Levítico 9:1-24
-
Bidii Aarón ofrenda (1-24)
9 Ra bizaa xhono gubidxa, guniʼné Moisés Aarón, ca xiiñiʼ Aarón ne ca hombre huaniisi* de guidxi Israel.
2 Ne gúdxibe Aarón: «Para gudiiluʼ ofrenda pur pecadu stiluʼ, gucuaa ti yuzehuiiniʼ nazaaca ne ti dendxuʼ barracu nazaaca para gudiiluʼ ofrenda ni riaʼquiʼ, ne yené laacame nezalú Jehová.
3 Peru ca israelita la? gudxi laacaʼ: “Latané ti chivu para ofrenda pur pecadu, ne para ofrenda ni riaʼquiʼ latané ti yuzehuiiniʼ ne ti dendxuʼ barracu nahuiiniʼ —gaca guirópacame nazaaca ne de ti iza—
4 ne ti toro ne ti dendxuʼ barracu casi sacrificiu de paz, ne zudiitu guirácame casi sacrificiu nezalú Jehová, laaca zudiitu ti ofrenda de biidxiʼ* nuchaʼ aceite, purtiʼ yannadxí zahuinni Jehová nezalutu”».
5 Ngue runi yenécabe guiráʼ ni biʼniʼ mandar Moisés laacabe frente de yoo ra raca reunión. De raqué bidxiña interu guidxi que ne bizuhuaacaʼ nezalú Jehová.
6 Ne guníʼ Moisés: «Ndiʼ nga ni maʼ biʼniʼ mandar Jehová gúnitu para guihuinni gloria stiʼ Jehová nezalutu».
7 Óraque gudxi Moisés Aarón: «Bidxiña ra nuu altar ca ne bidii ofrenda pur pecadu stiluʼ ne ofrenda ni riaʼquiʼ stiluʼ, ne bixhiá pecadu stiluʼ ne stiʼ familia* stiluʼ; laaca bidii ofrenda stiʼ guidxi ca ne bixhiá pecadu stícabe, casi peʼ modo biʼniʼ mandar Jehová».
8 Oraqueca bidxiña Aarón ra nuu altar que ne biitibe yuzehuiiniʼ stiʼ ofrenda pur ca pecadu stibe.
9 Óraque yené ca xiiñiʼ Aarón rini que ra nuube, ne bigádxebe bicuini nabe né rini que, ne guxúbibe ni lu ca cachu stiʼ altar que. De raqué bixhiibe rini ni biaana que ñee altar.
10 Despué gucuaabe lu ofrenda pur pecadu za stime, ca riñón stime, za stiʼ laʼdxiʼ stime ne gudíxhebe cani lu altar para gaca guʼxhuʼ, casi peʼ modo biʼniʼ mandar Jehová Moisés.
11 Ne bizaaquibe beela stime ne guidi ládime lu bele fuera de campamentu que.
12 De raqué biiti Aarón maniʼ stiʼ ofrenda ni riaʼquiʼ. Ne bidii ca xiiñibe laabe rini stiʼ maniʼ que ne birúbabe rini stime guiráʼ ladu altar que.
13 Ne bidiicaʼ laabe ca trozo stiʼ maniʼ stiʼ ofrenda ni riaʼquiʼ ne íqueme, ne gudíxhebe cani lu altar para gaca guʼxhuʼ.
14 Ne cadi ngasi, laaca gudiibibe ca doo xqui’me ne ca caniá stime, ne gudíxhebe cani luguiáʼ ofrenda ni riaʼquiʼ ni nexheʼ lu altar para gaca guʼxhuʼ.
15 De raqué bidiibe ofrenda stiʼ guidxi que: gucuaabe chivu stiʼ ofrenda pur ca pecadu stiʼ guidxi que, biitibe laame ne bidiibe laame casi ofrenda pur pecadu cásica bíʼnibe né primé maniʼ que.
16 Laaca bidiibe ofrenda ni riaʼquiʼ, ne bíʼnibe ni modo nexheʼ gácani.
17 Despué bidiibe ofrenda de biidxiʼ: gucuaabe ti puñu de ofrenda riʼ ne gudíxhebe ni lu altar cueʼ ofrenda ni riaʼquiʼ ni raca siadóʼ para gaca guʼxhuʼ.
18 De raqué biiti Aarón toro ne dendxuʼ barracu stiʼ sacrificiu de paz pur guidxi que. Óraque bidii ca xiiñibe laabe rini stícame ne birúbabe rini que guiráʼ ladu stiʼ altar.
19 Peru ca trozo za stiʼ toro que, cola ni napa za stiʼ dendxuʼ barracu que, ne za ni nuu lu ca doo xquíʼcame, ca riñón stícame ne za ni nuu lu laʼdxiʼ stícame,
20 gudíxhecabe guiráʼ ca trozo za riʼ lu xpechu ca maniʼ que ne despué gudixhe Aarón ca trozo za que lu altar para gaca guʼxhuʼ.
21 Peru pechu ne pata derechu stiʼ ca maniʼ riʼ, biniibi Aarón cani cheríʼ chericaʼ casi ofrenda ni riniibi nezalú Jehová, casi peʼ modo biʼniʼ mandar Moisés laabe.
22 Despué de biʼniʼ Aarón ofrenda pur pecadu, ofrenda ni riaʼquiʼ ne ca sacrificiu de paz, gundísanabe neza ra nuu guidxi que, guluube ndaayaʼ laacaʼ ne óraque biétebe.
23 Últimu la? guyuu Moisés ne Aarón ndaaniʼ yoo ra raca reunión que; de raqué bireecabe ne guluucabe ndaayaʼ guidxi que.
Óraque bihuinni gloria stiʼ Jehová nezalú guidubi guidxi que,
24 ne biree ti bele de ra nuu Jehová ne bizulú bizaaquini ofrenda ni riaʼquiʼ ne ca trozo za ni nexheʼ lu altar que. Ora biʼyaʼ guidubi guidxi que ni, biguaʼcaʼ ridxi purtiʼ cadxagayaacaʼ ne bizuxíbicaʼ dede gundeteʼ íquecaʼ layú.
