Levítico 13:1-59
13 Guní’neruʼ Jehová Moisés ne Aarón. Gúdxibe laacaʼ:
2 «Pa guidxá guí ladi ti hombre, guiasa ti costra ládibe o ti roncha ne zándaca guendahuará lepra* ni, naquiiñeʼ chinécabe laabe nezalú sacerdote Aarón o nezalú tobi de ca xiiñiʼ Aarón, ca sacerdote.
3 Zuuyaʼ chaahui’ sacerdote ca ládibe ra huará. Pa maʼ guca ca guicha ni nuu luni blancu ne rihuinni jma gueteʼ nuu guendahuará ca ládibe, lepra ni. Zuuyaʼ chaahui’ sacerdote ca ni ne zaníʼ nabiidibe.*
4 Peru pa blancu roncha nuu ládibe ne qué rihuinni pa gueteʼ nuu guendahuará ca ládibe ne cadi blancu ca guicha nuu luni, zabeechú sacerdote binni ni huará ca gadxe gubidxa.
5 Ra guizaa gadxe gubidxa ca, zuuyaʼ chaahui’ sacerdote ca laabe. Pa rihuinni maʼ biaanadxí guendahuará ca ne maʼ qué nizani ládibe, zabeechú sacerdote ca laabe xcadxe gubidxa.
6 »Ra guizaa gadxe gubidxa ca, zuuyaʼ chaahui’ sacerdote ca laabe sti biaje. Pa maʼ qué rihuinni guendahuará ca ne qué nizani ládibe, zaníʼ sacerdote ca maʼ nuube nayá.* Ti costra si ni. Óraque zaguiibiʼ hombre ca xhaba ne ziaana nayá.
7 Peru pa guibiguetaʼ costra ca ne dxandíʼ peʼ guireecheni ládibe despué de guyebe ra nuu sacerdote ne gudxi laabe nácabe nayá, ziebe ra nuu sacerdote ca sti biaje.
8 Zuuyaʼ chaahui’ sacerdote ca laabe. Pa maʼ bireeche costra ca ládibe, óraca zaníʼ sacerdote ca nácabe nabiidiʼ. Lepra ni.
9 »Pa guiasa guendahuará lepra ladi ti hombre, naquiiñeʼ chinetu laabe ra nuu sacerdote,
10 ne zuuyaʼ chaahuiʼ sacerdote ca laabe. Ne pa blancu ra dxaʼ guí ládibe ne blancu guicha ni nuu luni ne zuxeleʼ ti herida ra dxaʼ guí ca,
11 nápabe lepra ni qué riandagá, ne zaníʼ sacerdote ca nácabe nabiidiʼ. Cadi naquiiñeʼ cueechúcabe laabe ne despué guibiguétabe para gúʼyacabe pa maʼ biándabe, purtiʼ nabiidibe.
12 Peru pa sáʼ lepra ca guidubi ládibe ne guchii guendahuará ca de ique de ñee binni ca, biaʼ de ra ganda guʼyaʼ sacerdote,
13 ne maʼ biiyaʼ chaahuiʼ sacerdote ca laabe ne biiyaʼ maʼ bichii lepra ca guidubi ládibe, óraca zaníʼ maʼ nayá binni huará ca.* Maʼ blancu guidubi ládibe ne maʼ nayabe.
14 Peru pa gueeda guixeleʼ ti herida ládibe, zácabe nabiidiʼ.
15 Ora guʼyaʼ sacerdote ca herida zuxeleʼ ca, zaníʼ nabiidibe. Nabiidiʼ herida zuxeleʼ ca. Lepra ni.
16 Peru pa gaca herida zuxeleʼ ca blancu sti biaje, óraca napa xidé chebe ra nuu sacerdote,
17 ne zuuyaʼ chaahui’ sacerdote ca laabe. Pa maʼ blancu ra huará ca, zaníʼ sacerdote ca maʼ nayá binni ca. Maʼ nayá nuube.
