Josué 8:1-35
8 Para gudxi Jehová Josué: «Cadi guidxíbiluʼ. Yené guiráʼ soldadu ca ne laquiʼbaʼ para tindenetu guidxi Hai. Purtiʼ maʼ bidieeʼ lii rey stiʼ guidxi Hai, ca binni ni nabeza racá, guidxi ca ne layú stícabe.
2 Cásica bíʼniluʼ guidxi Jericó ne rey stiʼ, zaqueca biʼniʼ né guidxi Hai ne rey sti’. Peru biaje riʼ zanda guiaananetu guiráʼ ni gáxhatu laacabe ne ca maniʼ stícabe. Gudixhe ti trampa para laacabe deche guidxi ca».
3 Para biree Josué ne guiráʼ ca soldadu que zitindenecaʼ guidxi Hai. Gulí Josué treinta mil soldadu nadipaʼ ne biseendabe laacaʼ huaxhinni.
4 Ne biʼniʼ mandarbe laacaʼ: «Lagucaachilú deche guidxi ca. Cadi guixéletu de laani ne lachuu listu.
5 Naa ne ca xpinneʼ zadxíñadu guidxi ca. Ne ora guireecabe para gucaalúcabe laadu, cásica bíʼnicabe nase que, zuxóʼñedu.
6 Ne ora sanándacabe laadu, zudiʼdu lugar guixélecabe de guidxi ca, purtiʼ zaníʼ íquecabe: “Cuxooñelú ca israelita de laanu casi bíʼnicaʼ nase que”. Ne zudiʼdu lugar sanándacabe laadu.
7 Óraque naquiiñeʼ guireetu de ra nucaachilutu ne guicaatu guidxi ca, purtiʼ zudii Jehová, Dios stitu, ni laatu.
8 Ne ora maʼ biseegunatu guidxi ca, lagucaa guí ni. Naquiiñeʼ gúnitu guirá’ ni guníʼ Jehová. Ndiʼ nga ni cayabeʼ laatu gúnitu».
9 De raqué biseendaʼ Josué caadxi soldadu, ne zecaʼ lugar ra zigucaachilucaʼ, biaanacaʼ galaa de Betel ne ladu riaaziʼ gubidxa de guidxi Hai, ne gueelaʼ que biaanané Josué xcaadxi soldadu que.
10 Sti dxi que, siadoʼroʼ biasa Josué ne biseendacaabe ca soldadu que, laabe ne ca hombre huaniisi* de Israel zinécabe ca soldadu que guidxi Hai.
11 Guiráʼ ca soldadu ni zinebe que gudxibanecaʼ laabe ne bizuhuaacaʼ frente de guidxi que. Gudíxhecabe campamentu stícabe ladu guiaʼ de Hai, entre laacabe ne guidxi Hai didi ti valle.*
12 Peru maca biseendabe gaayuʼ mil hombre chigucachilú galaa de Betel ne Hai, ladu riaaziʼ gubidxa.
13 Ngue runi gudixhe guidxi que campamentu stiʼ ladu guiaʼ de guidxi Hai ne ca soldadu ni nanda de últimu, biaanacaʼ ladu riaaziʼ gubidxa. Ne gueelaʼ que bidxiña Josué dede galaa valle que.
14 Ora biʼyaʼ rey sti guidxi Hai ndiʼ, siadoʼroʼ bireenebe ca hombre stibe zécabe ti lugar ra napampa para tindenécabe ca israelita. Peru qué gánnadibe pa maʼ naguíxhecabe ti trampa laabe deche guidxi que.
15 Ne ora bizulú ca hombre de Hai cucaalucaʼ, biree Josué ne ca israelita ziguxooñecaʼ neza ni zeʼ lu desiertu.
16 Para biseendacaacabe ca ni biaana ndaaniʼ guidxi que para chinándacaʼ ca israelita. Ne cumu zinándacabe Josué la? bixélecabe de guidxi que.
17 Guiráʼ xixé hombre de Hai ne Betel zinándacaʼ guidxi Israel. Bisaanacabe guidxi que zuxeleʼ ndaga ne zinándacabe ca israelita.
18 Óraque gudxi Jehová Josué: «Bizaabiʼ lanza naazeluʼ ca neza ra nuu guidxi Hai, purtiʼ maʼ bisaanaʼ guidxi ca lu naluʼ». Para gucuaa Josué lanza ni naaze que ne bizaabiʼ ni neza ra nuu guidxi Hai.
