Josué 4:1-24
-
Gudíxhecabe doce guié para guietenaláʼdxicabe ni bizaaca (1-24)
4 Casi biluxe gudiʼdiʼ guidubi naca guidxi que ndaaniʼ guiiguʼ Jordán, ná Jehová rabi Josué:
2 «Lacuí 12 hombre de ndaaniʼ guidxi riʼ, ti hombre pur cada tribu,
3 ne lagabi laacabe: “Lagutopa 12 guié ni nuu galaa guiiguʼ Jordán ra bizuhuaadxí ca sacerdote ca. Lachiné cani ne laquixhe cani lugar ra chiguiaanatu yanna gueelaʼ”».
4 Para biseendacaa Josué 12 hombre ni gulí de lade ca israelita, ti hombre de cada tribu,
5 ne gudxi Josué laacabe: «Laché galahuiʼ guiiguʼ Jordán, nezalú Arca stiʼ Jehová, Dios stitu, ne cada tobi de laatu gudxiibaʼ yanni ti guié, ti guié pur cada tribu stiʼ Israel,
6 para iquiiñetu cani casi ti señal. Pa chuʼ dxi guinabadiidxaʼ ca xiiñitu “¿Xiñee nuu ca guié riʼ raríʼ pue?”,
7 naquiiñeʼ gábitu laacabe “Nuucani raríʼ purtiʼ ora gudiʼdinécabe arca stiʼ acuerdu* stiʼ Jehová ndaaniʼ guiiguʼ Jordán, biaanadxí nisa stiʼ guiiguʼ que de guxooñeʼ nezaluni. Ne ca guié riʼ, siempre zusietenaláʼdxicani guidxi Israel ni bizaaca que”».
8 Para biʼniʼ ca israelita que casi peʼ modo gudxi Josué laacaʼ. Bitópacabe 12 guié galaa guiiguʼ Jordán —casi peʼ gudxi Jehová Josué—, tobi pur cada tribu stiʼ ca israelita. Yenécabe ca guié que lugar ra chiguiaanacabe gueelaʼ que ne raqué gudíxhecabe cani.
9 Laaca gudixhe Josué 12 guié galaa guiiguʼ Jordán, lugar ra bizuhuaa ñee ca sacerdote ni ziné arca stiʼ acuerdu que, ne dede yanna raqué nuu ca guié que.
10 Bizuhuaa ca sacerdote ni ziné Arca que galaa guiiguʼ Jordán dede ora biluxe biʼniʼ guidxi que guiráʼ ni gunabaʼ Jehová Josué gúnicabe, casi peʼ modo gudxi Moisés ni Josué. Laga cayaca ndiʼ, nagueenda gudiʼdiʼ guidxi que ndaaniʼ guiiguʼ Jordán.
11 Gudiʼdiʼ si guidubi guidxi que, oraqueruʼ gudiʼdiʼ Arca stiʼ Jehová ne ca sacerdote que, laga cayuuyaʼ guidubi guidxi que laacabe.
12 Ne ca rubenita, ca gadita ne galaa tribu stiʼ Manasés guzanírucaʼ lu xcaadxi israelita que casi ti ejércitu, casi peʼ modo biʼniʼ mandar Moisés gúnicabe ni.
13 Biaʼ cuarenta mil soldadu nuu listu para lu guerra gudíʼdicaʼ nezalú Jehová ne zecaʼ neza lu desiertu stiʼ Jericó.
14 Dxi que bisisaca Jehová Josué nezalú guidubi guidxi Israel ne nabé biʼniʼ respetárcabe* laabe biaʼ dxi bibánibe, cásica modo biʼniʼ respetárcabe Moisés.
15 De raqué gudxi Jehová Josué:
16 «Gunabaʼ ca sacerdote ni ziné arca ra riaapaʼ Testimonio* que guireecaʼ de ndaaniʼ guiiguʼ Jordán».
17 Para gudxi Josué ca sacerdote que: «Laguiree de ndaaniʼ guiiguʼ Jordán».
18 Ora biree ca sacerdote ni ziné arca stiʼ acuerdu stiʼ Jehová de ndaaniʼ guiiguʼ Jordán ne bizuhuaañeecaʼ ra nabidxi, biguetaʼ nisa stiʼ guiiguʼ Jordán lugar stiʼ, ne biree guiiguʼ que casi rireeni ca dxi que.
19 Gudiʼdiʼ guidxi que ndaaniʼ guiiguʼ Jordán ra bizaa chii gubidxa stiʼ primé beeu ne gudíxhecabe campamentu stícabe Guilgal, lu frontera stiʼ Jericó ni nuu ladu rindani gubidxa.
20 Ne 12 guié ni gucuaacabe de ndaaniʼ guiiguʼ Jordán que, gudixhe Josué cani Guilgal.
21 Ne gúdxibe ca israelita: «Ora guinabadiidxaʼ ca xiiñitu “¿Xiñee nuu ca guié riʼ raríʼ pue?”,
22 napa xidé gábitu ca xiiñitu “Gudiʼdiʼ guidxi Israel ra nabidxi ndaaniʼ guiiguʼ Jordán
23 dxi bicuiidxiʼ Jehová, Dios stitu, nisa stini nezalúcabe dede ora gudiʼdiʼ guirácabe, cásica dxi bicuiidxiʼ Jehová, Dios stitu, ra gudídidu ndaaniʼ nisadóʼ Xiñáʼ que.
24 Bíʼnibe ni para ganna guiráʼ guidxi ni nuu lu guidubi guidxilayú pabiáʼ napa náʼ Jehová poder ne para cadi gusaana de guidxíbitu Jehová, Dios stitu”».
Nota
^ Lit. «bidxíbicabe».
