Levítico 11:1-47
-
Maniʼ nayá ne ni nabiidiʼ (1-47)
11 De raqué gudxi Jehová Moisés ne Aarón:
2 «Lagabi ndiʼ ca israelita: “Ndiʼ nga ca maniʼ nabani lu guidxilayú* ni zanda goto:
3 guiráʼ ca maniʼ ni nareza cascu ñee ne napa ti huecu lade cascu ñee ne ni ribiguetaʼ ruzuii ni maʼ gudó, zanda goto laacame.
4 »”Yanna, ca maniʼ ni ribiguetaʼ ruzuii ni maʼ gudó o ni nareza cascu ñee ni cadi naquiiñeʼ goto nga ca ndiʼ. Cadi naquiiñeʼ goto camellu, purtiʼ ribiguetaʼ ruzuiime ni maʼ gudome peru cadi nareza cascu ñeeme. Nabiidime* para laatu.
5 Laaca cadi goto damán, purtiʼ ribiguetaʼ ruzuiime ni maʼ gudome peru cadi nareza cascu ñeeme. Nabiidime para laatu.
6 Laaca cadi goto liebre, purtiʼ ribiguetaʼ ruzuiime ni maʼ gudome peru cadi nareza cascu ñeeme. Nabiidime para laatu.
7 Laaca cadi goto bihui, purtiʼ nareza cascu ñeeme ne napa ti huecu lade cascu ñeeme peru qué ribiguetaʼ ruzuiime ni maʼ gudome. Nabiidime para laatu.
8 Cadi naquiiñeʼ goto nin ti ndaa xpeelacame ninca cánatu laacame ora maʼ gúticame. Nabiidicame para laatu.
9 »”Ndiʼ nga ni zanda goto de guiráʼ ca ni nuu ndaaniʼ nisa: zanda goto guiráʼ ni nuu ndaaniʼ nisadóʼ o ndaaniʼ guiiguʼ ni napa aleta ne jlaza.
10 Peru guiráʼ ni nuu ndaaniʼ nisadóʼ o ndaaniʼ guiiguʼ ni qué gapa aleta nin jlaza, de lade guiráʼ ca maniʼ ni ridale ndaaniʼ ca nisa o sti tipu maniʼ ni nabani ndaaniʼ nisa, nayuudxucame para laatu.
11 Ya, naquiiñeʼ gácacame ti cosa yuudxuʼ para laatu. Cadi naquiiñeʼ goto nin ti ndaa xpeelacame ne naquiiñeʼ guibixhiláʼdxitu laacame ora maʼ gúticame.
12 Guiráʼ ca ni nuu ndaaniʼ nisa ni qué gapa aleta nin jlaza, nácacame ti cosa yuudxuʼ para laatu.
13 »”Ndiʼ nga ca maniʼ ni ripapa ni naquiiñeʼ guibixhiláʼdxiluʼ. Cadi goto ca maniʼ riʼ purtiʼ nácacame ti cosa yuudxuʼ: águila, águila ni rinaazeʼ benda, soʼpeʼ nayaaseʼ,*
14 milano real, ninca ti tipu milano nayaaseʼ,
15 nin ti tipu cuervo,
16 avestruz, lechuza, gaviota, nin ti tipu halcón,
17 búho nahuiiniʼ, cuervo ni riuu ruaa nisadóʼ, búho ni naroʼbaʼ diaga,
18 cisne, pelícano, buitre,
19 cigüeña, nin ti tipu garza, abubilla ninca guidiribeela.*
20 Guiráʼ maniʼ napa xhiaa ni ridale nagueenda lu guidxilayú ne* ni rizá lu guidapaʼ ñee, nácacame ti cosa yuudxuʼ para laatu.
21 »”De ca maniʼ napa xhiaa ni ridale nagueenda lu guidxilayú ne ni rizá lu guidapaʼ ñee, zanda goto ca ni napa ñee ni randa riguude, chupa ca jma ziuulacani que xcaadxi ñeeme, para guichésame layú.
22 Ndiʼ nga ca ni zanda goto: guiráʼ tipu langosta ni runi migrar, xcaadxi langosta ni zanda goto, ca grillu ne ca uxhaaru.*
23 Intiica si sti tipu maniʼ napa xhiaa ni ridale nagueenda lu guidxilayú ne napa tapa ñee, nácacame ti cosa yuudxuʼ para laatu.
24 Pur laacame, zanda gácatu nabiidiʼ. Guiráʼ tu canaʼ laacame ora maʼ gúticame zaca nabiidiʼ dede ora guiaaziʼ gubidxa.
25 Tutiica guáʼ tobi de ca maniʼ riʼ ora maʼ gúticame napa xidé quiʼbiʼ xhaba, ne zaca nabiidiʼ dede ora guiaaziʼ gubidxa.
26 »”Intiica maniʼ ni nareza cascu ñee peru qué gapa ti huecu lade cascu ñee ne qué ribiguetaʼ ruzuii ni maʼ gudó, nabiidime para laatu. Guiráʼ tu canaʼ laame zaca nabiidiʼ.
27 De lade ca maniʼ ni rizá lu guidapaʼ ñee, guirá ni nabani ni rizá layú ne napa bixuga nabiidicame para laatu. Guiráʼ tu canaʼ laacame ora maʼ gúticame zaca nabiidiʼ dede ora guiaaziʼ gubidxa.
