Levítico 21:1-24
21 Laaca gudxi Jehová Moisés: «Gudxi ca sacerdote, ca xiiñiʼ Aarón: “Nin ti sacerdote cadi naquiiñeʼ gaca biidiʼ pur ti binni de xquídxitu ni maʼ guti.*
2 Peru zanda gaca biidibe pur ti familia gaxha, de rini stibe, casi jñaabe, bixhózebe, xiiñibe, xiiñidxaapabe ne bíʼchibe,
3 ne zanda gaca biidibe pur bizáʼnabe pa binnidxaapaʼ laa ne nabeza ra nuube ne caʼruʼ guichaganáʼ.
4 Cadi naquiiñeʼ gaca biidibe ne gusaana de gácabe santo pur ti gunaa ni naca xheelaʼ ti hombre de xquídxibe.
5 Cadi naquiiñeʼ gusipiirucabe íquecabe ne cadi ugácabe punta guicha ruaacabe ninca guchuugucabe ládicabe.
6 Naquiiñeʼ gácacabe santo para Dios stícabe ne cadi guni tratárcabe lá Dios stícabe sin respetu, purtiʼ laacabe nga rudiicabe ca ofrenda ni raʼtaʼ lu bele para Jehová, pan* stiʼ Dios stícabe. Naquiiñeʼ gácacabe santo.
7 Cadi naquiiñeʼ guichaganácabe ti prostituta o ti gunaa ni maʼ cadi naca binnidxaapaʼ, ninca ti gunaa ni maʼ guca divorciar de xheelaʼ, purtiʼ santo nga sacerdote ca para Dios stiʼ.
8 Naquiiñeʼ guʼnuʼ laabe santo, purtiʼ laabe rudiibe pan stiʼ Dios stiluʼ. Napa xidé gácabe santo para lii purtiʼ naa, Jehová —ni cabeechú laatu para naa—, nacaʼ santo.
9 »”Yanna, pa xiiñidxaapaʼ ti sacerdote gaca biidiʼ purtiʼ naca prostituta, zuni biidibe bixhózebe pur nga. Naquiiñeʼ guzaaquitu laabe lu bele.
10 »”Ni naca sumo sacerdote lade ca bíʼchitu, ni bilate aceite santo ique, ni maʼ guca nombrar para gacuʼ lari stiʼ sacerdote, cadi naquiiñeʼ gusaana guicha ique naracha ne cadi naquiiñeʼ guicheza xhaba.
11 Cadi naquiiñeʼ guidxíñabe ti gueʼtuʼ.* Cadi naquiiñeʼ gaca biidibe nin pur bixhózebe o pur jñaabe.
12 Cadi naquiiñeʼ guireebe de ndaaniʼ santuariu ne cadi guni tratarbe santuariu stiʼ Dios stibe sin respetu, purtiʼ señal santo ni rusihuinni maʼ gulí Dios laabe —aceite santo stiʼ Dios stibe— nuuni luguiabe. Naa nga Jehová.
13 »”Napa xidé guichaganabe ti gunaa ni naca binnidxaapaʼ.
14 Qué zanda diʼ guichaganabe ti viuda, ti gunaa ni maʼ guca divorciar, tobi ni maʼ cadi binnidxaapaʼ o ti prostituta, sínuque naquiiñeʼ guichaganabe ti binnidxaapaʼ de xquídxibe.
15 Cadi naquiiñeʼ guni biidibe ca ni zá de laabe lade binni xquídxibe, purtiʼ naa nga Jehová, ni cabeechú laabe para naa”».
16 Guníʼneruʼ Jehová Moisés ne gúdxibe laa:
17 «Gudxi Aarón: “Nin tobi de ca ni zá de lii, guiráʼ generación ni guibani despué, ni napa ti defectu, qué zanda guidxiña para gudii pan stiʼ Dios stiʼ.
18 Qué zanda guidxiña nin ti hombre ni napa ti defectu: ti hombre ciegu o nachiitaʼ ñee, ti becheʼ* o tuuxa ni napa ti náʼ o ti ñee jma ziuulaʼ,
19 ti hombre ni maʼ biluuza ñee o náʼ,
20 ti jorobadu o ti enanu,* o ti hombre ni napa xiixa defectu ca bizalú, ni napa ti guendahuará ladi,* ni napa tiña o tuuxa ni cadi nazaaca ca testículo stiʼ.
21 Nin tobi de ca ni zá de sacerdote Aarón ni napa ti defectu qué zanda guidxiña para gudii ofrenda ni raʼtaʼ lu bele para Jehová. Cumu nápabe ti defectu la? qué zanda guidxíñabe para gudiibe pan stiʼ Dios stibe.
22 Zanda gobe pan stiʼ Dios stibe de ca cosa guizáʼ santo ne de ca cosa santo.
23 Peru qué zanda chuʼbe gaxha de cortina ninca guidxíñabe ra nuu altar, purtiʼ nápabe ti defectu. Cadi guni tratarluʼ santuariu stinneʼ sin respetu, purtiʼ naa nga Jehová, ni cabeechú laatu para naa”».
24 Ngue runi guniʼné Moisés Aarón ne ca xiiñiʼ Aarón ne guiráʼ ca israelita.
Nota
^ O «pur ti alma».
^ O «guendaró», caniʼni de ca sacrificiu.
^ O «nin ti alma ni maʼ guti». Raríʼ diidxaʼ hebreu néfesh rieni cueʼ ti diidxaʼ hebreu para guiníʼcabe de “tuuxa ni maʼ guti”.
^ O «tuuxa ni nareza xii».
^ Zándaca caniʼni de ti binni ni cadi normal biaʼ nachucu o nalaseʼ pur ti guendahuará.
^ O «eccema».