19 Ne ora bizaabibe lanza ni naazebe que, biree ca soldadu que de ra nucachilucaʼ, ziguxooñecaʼ ne guyuucaʼ ndaaniʼ guidxi Hai ne biʼniʼ ganarcaʼ ni. Oraqueca bicaaguícabe guidxi que.
20 Ora bidxiguetalú ca hombre de Hai, biiyacaʼ cayasa ti guʼxhuʼ naroʼbaʼ ndaaniʼ guidxi que, de nin nidxélacaʼ pa neza nicaaca’. Ne ca israelita ni ziguxooñeʼ neza lu desiertu que, biguétacaʼ ne guzanándacaʼ ca hombre de Hai.
21 Ora biʼyaʼ Josué ne ca israelita maʼ biree ca ni nucachilú que ne maʼ guyuucaʼ ndaaniʼ guidxi Hai ne biiyacaʼ caree guʼxhuʼ ndaaniʼ guidxi que, biguétacaʼ para tindenecaʼ ca hombre de guidxi Hai.
22 Ne xcaadxi israelita nuu ndaaniʼ guidxi que, bireecaʼ para guidxaagalucaʼ laacabe; ne zaqué nga biaana ca hombre de Hai galaa de ca israelita. Biiti ca israelita guirácabe, nin tobi qué nilá.
23 Peru gunaazecabe rey stiʼ guidxi Hai ne yenécabe laa ra nuu Josué.
24 Biluxe biiti si ca israelita ca hombre de guidxi Hai, ca ni guzananda laacabe lu desiertu, biguétacabe ndaaniʼ guidxi Hai ne binduuxecabe guidxi que né espada.
25 Biaʼsi doce mil binni guti dxi que, hombre ne gunaa, guiráʼ xixé binni ni nabeza ndaaniʼ guidxi Hai.
26 Ne qué nindeteʼ Josué lanza naaze dede ora binduuxeʼ ca israelita que guiráʼ ca binni de guidxi Hai.
27 Peru biaanané guidxi Israel ca maniʼ ne ca cosa stiʼ ca binni de guidxi que, casi maca gudxi Jehová Josué gúnicabe.
28 Bicaa guí Josué guidxi Hai ne binitilube ni, nisi escombro stini biaana, ne zacá nuuni dede yanna.
29 Bigaandabe rey stiʼ guidxi Hai lu yaga dede ora gunda huadxí. Ne ante guiaaziʼ gubidxa, gunabaʼ Josué guindétecabe cuerpu stibe de lu yaga que. Despué bilaacabe laabe ra puertaʼ guidxi que ne bicuícabe ti montón guié luguiabe, ne dede yanna nuuni raqué.
30 Dxi que nga biʼniʼ Josué ti altar para Jehová, Dios stiʼ Israel, lu dani Ebal,
31 casi modo biʼniʼ mandar Moisés, siervu stiʼ Jehová,* guni ca israelita, casi cá ni lu libru ra cá Ley stiʼ Moisés: «Ti altar de guié ni qué nugánecabe xiixa herramienta de guiibaʼ». Raqué bizaaquicabe ofrenda ne bíʼnicabe sacrificiu de paz para Jehová.
32 Despué bicaabe lu ca guié que ti copia stiʼ Ley ni bicaa Moisés nezalú ca israelita.
33 Guidubi guidxi Israel, ca hombre huaniisi, ca xaíque ne ca juez bizuhaacabe cueʼ Arca que, frente de ca sacerdote levita ni nuaʼ arca stiʼ acuerdu stiʼ Jehová.* Raqué nuu ca israelita ne ca ni naca de stiʼ guidxi. Zuhuaa caadxi de laacabe frente de dani Guerizim ne zuhuaa xcaadxi frente de dani Ebal (casi gunabaʼ Moisés, siervu stiʼ Jehová, gúnicabe), para guicaa guidxi Israel ndaayaʼ.
34 Despué de ngue, biindabe en voz alta guiráʼ ni zeeda lu Ley, ca ndaayaʼ ne ca maldición ni cá lu libru ra cá Ley que.
35 De guiráʼ ni biʼniʼ mandar Moisés, nin ti diidxaʼ qué nusiaadxaʼ Josué, biindabe guirani en voz alta nezalú guidubi naca guidxi Israel, guiráʼ tu binadiaga ni, gunaa, xcuidi ne ca ni naca de sti guidxi ni nabeza* ládecabe.
Nota
^ O «hombre ni napa autoridad».
^ Laani nga ti lugar ra napampa ni nuu lade dani.
^ O «hombre ni biʼniʼ xhiiñaʼ Jehová».
^ Lit. «canazá».
