Levítico 27:1-34
27 Biguetaʼ guniʼné Jehová Moisés, ne gúdxibe laa:
2 «Guniʼné ca israelita ne gudxi laacaʼ: “Pa guni tuuxa ti promesa especial Jehová de gudii laabe biaʼ saca ti binni,
3 naquiiñeʼ gánnabe 50 siclo* de plata nga biaʼ saca ti hombre ni napa gande hasta 60 iza, según siclo ni riquiiñeʼ lugar santo.
4 Peru para ti gunaa la? 30 siclo nga biaʼ saca.
5 Pa napa binni ca gaayuʼ hasta gande iza, gande siclo nga saca hombre ne chii siclo nga saca gunaa.
6 Pa nápabe ti beeu hasta gaayuʼ iza, biaʼ saca ti hombrehuiiniʼ nga gaayuʼ siclo de plata ne biaʼ saca ti dxaapahuiiniʼ nga chonna siclo de plata.
7 »”Pa nápabe 60 iza o jma, biaʼ saca hombre nga 15 siclo ne biaʼ saca gunaa nga chii siclo.
8 Peru pa binni ni cayuni promesa ca guizáʼ pobre laa ne qué zanda quixe biaʼ saca ti binni, zié binni ca ra nuu sacerdote ne sacerdote ca guiní’ pabiáʼ sácabe. Sacerdote ca quixheʼ biaʼ zanda quixe binni ni cayuni promesa ca.
9 »”Pa promesa ca nga gudiicabe ti maniʼ de ni zanda gudiicabe Jehová, intiica cosa ni gudiicabe Jehová zácani xiixa santo.
10 Qué zanda guchaatu laacame; laaca qué zanda guchaatu tobi ni nazaaca pur tobi ni cadi nazaaca nin tobi ni cadi nazaaca pur tobi ni nazaaca. Peru pa guchaatu ti maniʼ né sti maniʼ, cásica primé maniʼ ca ne sti maniʼ ni bichaanetu laame ca zácacame xiixa santo.
11 Yanna, pa gácame ti maniʼ ni nabiidiʼ ni qué zanda gudiitu casi ofrenda para Jehová, óraca zinetu maniʼ ca nezalú sacerdote.
12 Ne sacerdote ca nga guiní’ pabiá’ sácame pa nazaacame o pa cadi nazaacame. Biaʼ guiníʼ sacerdote ca nga biaʼ sácame.
13 Peru pa málasi gacalaʼdxiʼ binni ni biʼniʼ promesa ca siʼ maniʼ ca sti biaje, naquiiñeʼ gudiibe gande por ciento jma de biaʼ sácame.
14 »”Yanna, pa cueechú* tuuxa lidxi para Jehová ne gudii ni laabe casi xiixa santo, óraca zaguixhe sacerdote ca sácani ra guʼyaʼ pa galán nuuni o pa cadi galán nuuni. Zasácani biaʼ guiníʼ sacerdote ca.
15 Peru pa binni guleechú yoo ca racalaʼdxiʼ siʼ ni sti biaje, naquiiñeʼ gudiibe gande por ciento jma de biaʼ sácani, para gaca stibe yoo ca sti biaje.
16 »”Pa cueechú tuuxa ti ndaa layú stiʼ para Jehová, zaree biaʼ sácani né biaʼ biidxiʼ riaba luni: cada homer* de biidxiʼ cebada zasaca 50 siclo de plata.
17 Pa cueechube layú ca lu Iza de Guendanayecheʼ, qué zadxaa biaʼ sácani.
18 Pa cueechube layú ca despué de Iza de Guendanayecheʼ, zabee sacerdote ca cuenta pabiáʼ sácani né ca iza ni riaadxaʼ para ganda sti Iza de Guendanayecheʼ ca, ne ziete biaʼ sácani.
19 Peru pa málasi binni ni guleechú layú ca gacalaʼdxiʼ siʼ ni sti biaje, óraca naquiiñeʼ gudiibe gande por ciento jma de biaʼ sácani, ne zaca stibe layú ca sti biaje.
