Levítico 6:1-30
6 Ne gudxi Jehová Moisés:
2 «Pa guni pecar tuuxa ne gucheené Jehová ra gusiguii prójimo stiʼ purtiʼ bisigápabe laa xiixa o bitiiñebe laa xiixa o guláʼnabe stiʼ prójimo stibe o gulee gunítibe laa
3 o pa guidxélabe xiixa cosa ni biniti peru guiniʼbe cadi laabe bidxélabe ni, ne guni jurarbe pur ti cosa ni cadi dxandíʼ de intiica tipu pecadu de ca ni maʼ biete ca, ndiʼ nga ni naquiiñeʼ gaca:
4 pa maʼ biʼniʼ pecarbe ne nápabe donda, napa xidé gudxiguétabe ni guláʼnabe, ni gúxhabe stobi, ni gucuaabe ra bisiguiibe tuuxa, xiixa ni bisigápacabe laabe ne biaananebe, xiixa ni biniti ne laabe bidxélabe
5 o intiica cosa ni biʼniʼ jurarbe ne cadi dxandíʼ ni, naquiiñeʼ quíxebe biáʼ sácani ne gudiibe xcande por ciento de biáʼ sácani. Ne zudiibe ni dueñu ca dxi guihuinni nápabe donda.
6 Ne zudiibe Jehová ti ofrenda pur donda stibe, zinebe ti dendxuʼ barracu nazaaca de lade ca dendxuʼ stibe ra nuu sacerdote biaʼ guinábacabe laabe para gudii sacerdote ca laame casi ofrenda pur donda.
7 Zuni sacerdote riʼ ofrenda para guixiá pecadu stibe nezalú Jehová, ne zaca perdonarbe de intiica donda ni biaba luguiabe».
8 Ne guníʼneruʼ Jehová Moisés. Gúdxibe laa:
9 «Bidii mandatu riʼ Aarón ne ca xiiñiʼ, ne guníʼ: “Ndiʼ nga ley stiʼ ofrenda ni riaʼquiʼ. Ziaana ofrenda ni riaʼquiʼ ca lu bele stiʼ altar ca guidubi gueelaʼ dede ora guirá gueelaʼ, ne cadi naquiiñeʼ guizuíʼ bele ni nuu lu altar ca.
10 Ne zacu sacerdote riʼ lari de lino, lari especial stiʼ, ne zácube calzoncíu de lino para guchiibe ra nácabe hombre. De racá zutópabe dé* stiʼ ofrenda ni riaʼquiʼ ni bizaaquiʼ bele lu altar ne zaguíxhebe ni cueʼ altar ca.
11 Óraque zabee sacerdote que lari ni nacu ne zácube stobi, ne zinebe dé que ti lugar puro ni nuu fuera de campamentu.
12 Cadi naquiiñeʼ gusuíʼcabe bele ni nuu lu altar que. Guiráʼ siadóʼ naquiiñeʼ guzaaquiʼ sacerdote yaga luni ne quíxhebe ofrenda ni riaʼquiʼ luguiani, ne zaguíxhebe za stiʼ ca sacrificiu de paz luni para gaca guʼxhuʼ.
13 Cadi naquiiñeʼ gudiicabe lugar guizuíʼ bele ni nuu lu altar.
14 »”Yanna, ndiʼ nga ley stiʼ ofrenda de biidxiʼ. Laatu, ca xiiñiʼ Aarón, napa xidé chinetu ni nezalú Jehová, frente de altar.
15 Tobi de laacabe, zacaa ti puñu harina de ni jma galán stiʼ ofrenda de biidxiʼ ne caadxi aceite stini ne guiráʼ olíbano ni nexheʼ lu ofrenda de biidxiʼ, zaguíxhebe ni lu altar para gaca guʼxhuʼ, laani nga zeeda gácani guidubi ofrenda ca* casi ti ofrenda ni guizáʼ rindáʼ naxhi para Jehová.
16 Zó Aarón ne ca xiiñiʼ ni guiaana lu ofrenda ca. Zúnicabe ni pan ni qué gapa levadura. Zócabe ni ti lugar ni naca santo. Zócabe ni lu patiu stiʼ yoo ra raca reunión.
