Levítico 18:1-30
-
Relación sexual ni qué raca deber gaca (1-30)
18 Guníʼneruʼ Jehová Moisés ne gúdxibe laa:
2 «Gudxi ca israelita: “Naa nga Jehová, Dios stitu.
3 Cadi gúnitu ca ni runi ca binni de Egipto, guidxi ra gulézatu. Laaca cadi gúnitu ni runi ca binni de guidxi Canaán, lugar ra ziniáʼ laatu. Ne cadi guibánitu modo ná ca ley stícabe.
4 Lachinanda ca decisión* stinneʼ, ne laguibani modo ná ca ley stinneʼ ne lachinanda cani. Naa nga Jehová, Dios stitu.
5 Napa xidé chinándatu ni ná ca ley ne ca decisión* stinneʼ. Binni ni guni ni nácani zulácani xquendanabani. Naa nga Jehová.
6 »”Nin tobi de laatu cadi naquiiñeʼ guidxiña tobi de ca familia jma gaxha stiʼ para gapa relación sexual né laabe.* Naa nga Jehová.
7 Cadi gápaluʼ relación sexual né bixhózeluʼ ninca gápaluʼ relación sexual né jñaaluʼ. Laabe nga jñaaluʼ; cadi gápaluʼ relación sexual né laabe.
8 »”Cadi gápaluʼ relación sexual né xheelaʼ bixhózeluʼ. Purtiʼ zusituini lu bixhózeluʼ.
9 »”Cadi gápaluʼ relación sexual né bizáʼnaluʼ, xiiñidxaapaʼ bixhózeluʼ o xiiñidxaapaʼ jñaaluʼ, pa gúlebe ra nabézaluʼ o gúlebe sti lugar.
10 »”Cadi gápaluʼ relación sexual né xiiñidxaapaʼ xiiñiluʼ hombre o né xiiñidxaapaʼ xiiñidxaapaluʼ, purtiʼ zusituini luluʼ.
11 »”Cadi gápaluʼ relación sexual né xiiñidxaapaʼ xheelaʼ bixhózeluʼ, xiiñiʼ bixhózeluʼ, purtiʼ bizáʼnaluʼ nga laabe.
12 »”Cadi gápaluʼ relación sexual né bizaʼnaʼ bixhózeluʼ. De rini stiʼ bixhózeluʼ nga laabe.
13 »”Cadi gápaluʼ relación sexual né benda jñaaluʼ, purtiʼ de rini stiʼ jñaaluʼ nga laabe.
14 »”Cadi gusítuiluʼ lu biʼchiʼ bixhózeluʼ* ra gápaluʼ relación sexual né xheelaʼ. Xtialuʼ nga xheelabe.
15 »”Cadi gápaluʼ relación sexual né xuaalídxiluʼ. Xheelaʼ xiiñiluʼ nga laabe; cadi gápaluʼ relación sexual né laabe.
16 »”Cadi gápaluʼ relación sexual né xheelaʼ bíʼchiluʼ, purtiʼ zusituini lu bíʼchiluʼ.
17 »”Cadi gápaluʼ relación sexual né ti gunaa ne ninca né xiiñidxaapabe. Cadi guichaganaluʼ xiiñidxaapaʼ xiiñibe hombre ninca guichaganaluʼ xiiñidxaapaʼ xiiñidxaapabe para gápaluʼ relación sexual né laa. Familia gaxha stiʼ gunaa riʼ ca baʼdudxaapaʼ ca. Ti cosa dxabaʼ ni.
18 »”Cadi guichaganaluʼ benda xheelaluʼ purtiʼ zadinde saacabe, ne cadi gápaluʼ relación sexual né laabe laga nabani xheelaluʼ.
19 »”Cadi guidxíñaluʼ ti gunaa para gápaluʼ relación sexual né laa ora nabiidiʼ pur cayete regla stiʼ.
20 »”Cadi gápaluʼ relación sexual né xheelaʼ compañeru stiluʼ,* purtiʼ zuni biidini lii.
21 »”Cadi gudiiluʼ lugar gudiicabe tuuxa de ca ni zá de lii casi sacrificiu para Mólek. Cadi guni tratarluʼ lá Dios stiluʼ sin respetu ra gúniluʼ zacá. Naa nga Jehová.
22 »”Cadi gataneluʼ ti hombre cásica rataneluʼ ti gunaa. Nácani ti cosa yuudxuʼ.
23 »”Cadi gapa nin ti hombre relación sexual né ti maniʼ, purtiʼ zuni biidini laabe. Ne cadi naquiiñeʼ chuʼ ti gunaa delante de ti maniʼ para gapa relación sexual né laame. Cadi zacá diʼ nga nexheʼ guni binni.
24 »”Cadi gácatu nabiidiʼ né tobi de ca cosa riʼ, purtiʼ pur ca cosa riʼ nga maʼ guca biidiʼ ca nación ni chiladxeʼ neza ra zetu.
25 Nga runi nabiidiʼ layú ca ne zuseendaʼ castigu luguiáʼ ca binni nabeza luni pur donda sticaʼ, ne zadxiʼbaʼ layú riʼ ca binni ni nabeza luni.
26 Peru laatu naquiiñeʼ chinándatu ca ley ne ca decisión* stinneʼ, ne nin ti binni de xquídxitu ne nin ti binni ni nabeza ládetu cadi naquiiñeʼ guni ca cosa yuudxuʼ riʼ.
27 Purtiʼ nga nga ca cosa yuudxuʼ ni biʼniʼ ca hombre ni guleza lu layú ca ante chuʼtu luni, ne yanna nabiidiʼ layú ca.
28 Pa qué guni biiditu ni, qué zadxiʼbaʼ layú ca laatu casi zadxíʼbani ca guidxi ni maca nuu racá ante chindatu.
29 Binni ni guni tobi de ca cosa yuudxuʼ riʼ, guiráʼ tu guni cani, zanitilú de ndaaniʼ xquidxi.
30 Naquiiñeʼ guni cumplirtu ni nexheʼ gúnitu para naa ra cadi chinándatu nin tobi de ca costumbre yuudxuʼ ni bíʼnicabe ante chindatu racá, para cadi guni biidicani laatu. Naa nga Jehová, Dios stitu”».
Nota
^ O «decisión judicial».
^ O «gúʼyaluʼ laabe xieeládibe». Lu versículo riʼ ne lu xcaadxi ca, caníʼ ca diidxaʼ riʼ de ca relación sexual ni cadi jneza.
^ Lit. «Cadi gúʼyaluʼ biʼchiʼ bixhózeluʼ xieeladi».
^ O «xpecínuluʼ», «ni runineluʼ dxiiñaʼ».
^ O «decisión judicial».