20 Yanna, pa qué sibe layú ca sti biaje, ne guidooni lu sti hombre, maʼ qué zanda sibe ni sti biaje.
21 Ora guiaana layú ca libre lu Iza de Guendanayecheʼ, zácani xiixa santo para Jehová, ti layú ni chiguiquiiñeʼ para laabe. Zaca stiʼ ca sacerdote ni.
22 »”Pa guzíʼ tuuxa ti layú ne cueechú ni para Jehová ne cadi nácani ti layú ni gucuaa binni ca casi herencia,
23 zabee sacerdote ca cuenta pagala sácani né biaʼ ca iza ni cayaadxaʼ para ganda sti Iza de Guendanayecheʼ, ne dxicaca zabi laabe pabiáʼ sácani. Nácani xiixa santo para Jehová.
24 Lu Iza de Guendanayecheʼ ca, zabiguetaʼ layú ca lu náʼ binni ni bitoo ni lube, binni ni stiʼ layú ca.
25 »”Para gataʼ ca preciu ca naquiiñeʼ guiree cuenta según siclo ni riquiiñeʼ lugar santo. Ti siclo nga gande guerás.*
26 »”Peru guirutiʼ naquiiñeʼ cueechú ti maniʼ ni rale primé, purtiʼ maca stiʼ Jehová ca maniʼ ni rale primé. Gácame ti toro o ti dendxuʼ, maʼ stiʼ Jehová laame.
27 Pa nácame ti maniʼ ni nabiidiʼ ne rápabe gana sibe* laame sti biaje biaʼ gutaʼ sácame, naquiiñeʼ gudiibe gande por ciento jma. Peru pa qué sibe laame sti biaje, zadoome biaʼ gutaʼ sácame.
28 »”Peru qué zanda gutooto o situ sti biaje nin ti cosa de lade ca cosa stitu ni maʼ bidiitu Jehová, ni bidiitu maca para cadi guibiguétani lu natu, gácani ti binni, ti maniʼ o ti layú stitu. Guiráʼ cosa ni maʼ guleechutu para Jehová nácacani xiixa guizáʼ santo.
29 Ne laaca qué zanda gulatu tuuxa ni maʼ nexheʼ gatiʼ ne ni maʼ guleechutu para guinitilú. Napa xidé gátibe.
30 »”Guiráʼ chii por ciento* stiʼ layú, gácani ca cosa ni rudii lu layú o cuananaxhi stiʼ ca yaga ca, stiʼ Jehová cani. Nácacani xiixa santo para Jehová.
31 Pa tuuxa gacalaʼdxiʼ siʼ sti biaje chii por ciento de ni ma’ bidii, naquiiñeʼ quixe gande por ciento jma.
32 Peru ora gudiitu chii por ciento de yuze o dendxuʼ para Dios, naquiiñe’ ugabaʼ pastor riʼ ca maniʼ stiʼ ora tídicame xa’na’ vara sti’ ne naquiiñeʼ cueechube maniʼ númeru chii ca para Dios. Cada maniʼ númeru chii zácame xiixa santo para Jehová.
33 Cadi gúʼyatu pa nazaaca o pa cadi nazaaca maniʼ ca; laaca cadi naquiiñeʼ guchaatu laame. Peru pa chu’ ora gacaláʼdxitu guchaatu laame, cásica primé maniʼ ca ne sti maniʼ ni bichaanetu laame ca, zácacame xiixa santo. Qué zanda situ laacame sti biaje”».
34 Ndiʼ nga ca mandamientu ni bidii Jehová Moisés para ca israelita lu dani Sinaí.
Nota
^ Ti siclo nga 11.4 g. Biiyaʼ apén. B14.
^ O «guni santificar».
^ Ti homer nga 220 L. Biiyaʼ apén. B14.
^ Ti guerá nga 0.57 g. Biiyaʼ apén. B14.
