Josué 20:1-9
-
Guidxi ra zanda guilá ca ni guuti (1-9)
20 De raqué gudxi Jehová Josué:
2 «Ndiʼ nga ni naquiiñeʼ gábiluʼ ca israelita: “Lacuí caadxi guidxi ra zanda guilatu casi maca gudxeʼ Moisés,
3 ti ora guuti tuuxa ti binni ne cadi laa peʼ biyubi guni ni la?* caquiiñeʼ guxooñeʼ ndaaniʼ ca guidxi riʼ. Ndiʼ nga ca guidxi ra naquiiñeʼ chetu para guilatu de binni ni nanda guquixe rini stiʼ binni ni guti ca.
4 Naquiiñeʼ cuezadxibe ra puertaʼ guidxi ca ne gábibe ca hombre ni napa autoridad ndaaniʼ guidxi ca xi bizaacabe. Ne ca hombre riʼ naquiiñeʼ guidxaagalucaʼ laabe ne gudiicaʼ laabe ti lugar ra guiaanabe ti cuézabe ndaaniʼ guidxi ca.
5 Ne pa sananda binni ni racalaʼdxiʼ guquixe rini ca laabe la? cadi naquiiñeʼ gudiitu laabe, purtiʼ cadi laapebe biyúbibe guutibe binni que* ne cadi bíʼnibe ni purtiʼ nanaláʼdxibe laa.
6 Naquiiñeʼ cuézabe ndaaniʼ guidxi ca dede ora chebe nezalú ca juez para guni juzgarcaʼ laabe, ne naquiiñeʼ guiaanabe ndaaniʼ guidxi ca dede ora maʼ guti sumo sacerdote ni nuu tiempu ca. Oracaruʼ nga zanda guibiguetaʼ binni ni biiti ca xquidxi ne cueza ra lidxi”».
7 Ne ndiʼ nga ca guidxi ni gulícabe: Quedes —ni nuu Galilea, lade dani stiʼ Neftalí—, Siquem —ni nuu lade dani stiʼ Efraín—, ne Quiryat-Arbá, laca laani nga Hebrón —ni nuu lade dani stiʼ Judá—.
8 Ne lu región stiʼ Jordán, ladu rindani gubidxa de Jericó gulícabe Bézer —ni nuu lu desiertu, ra nuu ca lugar nasoo ne planu stiʼ tribu stiʼ Rubén—, Ramot —ni nuu Galaad, ni nuu lu layú ni gucuaa tribu stiʼ Gad—, ne Golán —ni nuu Basán, ni nuu lu layú ni gucuaa tribu stiʼ Manasés—.
9 Nga nga ca guidxi ni bibí para ca israelita ne para ca ni naca de sti guidxi ni nabeza ládecabe. Ti zacá, pa ti binni gueeda guuti tuuxa ne cadi laa peʼ biyubi guni ni la? zanda guxooñeʼ ndaaniʼ ca guidxi riʼ ne zacá cadi guuti binni ni racalaʼdxiʼ guquixe rini ca laabe, ante guni juzgar ca juez stiʼ guidxi ca laabe.