18 »Pa guiree ti guiʼdxuʼ ladi tuuxa ne guiándani
19 peru ra biree guiʼdxuʼ ca guihuinni blancu ne dxani guí o guihuinni ti roncha blancu ne naxiñáʼ, óraque napa xidé chebe ra nuu sacerdote.
20 Zuuyaʼ chaahui’ sacerdote ca ni. Pa rihuinni jma gueteʼ nuu guendahuará ca ládibe ne blancu guicha ni nuu luni, óraca zaníʼ sacerdote ca nabiidiʼ binni ca. Guendahuará lepra nga bihuinni lu guiʼdxuʼ ca.
21 Peru pa guʼyaʼ chaahui’ sacerdote ca gastiʼ guicha blancu luni ne cadi gueteʼ nuu guendahuará ca ládibe ne rihuinni maʼ cayándani, óraca zabeechú sacerdote ca laabe de binni gadxe gubidxa.
22 Ne pa rihuinni dxíchica maʼ guzá guendahuará ca ládibe, zaníʼ sacerdote ca nabiidibe. Ti guendahuará ni.
23 Peru pa zaqué si nuu roncha ca ne caʼruʼ sani, guí si nga napa guiʼdxuʼ ca, ne óraca zaníʼ sacerdote ca nayabe.
24 »O, pa bidxuíʼ ladi tuuxa ne zuxeleʼ ra bidxuíʼ ca, ne gácani ti roncha blancu ne naxiñáʼ o blancu,
25 óraque zuuyaʼ chaahui’ sacerdote ca ni. Pa blancu guicha ni nuu lu roncha ca ne rihuinni jma gueteʼ nuu guendahuará ca ládibe, lepra nga bihuinni ra bidxuíʼ ca, ne zaníʼ sacerdote ca nabiidibe. Guendahuará lepra ni.
26 Peru pa guʼyaʼ chaahui’ sacerdote ca laabe ne guʼyaʼ gastiʼ guicha blancu lu roncha ca ne cadi gueteʼ nuu guendahuará ca ládibe ne maʼ cayándani, óraca zabeechú sacerdote ca laabe gadxe gubidxa.
27 Ra guizaa gadxe gubidxa ca zuuyaʼ chaahui’ sacerdote ca laabe. Pa rihuinni dxíchica maʼ guzá roncha ca ládibe, óraca zaníʼ sacerdote ca nabiidibe. Guendahuará lepra ni.
28 Peru pa zaqué si nuu roncha ca ne caʼruʼ sani ládibe ne maʼ bizulú cayándani, purtiʼ guí si nga bidxá ra bidxuíʼ ca, zaníʼ sacerdote ca nayabe, purtiʼ bidxá si guí ra bidxuíʼ ca.
29 »Pa gaca huará ique o xhigui ti hombre o ti gunaa,
30 óraca zuuyaʼ chaahui’ sacerdote ca ra huará ca. Pa ruluíʼ gueteʼ nuu guendahuará ca ládibe, ne naguchi guicha nuu luni ne huaxiéʼ guicha ca, zaníʼ sacerdote ca nabiidiʼ binni ca. Ti guendahuará ni nuu lu guidi íquebe o lu guicha ruaabe ni. Lepra ni riree lu guidi ique o lu xhigui binni ni.
31 Peru, pa guʼyaʼ sacerdote riʼ cadi gueteʼ nuu guendahuará ca ládibe ne gastiʼ guicha nayaaseʼ luni, naquiiñeʼ cueechú sacerdote riʼ binni huará ca gadxe gubidxa.
32 Ra guizaa gadxe gubidxa ca, zuuyaʼ chaahui’ sacerdote ra huará ca. Pa caʼruʼ sáʼ guendahuará ca ne gastiʼ guicha naguchi luni ne qué rihuinni pa gueteʼ nuuni ládibe,
33 zugá binni riʼ ca guicha ni nuu ra nazaaca de laa, peru qué zugabe ca guicha ni nuu ra huará ca. Óraca zabeechú sacerdote riʼ binni huará ca gadxe gubidxa.
