Apocalipsis 4:1-11
4 Gudiʼdiʼ si guiráʼ nga biiyaʼ zuxeleʼ ti puertaʼ guibáʼ, ne primé voz binadiaʼgaʼ caniʼné naa que la? ruluíʼ ni sonidu stiʼ ti trompeta, ne ná rabi naa: «Gudxiʼbaʼ raríʼ, purtiʼ chigulueeʼ lii ca cosa ni chiguizaaca».
2 Ne gudiʼdiʼ si nga nagueendaca guyuaaʼ lu poder stiʼ espíritu.* Málasi biiyaʼ ti trono guibáʼ ne zuba tuuxa lu trono que.
3 Ne ruzaaniʼ ni zuba lu trono que casi ruzaaniʼ ti jaspe ne casi ti sardio,* ne guidubi vuelta de trono que nuu ti arcoíris ni ruzaaniʼ casi ti esmeralda.
4 Ne guidubi vuelta de trono que nuu 24 trono ne biiyaʼ zuba 24 ancianu lu ca trono que. Nácucabe lari blancu ne nuu ti corona de oro íquecabe.
5 De ra nuu trono que caree biaaniʼ, voz ne rayu; cá guí gadxe lámpara de bele delante de trono que, ni runi representar gadxe espíritu stiʼ Dios.
6 Delante de trono que nuu casi ti nisadóʼ de vidriu, ni ruluíʼ casi cristal.
Ne galahuiʼ de ra nuu trono que ne guidubi vuelta de trono que nuu tapa querubín* napa stale guié lú nezalú ne nezadeche.
7 Primé querubín que ruluíʼ ti lión, guiropa querubín que ruluíʼ ti torohuiiniʼ, guionna querubín que casi lú ti hombre lú ne guidapa que ruluíʼ ti bisiá* canapapa.
8 Ne cada tobi de guidapaʼ querubín que napa xhoopaʼ xhiaa, ne cá stale guié lú deche ca xhiaa que ne xaʼnaʼ ca xhiaa que. Qué riaanadxicaʼ, ridxíʼ ne huaxhinni riniʼcaʼ: «Santo, santo, santo nga Jehová* Dios, ni jma napa poder,* ni nuu yanna, ni maca nuu dede dxiqué ne ni gueeda».
9 Cada biaje gudii ca ángel que gloria, honra ne gudiicaʼ xquixe peʼ ni zuba lu trono que, ni nabani para siempre,
10 ruzuxibi 24 ancianu que nezalú ni zuba lu trono ne runi adorarcaʼ ni nabani para siempre. Riguíxhecaʼ corona sticaʼ delante de trono que, ne riniʼcaʼ:
11 «Jehová* Dios stidu, lii nga runi merecerluʼ guicaaluʼ gloria, honra ne poder, purtiʼ lii bizaʼluʼ guiráʼ xixé ni nuu. Guyáʼ ni ne nuuni purtiʼ nga nga ni racaláʼdxiluʼ».*
Nota
^ O «guyuaaʼ lu influencia stiʼ espíritu stiʼ Dios».
^ O «ti guié sicarú color naxiñáʼ».
^ O «ser viviente».
^ O «águila».
^ O «Todopoderoso».
^ O «purtiʼ nga nga voluntad stiluʼ».
