Apocalipsis 21:1-27
21 Óraque biiyaʼ ti guibáʼ cubi ne ti guidxilayú cubi; purtiʼ maʼ gudiʼdiʼ guibáʼ ne guidxilayú ni guyuu dxiqué, ne maʼ gastiʼ nisadóʼ.
2 Ne laaca biiyaʼ guidxi stiʼ Dios,* Jerusalén Nacubi, ni zedayete de guibáʼ, de ra nuu Dios. Ne nuu listu casi ti novia ni maʼ zuchaahuiʼ para xheelaʼ.
3 Despué binadiaʼgaʼ ti voz nadipaʼ de ra nuu trono que ne ná: «¡Biiyaʼ! Nuu carpa* stiʼ Dios ra nuu binni. Zabézabe ládecaʼ ne zácacaʼ xquídxibe. Ne Dios peʼ ziuu ra nuucaʼ.
4 Ne zuchaabe nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ. Maʼ gudiʼdiʼ guiráʼ ni guyuu dxiqué».
5 Óraque ná ni zuba lu trono que: «¡Biiyaʼ! Cayuneʼ guiráʼ cosa nacubi». Ne laaca guniʼbe: «Bicaa ca diidxaʼ riʼ purtiʼ zanda gápanu confianza ni* ne dxandíʼ ni».
6 Ne gúdxibe naa: «¡Maʼ guca guiráʼ ni! Naa nga Alfa ne Omega,* ra bizulú ne ra biluxe. Guiráʼ ni gati nisa, zudieeʼ laa gueʼ nisa gratis stiʼ manantial, nisa de guendanabani.
7 Guiráʼ tu guni ganar zacaa ca cosa riʼ; zacaʼ Dios stiʼ ne laa zaca xiiñeʼ.
8 Peru guiráʼ ni ridxibi, ni qué gapa fe, ni nuu nabiidiʼ ne ni runi guendaquéiquiiñeʼ, ni ruuti, ni runi practicar pecadu sexual,* ni runi practicar espiritismo,* ni runi adorar bidóʼ* ne guiráʼ ni rusiguii, zulaacabe laacaʼ ndaaniʼ lago de bele ne azufre, ni runi representar guiropa guendaguti».*
9 Tobi de gadxe ángel ni naaze gadxe tazón ra nuu ca últimu gadxe plaga que beeda ra nuaaʼ ne gudxi naa: «Gudáʼ, purtiʼ chigulueeʼ lii novia, xheelaʼ Dendxuhuiiniʼ».*
10 Para yenebe naa, pur mediu de espíritu, lu ti dani naroʼbaʼ ne nasoo, ne biluiʼbe naa xquidxi Dios,* Jerusalén, ni zedayete de guibáʼ, de ra nuu Dios,
11 ne cuzaanini pur gloria stiʼ Dios. Cuzaanini casi ti guié guizáʼ sicarú, casi ruzaaniʼ jaspe.
12 Nápani ti muru naroʼbaʼ ne nasoo ne nápani 12 puertaʼ, ne zuhuaa 12 ángel lu ca puertaʼ que, ne cá lá* 12 tribu stiʼ xiiñiʼ Israel lu ca puertaʼ que.
13 Nuu chonna puertaʼ ladu este, nuu chonna puertaʼ ladu guiaʼ, nuu chonna puertaʼ ladu gueteʼ ne nuu chonna puertaʼ ladu oeste.
14 Zuba muru stiʼ guidxi que lu 12 guié, ne cá 12 nombre stiʼ 12 apóstol stiʼ Dendxuhuiiniʼ que lu ca guié que.
15 Naaze ángel ni caniʼné naa que ti instrumentu, ti vara de oro, para uguubiáʼ guidxi que, ca puertaʼ ne muru stini.
16 cuadradu guidxi que; biaʼ ziuulaʼ ni biáʼqueca xilaga ni. Guluubiaʼbe guidxi que. Napa ni biaʼ 2,220 kilómetru* de ziuulaʼ ne de xilaga, ne biáʼqueca de nasoo ni.
17 Laaca guluubiaʼbe muru stini, nápani 64 metru,* según medida stiʼ binni ne stiʼ ángel.
18 De jaspe muru que ne de oro puru guidxi que, ruzaanini casi vidriu.
19 Zuchaahuiʼ ca base stiʼ muru stiʼ guidxi que né guiráʼ clase guié sicarú: primé guié que jaspe, guiropa que zafiro, guionna que calcedonia, guidapa que esmeralda,
20 gaayuʼ que sardónica, xhoopaʼ que sardio, gadxe que crisólito, xhono que berilo, gaʼ que topacio, chii que crisoprasa, once que jacinto ne doce que amatista.
21 Ne 12 perla nga 12 puertaʼ que, ne bizáʼcabe cada tobi de ca puertaʼ que de ti perla si. De oro puru calle principal stiʼ guidxi que, transparente casi vidriu.
22 Qué ñuuyaʼ nin ti templu ndaaniʼ guidxi que, purtiʼ Jehová* Dios, ni jma napa poder,* nga templu stini, laa ne Dendxuhuiiniʼ que.
23 Cadi caquiiñeʼ diʼ guzaaniʼ gubidxa ne beeu ndaaniʼ guidxi que, purtiʼ gloria stiʼ Dios nga ruzaaniʼ ndaaniʼ ni ne Dendxuhuiiniʼ que nga lámpara stini.
24 Ne zazá ca nación pur biaaniʼ stini, ne zusisaca ca rey nuu lu guidxilayú ni.
25 Qué zieeguʼ ca puertaʼ stini guidubi dxi, purtiʼ qué zaxhinni racá.
26 Ne zinécabe gloria ne guendarisaca* stiʼ ca nación ra nuu ni.
27 Peru qué ziuu dxi chuʼ xiixa cosa nabiidiʼ raqué, nin binni runi guendaquéiquiiñeʼ, nin ni rusiguii, sínuque ziuu ca ni cá si lá* lu rollo de guendanabani* stiʼ Dendxuhuiiniʼ que.
Nota
^ O «ciudad santa».
^ O «tienda de campaña».
^ O «fiel ni».
^ O «A ne Z». Alfa ne Omega nga primé ne últimu letra stiʼ alfabetu griegu.
^ O «ca idólatra».
^ O «muerte segunda».
^ O «Corderu».
^ O «ciudad santa».
^ O «xlá».
^ Lit. «12,000 estadio». Biaʼsi 185 metru nga ti estadio.
^ O «Todopoderoso».
^ O «honor».
^ O «xlá».
^ O «rollo de la vida».