34 »Ra guizaa gadxe gubidxa ca, zuuyaʼ chaahuiʼ sacerdote riʼ ra huará ca sti biaje. Pa guendahuará ni nuu íquebe ne xhíguibe caʼruʼ sani ládibe ne qué ruluíʼ pa gueteʼ nuuni lu ládibe, óraca naquiiñeʼ guiníʼ sacerdote ca nayabe, ne napa xidé quiʼbiʼ binni ca xhaba ne zaca nayá.
35 Peru pa guihuinni dxichiʼ zizá guendahuará ca ládibe despué de biabe,
36 zuuyaʼ chaahuiʼ sacerdote riʼ laabe sti biaje. Pa maʼ guzá guendahuará ca ládibe, maʼ cadi naquiiñeʼ guʼyaʼ sacerdote riʼ pa nuu guicha naguchi luni: nabiidiʼ binni ca.
37 Peru pa ra guʼyaʼ chaahuiʼ sacerdote ca guihuinni maʼ qué nizá guendahuará ca ne maʼ candani guicha nayaaseʼ luni, maʼ bianda guendahuará ca. Nayá binni ca, ne zaníʼ sacerdote ca nayabe.
38 »Pa guiree roncha ladi ti hombre o ti gunaa ne blancu ca roncha ca,
39 zuuyaʼ chaahui’ sacerdote ca ni. Pa naté ca roncha ca, cadi malu guendahuará biree ládibe. Nayá binni ca.
40 »Pa guiaba guicha ique ti hombre ne guiaana íquebe napiiruʼ, nayabe.
41 Pa guiaba guicha íquebe ni nuu lucuabe ne guiaana parte ca napiiruʼ, nayabe.
42 Peru pa guiree ti mancha blancu ne naxiñáʼ ra napiiruʼ íquebe o lucuabe, lepra nga caree ra napiiruʼ íquebe o lucuabe.
43 Zuuyaʼ chaahui’ sacerdote laabe. Pa blancu ne naxiñáʼ ra dxaʼ guí ra huará galaa íquebe o lucuabe ne ruluiʼni lepra,
44 nácabe ti binni ni napa lepra. Nabiidibe, ne zaníʼ sacerdote ca nácabe nabiidiʼ pur guendahuará ni nápabe íquebe.
45 Ne binni ni napa guendahuará de lepra riʼ naquiiñeʼ sáʼ né xhaba nareza ne cadi guizaalaʼdxiʼ guicha ique. Ne laaca naquiiñeʼ guchiibe ruaabe* ne gucaabe ridxi: “¡Nabiidiʼ, nabiidiʼ!”.*
46 Zácabe nabiidi’ bia’ dxi gápabe guendahuará ca. Cumu nabiidibe la? cadi naquiiñe’ cuézabe gaxha de binni. Zabézabe fuera de campamentu.
47 »Pa guihuinni guendahuará lepra lu ti lari ni rácucabe, de guicha ladi dendxuʼ o de lino,
48 lu ca hilu ni didi neza ziuulaʼ o xilaga stiʼ tela de lino o de guicha ladi dendxuʼ ca, o lu ti guidi ladi maniʼ o intiica cosa ni guca de guidi ladi maniʼ,
49 ne guihuinni mancha verde guchi o naxiñáʼ stiʼ guendahuará ca lu lari ni rácucabe, lu ti guidi ladi maniʼ, lu ca hilu ni didi neza ziuulaʼ o xilaga stiʼ ti lari o lu intiica cosa ni guca de guidi ladi maniʼ, nápacani lepra ne naquiiñeʼ guluíʼcabe cani sacerdote.