28 Ni guáʼ tobi de ca maniʼ riʼ ora maʼ gúticame napa xidé quiʼbiʼ xhaba ne zaca nabiidiʼ dede ora guiaaziʼ gubidxa. Nácacame nabiidiʼ para laatu.
29 »”De ca maniʼ ni ridale nagueenda lu guidxilayú, ndiʼ nga ca ni nabiidiʼ para laatu: huaga ni rigaañe, biziña, guiráʼ tipu lagarto,
30 bilopayoo,* lagarto naroʼbaʼ, salamandra ni riuu ndaaniʼ nisa, uraguʼ ne camaleón.
31 Ca maniʼ ni ridale nagueenda lu guidxilayú riʼ nabiidicame para laatu. Guiráʼ tu canaʼ laacame ora maʼ gúticame zaca nabiidiʼ dede ora guiaaziʼ gubidxa.
32 »”Yanna, pa gatiʼ tobi de ca maniʼ riʼ ne guiábame lu intiica cosa, lu ti traste de yaga, ti lari ni rácucabe, ti guidi ladi maniʼ o ti pedazu lari nachonga, zácacani nabiidiʼ. Intiica traste ni riquiiñeʼ guiráʼ dxi naquiiñeʼ chuʼni ndaaniʼ nisa ne zácani nabiidiʼ dede ora guiaaziʼ gubidxa. De racá zácani nayá.*
33 Pa guiábacame ndaaniʼ ti traste de yu, naquiiñeʼ guindaaluʼ ni, ne intiica cosa ni nuu ndaanini zaca nabiidiʼ.
34 Intiica guendaró ni guiaba nisa ni daʼ ndaaniʼ traste ca lu, zaca nabiidiʼ, ne intiica ni daʼ ndaaniʼ traste ca zaca nabiidiʼ.
35 Ne lu intiica cosa ni guiaba maniʼ ni maʼ guti ca lu, zaca nabiidiʼ. Lu ti horno o ti ludé, naquiiñeʼ gunidetu ni. Nácacani nabiidiʼ ne qué zusaana de gácacani nabiidiʼ para laatu.
36 Ra ridá si nisa ne ca cisterna ra ridaa nisa zácacani nayá, peru tutiica canaʼ ca maniʼ ni maʼ guti ca zaca nabiidiʼ.
37 Pa guiaba tobi de ca maniʼ ni maʼ guti ca lu ti biidxiʼ ni chiguiábaruʼ layú, qué zaca biidxiʼ ca nabiidiʼ.
38 Peru pa maʼ bidxá nisa lu biidxiʼ ca ne guiaba ti ndaa de ca maniʼ ni maʼ guti ca luni, zaca biidxiʼ ca nabiidiʼ para laatu.
39 »”Yanna, pa gatiʼ ti maniʼ ni zanda goto, tutiica si canaʼ maniʼ ni maʼ guti ca zaca nabiidiʼ dede ora guiaaziʼ gubidxa.
40 Tutiica gó ti ndaa de maniʼ ni maʼ guti ca, naquiiñeʼ quiʼbiʼ xhaba ne zaca nabiidiʼ dede ora guiaaziʼ gubidxa. Tutiica guáʼ maniʼ ni maʼ guti ca, naquiiñeʼ quiʼbiʼ xhaba ne zaca nabiidiʼ dede ora guiaaziʼ gubidxa.
41 Guiráʼ maniʼ ni ridale nagueenda lu guidxilayú, nácacame ti cosa yuudxuʼ. Cadi naquiiñeʼ goto laacame.
42 Cadi naquiiñeʼ goto nin ti maniʼ ni rixubi ndaaniʼ layú, nin ti maniʼ ni rizá lu guidapaʼ ñee ne nin ti maniʼ ni ridale nagueenda lu guidxilayú ne napa stale ñee, purtiʼ nácacame ti cosa yuudxuʼ.
43 Cadi gácatu ti cosa nayuudxuʼ pur intiica maniʼ ni ridale nagueenda lu guidxilayú; cadi gaca biiditu ne gusaana de gácatu nayá pur laacame.
44 Purtiʼ naa nga Jehová, Dios stitu, ne laatu naquiiñeʼ gusiatu laatu ne gácatu santo purtiʼ naa nacaʼ santo. Nga runi cadi naquiiñeʼ gácatu nabiidiʼ pur ti maniʼ ni ridale nagueenda lu guidxilayú ne ni rizá luni.
45 Purtiʼ naa nga Jehová, ni gulee laatu de guidxi Egipto para gacaʼ Dios stitu, ne naquiiñeʼ gácatu santo purtiʼ naa nacaʼ santo.
46 »”Ndiʼ nga ley ni chinándatu de ca maniʼ ni rizá layú, de ca maniʼ ni ripapa, de guiráʼ ca maniʼ ni nabani ndaaniʼ nisa ne guiráʼ maniʼ ni ridale nagueenda lu guidxilayú,
47 ti zacá gánnatu gunáʼ nga ni nayá ne ni cadi nayá ne gunáʼ de lade ca ni nabani zanda goto ne gunáʼ coʼ”».
Nota
^ O «ca maniʼ ni nuu lu guidxilayú».
^ O «nguʼxhiʼ».
^ O «biguidiʼ».
^ O «Guiráʼ insecto».
^ O «ca chapulín».
^ O «gopayoo».
