Josué 19:1-51
19 Ne ra guleecabe suerte,* guiropa suerte que biábani luguiáʼ Simeón, tribu stiʼ Simeón según biaʼ familia sticaʼ. Ne herencia ni gucuaacabe nuuni lu herencia stiʼ Judá.
2 Herencia stícabe nga Beer-Seba ne Seba, Moladá,
3 Hazar-Sual, Balá, Ézem,
4 Eltolad, Betul, Hormá,
5 Ziclag, Bet-Marcabot, Hazar-Susá,
6 Bet-Lebaot ne Saruhén: bia’si 13 guidxi ne ca guidxihuiiniʼ stícani;
7 Ain, Rimón, Éter ne Asán: tapa guidxi ne ca guidxihuiiniʼ stícani;
8 Ne laaca gucuaacabe ca guidxihuiiniʼ ni dxaaga ca guidxi riʼ hasta Baalat-Beer, Ramá ni nuu ladu gueteʼ. Nga nga herencia ni gucuaa tribu stiʼ Simeón según biaʼ familia sticaʼ.
9 De lu layú ni guca tocar Judá nga biree herencia stiʼ ca xiiñiʼ Simeón, purtiʼ naro’ba’ layú ni guca tocar Judá. Lu herencia stícabe nga nuu layú ni gucuaa ca xiiñiʼ Simeón.
10 Ne guionna suerte que bireeni luguiáʼ ca xiiñiʼ Zabulón según biaʼ familia sticaʼ, ne rindá frontera stícabe hasta Sarid.
11 Ne zeʼ frontera stícabe ladu riaaziʼ gubidxa ra nuu Mareal ne rindani Dabéset ne ridí’dini ra nuu ti neza nisa ni nuu frente de Jocneam.
12 Ne zeni dede Sarid, ladu rindani gubidxa, hasta lu frontera stiʼ Kislot-Tabor ne rireeni Daberat, de racá riguí’bani Jafía.
13 Ne zéruni ladu rindani gubidxa neza ra nuu Gat-Héfer, Et-Cazín, ne rireeni Rimón, ne zéruni hasta Neá.
14 Ne rudii frontera riʼ vuelta ladu guiaʼ, ridíʼdini Hanatón ne rilúxeni ndaaniʼ valle* stiʼ Iftá-El,
15 ne laaca rugaandani Catat, Nahalal, Simrón, Idalá ne Belén: biaʼsi 12 guidxi ne ca guidxihuiiniʼ stícani.
16 Nga nga herencia stiʼ ca xiiñiʼ Zabulón según biaʼ familia sticaʼ. Ca guidxi riʼ nga gucuaacabe ne ca guidxihuiiniʼ stícani.
17 Ne guidapa suerte que guca tocar ni ca xiiñiʼ Isacar, según biaʼ familia sticaʼ.
18 Ne rindá frontera stícabe Jezreel, Kesulot, Sunem,
19 Hafaraim, Shion, Anaharat,
20 Rabit, Quisión, Ébez,
21 Rémet, En-Ganim, En-Hadá ne Bet-Pazez.
22 Ne rindá frontera riʼ de lu dani Tabor ne ra nuu Sahazuma ne Bet-Semes, ne rilúxeni ra nuu guiiguʼ Jordán: biaʼsi 16 guidxi ne ca guidxihuiiniʼ stícani.
23 Nga nga herencia ni gucuaa tribu stiʼ Isacar según biaʼ familia sticaʼ. Ca guidxi riʼ nga gucuaacabe ne ca guidxihuiiniʼ stícani.
24 Ne ra bizaa gaayu’ suerte que, biábani luguiáʼ tribu stiʼ Aser según biaʼ familia sticaʼ.
25 Ne frontera stícabe nga Helcat, Halí, Beten, Acsaf,
26 Alamélec, Amad ne Misal. Ne ladu riaazi’ gubidxa la? rindá frontera ri’ ra nuu dani Carmelo ne ra nuu Sihor-Libnat,
27 ne zeni ladu rindani gubidxa, ra nuu Bet-Dagón ne rindani ra dxaaganécabe Zabulón ne rugaandani ladu guiaʼ de valle stiʼ Iftá-El, ra nuu Bet-Émec ne Neiel, ne zéruni ladu bigaʼ* de Cabul,
28 ne ridí’dini Ebrón, Rehob, Hamón ne Caná hasta Sidón Guidxi ro’ que.
