Levítico 3:1-17
3 »”Pa chigudii tuuxa ti yuze casi sacrificiu de paz, gácame ti vaca o ti toro, naquiiñeʼ chinebe ti maniʼ nazaaca nezalú Jehová.
2 Naquiiñeʼ quixhenabe ique maniʼ ni cudiibe casi ofrenda riʼ, ne napa xidé guuticabe laame ra entrada stiʼ yoo ra raca reunión. Ne ca xiiñiʼ Aarón, ca sacerdote, zurúbacaʼ rini stime guiráʼ ladu stiʼ altar ca.
3 Zinebe ti ndaa de sacrificiu de paz riʼ casi ti ofrenda ni raʼtaʼ lu bele para Jehová. Zinebe za ni nuu lu ca doo xqui’me ne guiráʼ za ni guiʼdiʼ lu ca doo xqui’me,
4 ne laaca zinebe guiropaʼ riñón stime ne za stícani, ni nuu gaxha de ca lomo stime. Ra gáxhabe ca riñón ca, laaca záxhabe za* stiʼ laʼdxiʼ stime.
5 Ne zaguixhe ca xiiñiʼ Aarón ni lu altar para gaca guʼxhuʼ, luguiáʼ ofrenda ni riaʼquiʼ ni nexheʼ lu ca yaga ni cacaguí. Laani nga ti ofrenda ni raʼtaʼ lu bele ni guizáʼ rindáʼ naxhi para Jehová.
6 »”Pa chigudii tuuxa ti dendxuʼ o ti chiva casi sacrificiu de paz para Jehová, naquiiñeʼ gácame ti maniʼ nazaaca, ne zanda gácame ti machu o ti hembra.
7 Pa chigudiibe ti dendxuʼ barracu nahuiiniʼ, zinebe laame nezalú Jehová.
8 Zaguixhenabe ique maniʼ ni cudiibe casi ofrenda ca, ne napa xidé guuticabe laame frente de yoo ra raca reunión. Ne ca xiiñiʼ Aarón zurúbacaʼ rini stime guiráʼ ladu stiʼ altar ca.
9 Zinebe za stiʼ sacrificiu de paz riʼ casi ti ofrenda ni raʼtaʼ lu bele para Jehová. Zugabe xcólame ni napa za dede ra ruzulú espinazu stime, za ni nuu lu ca doo xquiʼme ne guiráʼ za ni guiʼdiʼ lu ca doo xquiʼme,
10 ne laaca záxhabe guiropaʼ riñón stime ne za stícani, ni nuu gaxha de ca lomo stime. Ra gáxhabe ca riñón ca laaca záxhabe za stiʼ laʼdxiʼ stime.
11 Ne zaguixhe sacerdote ca ni lu altar para gaca guʼxhuʼ. Guendaró ni,* ti ofrenda ni raʼtaʼ lu bele para Jehová.
12 »”Pa chigudii tuuxa ti chiva, napa xidé chinebe laame nezalú Jehová.
13 Zaguixhenabe ique maniʼ ni cudiibe casi ofrenda riʼ, napa xidé guuticabe laame frente de yoo ra raca reunión. Ne ca xiiñiʼ Aarón zurúbacaʼ rini stime guiráʼ ladu stiʼ altar ca.
14 Parte ni gudiibe casi ofrenda ni raʼtaʼ lu bele para Jehová nga za ni nuu lu ca doo xqui’me ne guiráʼ za ni guiʼdiʼ lu ca doo xqui’me,
15 zaqueca guiropaʼ riñón stime ne za stícani, ni nuu gaxha de ca lomo stime. Ra gáxhabe ca riñón ca laaca záxhabe za stiʼ laʼdxiʼ stime.
16 Ne zaguixhe sacerdote ca ni lu altar para gaca guʼxhuʼ. Guendaró ni,* ti ofrenda ni raʼtaʼ lu bele ne guizáʼ rindáʼ naxhi. Guiráʼ za ca stiʼ Jehová cani.
17 »”Ndiʼ nga ti ley ni naquiiñeʼ chinanda guiráʼ ca xiiñitu ni guibani despué ra tiica si cuézacaʼ: qué chuʼ dxi goto za nin rini”».
Nota
^ O «apéndice».
^ Lit. «Pan ni». Raríʼ caniʼni ti ndaa de lu sacrificiu de paz ni chiguicaa Dios.
^ Lit. «Pan ni». Raríʼ caniʼni ti ndaa de lu sacrificiu de paz ni chiguicaa Dios.
