa; rindani hasta ti lugar ra ridá nisa láʼ Neftóah.
16 Ziyete frontera riʼ lu dani cueʼ valle* stiʼ Xiiñiʼ Hinón, ni nuu ladu guiaʼ de valle stiʼ Refaím, ne riéteni ndaaniʼ valle stiʼ Hinón, laaca ridíʼdini ladu gueteʼ de ra nuu ca jebuseu, ne riéteni En-Roguel.
17 Ne zeruʼ frontera riʼ ladu guiaʼ, rindani hasta En-Semes ne ridíʼdini Guelilot, ni nuu frente de ti lugar ni rábicabe subida de Adumim, ne ziyéteni ra nuu guié stiʼ Bohán, xiiñiʼ Rubén.
18 Ne zeruʼ frontera riʼ ladu guiaʼ frente de Arabá ne ridíʼdini Arabá.
19 Laaca zeruʼ frontera riʼ de Bet-Hoglá ne rilúxeni ruaa mar Salado,* squina ladu gueteʼ de guiiguʼ Jordán. Nga nga frontera stícabe ladu gueteʼ.
20 Ne frontera stícabe ni nuu ladu rindani gubidxa nga guiiguʼ Jordán. Ndiʼ nga herencia ni gucuaa ca xiiñiʼ Benjamín según biaʼ familia sticaʼ, ne ca frontera stícabe.
21 Ca guidxi ni gucuaa tribu stiʼ Benjamín según biaʼ familia sticaʼ nga: Jericó, Bet-Hoglá, Émec-Queziz,
22 Bet-Arabá, Zemaraim, Betel,
23 Avim, Pará, Ofrá
24 Kefar-Amoní, Ofní ne Gueba: biaʼsi 12 guidxi ne ca guidxihuiiniʼ stícani.
25 Gabaón, Ramá, Beerot,
26 Mizpé, Kefirá, Mozá,
27 Réquem, Irpeel, Taralá,
28 Zelá, Ha-Élef, Jebusí —laca laani nga Jerusalén—, Guibeá ne Quiryat: biaʼsi 14 guidxi ne ca guidxihuiiniʼ stícani.
Nga nga herencia ni gucuaa ca xiiñiʼ Benjamín según biaʼ familia sticaʼ.
Nota
^ O «ca familia stitu ni bibani dxiqué».
^ O «maca zigucaacabe».
^ O «hombre ni biʼniʼ xhiiñaʼ Jehová».
^ Laani nga ti lugar ra napampa ni nuu lade dani.
^ Laca laani nga mar Muerto.