29 Ne ze’ frontera que Ramá ne rindani Tiro, ti guidxi nadipaʼ,* ne zéruni Hosá ne rilúxeni ruaa nisadóʼ, ra nuu Aczib,
30 Umá, Afec ne Rehob: biaʼsi 22 guidxi ne ca guidxihuiiniʼ stícani.
31 Nga nga herencia ni gucuaa tribu stiʼ Aser según biaʼ familia sticaʼ. Ca guidxi riʼ nga gucuaacabe ne ca guidxihuiiniʼ stícani.
32 Ne ra bizaa xhoopaʼ suerte que, bireeni luguiáʼ tribu stiʼ Neftalí, ca xiiñiʼ Neftalí según biaʼ familia sticaʼ.
33 Ne ruzulú frontera stícabe Hélef, dede ra nuu yaga naroʼbaʼ stiʼ Zaananim, ne ridí’dini Adamí-Néqueb ne Jabneel ne rindani hasta Lacum, ne rilúxeni ruaa guiiguʼ Jordán.
34 Ne zeʼ frontera riʼ ladu riaaziʼ gubidxa ra nuu Aznot-Tabor ne zéruni hasta Hucoc ne rindani ra dxaaganécabe Zabulón, ladu gueteʼ, ne ra dxaaganécabe Aser, ladu riaaziʼ gubidxa, ne ra dxaaganécabe Judá, ra nuu guiiguʼ Jordán, ladu rindani gubidxa.
35 Ne ca guidxi nadipaʼ* ni gucuaacabe nga: Zidim, Zer, Hammat, Racat, Kinéret,
36 Adamá, Ramá, Hazor,
37 Quedes, Edréi, En-Hazor,
38 Yirón, Migdal-El, Horem, Bet-Anat ne Bet-Semes: biaʼsi 19 guidxi ne ca guidxihuiiniʼ stícani.
39 Nga nga herencia ni gucuaa tribu stiʼ Neftalí según biaʼ familia sticaʼ; ca guidxi riʼ nga gucuaacabe ne ca guidxihuiiniʼ stícani.
40 Ne ra bizaa gadxe suerte que, bireeni luguiáʼ tribu stiʼ Dan según biaʼ familia sticaʼ.
41 Ne frontera stiʼ herencia stícabe nga Zorá, Estaol, Ir-Semes,
42 Saalabín, Ayalón, Itlá,
43 Elón, Timná, Ecrón,
44 Eltequé, Guibetón, Baalat,
45 Jehúd, Bene-Berac, Gat-Rimón,
46 Me-Jarcón ne Racón, didi frontera riʼ frente de Jope.
47 Peru nahuiiniʼ layú gucuaa ca xiiñiʼ Dan para laacaʼ. Ngue runi guyécabe* para tindenécabe guidxi Lésem, biʼniʼ ganárcabe ni ne binduuxecabe ni né espada. De raqué biaanacabe lugar que ne gulézacabe raqué. Laaca bichaacabe lani* ne gulee lácabe ni Dan, purtiʼ Dan nga láʼ bixhozebiidacabe.
48 Nga nga herencia ni gucuaa tribu stiʼ Dan según biaʼ familia sticaʼ. Ca guidxi riʼ nga gucuaacabe ne ca guidxihuiiniʼ stícani.
49 Zaqué nga biluxe biaaziʼ* ca layú que lu ca israelita ne cada tobi gucuaa herencia stiʼ. De raqué bidii ca israelita ti herencia Josué xiiñiʼ Nun galahuiʼ de laacaʼ.
50 Casi biʼniʼ mandar Jehová, bidiicabe laabe Timnat-Sérah, nuuni lade ca dani stiʼ Efraín, purtiʼ laapebe gunábabe ni. Biʼniʼ chaahuibe guidxi que ne raqué gulézabe.
51 Nga nga ca herencia ni gudiiziʼ sacerdote Eleazar, Josué xiiñiʼ Nun ne ca xaíque stiʼ ca familia stiʼ ca tribu stiʼ Israel ndaaniʼ guidxi Siló. Ne para gudiizicabe ni, guleecabe suerte nezalú Jehová ra nuu yoo ra raca reunión.* Zaqué nga biluxe gudiizicabe guidubi naca layú que.
Nota
^ Laani nga ti lugar ra napampa ni nuu lade dani.
^ O «izquierdo».
^ O «ti guidxi ni napa muru guidubi vuelta».
^ O «guidxi ni napa muru guidubi vuelta».
^ O «gudxíʼbacabe».
^ O «xlani».
^ O «biaazeʼ».