17 Cadi naquiiñeʼ cúʼcabe ni ndaaniʼ horno né xiixa ni napa levadura. Maʼ bidieeʼ ni laacabe casi ni raca caber guicaacabe de ca ofrenda stinneʼ ni raʼtaʼ lu bele. Nácani xiixa guizáʼ santo, casi ofrenda pur pecadu ne ofrenda pur donda.
18 Zó guiráʼ ca hombre de ca xiiñiʼ Aarón ni. De ca ofrenda ni raʼtaʼ lu bele para Jehová, laani nga parte ni qué zusaana de guicaa ca xiiñicabe ni guibani despué. Intiica cosa guidiiñeni* zaca santo”».
19 Biguetaʼ guniʼné Jehová Moisés ne gúdxibe laa:
20 «Ndiʼ nga ofrenda ni zudii Aarón ne ca xiiñiʼ para Jehová dxi guilate aceite ique Aarón: cada biaje chuʼ tobi xlugárcabe zudiicabe chii por ciento stiʼ ti efá* de harina de ni jma galán casi ofrenda de biidxiʼ, zudiicabe galaani siadóʼ ne xcalaani huadxí.
21 Zúniluʼ ni né aceite lu ti dxiá. Zuguuchaʼ chaahuiluʼ ni né aceite, zandaaluʼ ni pur pedazu ne zineluʼ ni guguiʼ ndaaniʼ horno stiʼ ofrenda de biidxiʼ ca casi ti ofrenda ni guizáʼ rindáʼ naxhi para Jehová.
22 Sacerdote ni bibí de lade ca xiiñibe gúnini. Laani nga ti regla* ni qué zusaana de chinándatu: zaʼtaʼ guidubi ofrenda ca lu altar para Jehová para gúnini guʼxhuʼ.
23 Guiráʼ ofrenda de biidxiʼ ni gaca pur ti sacerdote, naquiiñeʼ gudiicabe guidúbini. Cadi naquiiñeʼ gócabe ni».
24 Biguetaʼ guniʼné Jehová Moisés ne gúdxibe laa:
25 «Gudxi Aarón ne ca xiiñiʼ: “Ndiʼ nga ley stiʼ ofrenda pur pecadu. Zuutitu maniʼ stiʼ ofrenda pur pecadu nezalú Jehová laca lugar ra rati maniʼ stiʼ ofrenda ni riaʼquiʼ. Guizáʼ santo ni.
26 Sacerdote ni gudii ofrenda pur pecadu ca nga gó ni. Zobe ni ti lugar santo, lu patiu stiʼ yoo ra raca reunión.
27 »”Guiráʼ ni canaʼ beela stime zaca santo, ne pa guiacha caadxi rini stime lu xhaba tuuxa, napa xidé quíʼbiluʼ lari ni biacha rini lú ndaaniʼ ti lugar santo.
28 Pa bindaabiʼ beela ca ndaaniʼ ti traste de yú, naquiiñeʼ guilaani. Peru pa bindaabini ndaaniʼ ti traste de cobre, naquiiñeʼ guiaʼriʼ chaahuini né nisa.
29 »”Guiráʼ ca hombre ni naca sacerdote, zocaʼ ni. Guizáʼ santo ni.
30 Peru cadi naquiiñeʼ gócabe nin ti ofrenda pur pecadu pa zinécabe caadxi de rini stini ndaaniʼ yoo ra raca reunión para guixiá pecadu stícabe ndaaniʼ lugar santo. Naquiiñeʼ guzaaquicabe ni lu bele.
Nota
^ O «dé ni napa zá», ndiʼ riníʼ dé ni nadxeʼ de zá stiʼ ca sacrificiu.
^ O «para guietenalaʼdxiʼ Dios interu ofrenda ca ne guicaabe ni».
^ O «guidiiñe ca ofrenda ca».
^ Chii por ciento stiʼ ti efá nga 2.2 L. Biiyaʼ apén. B14.
^ O «norma».