50 Zuuyaʼ chaahui’ sacerdote riʼ guendahuará ca, ne zabeechube cosa ra cá guendahuará ca gadxe gubidxa.
51 Ra guizaa gadxe gubidxa ca, zuuyaʼ chaahuibe guendahuará ca sti biaje. Pa gúʼyabe maʼ guzani lu lari ni rácucabe ca, lu ca hilu ni didi neza ziuulaʼ o neza xilaga stini o lu ti guidi ladi maniʼ ca (ratiica si riquiiñecabe guidi ca), lepra malu ni. Nabiidiʼ cosa ni cá lepra ca lu.
52 Naquiiñeʼ guzaaquibe lari ca, hilu de guicha ladi dendxuʼ o de lino ni didi neza ziuulaʼ o neza xilaga stiʼ tela ca, o intiica cosa de guidi ladi maniʼ ra bihuinni guendahuará ca lu, purtiʼ malu lepra ca. Naquiiñeʼ guzaaquicabe ni lu bele.
53 »Peru pa guʼyaʼ sacerdote ca ra cá guendahuará ca ne gúʼyabe cadi cazá mancha ca lu lari ca, lu ca hilu ni didi neza ziuulaʼ o neza xilaga stiʼ tela ca o lu intiica cosa de guidi ladi maniʼ ra cá ni,
54 óraca zuni mandar sacerdote ca quíʼbicabe cosa ra cá guendahuará ca ne zabeechube ni xcadxe gubidxa.
55 De racá zuuyaʼ chaahui’ sacerdote ca ra nuu guendahuará ca despué de biaʼriʼ chaahuini. Pa caʼruʼ guchaa mancha ca de color, neca caʼruʼ sáʼ guendahuará ca, nabiidiʼ ra cá ni. Naquiiñeʼ guzaaquiluʼ ni lu bele, purtiʼ maʼ cuxuuxe guendahuará ca dentru o fuera de laani.
56 »Peru pa maʼ biiyaʼ chaahui’ sacerdote riʼ mancha ca ne maʼ canítini despué de biaʼriʼ chaahuini, óraca záxhabe parte de lari ra cá guendahuará ca, o lu ti guidi ladi maniʼ, o lu ca hilu ni didi neza ziuulaʼ o neza xilaga stiʼ tela ca.
57 Peru, pa neca zacá cahuínniruʼ mancha ca lu sti parte de lari ni rácucabe, o lu hilu ni didi neza ziuulaʼ o neza xilaga stiʼ tela ca o lu intiica cosa de guidi ladi maniʼ, ndiʼ riníʼ cazá mancha ca. Naquiiñeʼ guzaaquiluʼ intiica cosa ra cá guendahuará ca lu bele.
58 Peru pa maʼ qué rihuinni mancha ca lu lari ni rácucabe, lu hilu ni didi neza ziuulaʼ o neza xilaga stiʼ tela ca o lu intiica cosa de guidi ladi maniʼ ni maʼ biaʼriʼ, óraca naquiiñeʼ guiáʼrini sti biaje, ne zácani nayá.
59 »Ndiʼ nga ley para guendahuará stiʼ lepra ora nuuni lu ti lari ni rácucabe de guicha ladi dendxuʼ o de lino, lu doo ni didi neza ziuulaʼ o neza xilaga stiʼ ti tela, o lu intiica cosa de guidi ladi maniʼ, para gánnatu pa nayani o pa nabiidini».
Nota
^ Diidxaʼ hebreu ni guca traducir diidxaʼ «lepra» riniʼni de gadxé gadxé guendahuará ni ricá ladi binni. Laaca riquiiñeʼ diidxaʼ riʼ ora caniʼni de xcaadxi guendahuará ni ricá lu lari o ni ricá lu ti yoo.
^ O «zaníʼ qué ricá diʼ guendahuará ca».
^ O «bigote stibe».
^ O «“¡Impuro, impuro!”».
