Efesios 2:1-22
2 Ne laaca bidii Dios laatu guendanabani, neca guyuutu casi gueʼtuʼ purtiʼ qué ñúnitu ni jneza ne bicheetu*
2 dxi bibánitu modo nabani binni guidxilayú, ne yenándatu ni ná gobernante stiʼ guidxilayú riʼ. Laa nga runi mandar espíritu ni rucaa binni guni cosa malu ne nuu espíritu ca guiráʼ ladu casi bi.
3 Zacá nga laani, guyuu ti tiempu guiranu bibáninu cásica laacabe ne bíninu ni ná ca deseu stiʼ cuerpu stinu, bíninu ni ná* cuerpu stinu ne ni ná xquendabiaaninu, ne dede dxi gúlenu nuu xiana luguianu, cásica nuuni luguiáʼ binni.
4 Peru nabé riá Dios* laanu, ne cumu nabé nadxii laanu la?
5 bisibani laanu juntu né Cristu, ne biʼniʼ ni dxi nuurunu casi gueʼtuʼ pur guiráʼ ni cadi jneza ni bíninu (laatu maʼ bilatu pur guendanachaʼhuiʼ).*
6 Ne bidiibe laanu guendanabani* juntu né Cristu Jesús para cuínenu laa guibáʼ purtiʼ nuunenu laa tobi si.
7 Biʼniʼ Dios zacá ti gusihuinni lu guidxilayú cubi* ni gueeda ca pabiáʼ nachaʼhuiʼ né laanu* ora guni cosa galán pur laanu, ca ni nuunenu Cristu Jesús tobi si.
8 Bilatu purtiʼ guca Dios nachaʼhuiʼ né laatu* ne bíʼnibe ni purtiʼ nápatu fe. Peru cadi pur xiixa ni bíʼnitu, sínuque ti regalu stiʼ Dios ni.
9 Ne guirutiʼ zalá pur xiixa ni guni, ti cadi chuʼ tu uguu naróʼ stiʼ.
10 Dios bizáʼ laanu ne bíʼnibe laanu para chúʼnenu Cristu Jesús tobi si ti ganda gúninu dxiiñaʼ ni galán, ca ni maca gudixhe Dios gúninu.
11 Nga runi, laguietenalaʼdxiʼ, laatu ca ni cadi judíu, guyuu ti tiempu binibiáʼcabe laatu casi binni ni qué ñaca circuncidar,* ne ca ni binibiáʼ laatu zacá nga ca binni ni maʼ guca circuncidar.
12 Dxi caʼruʼ gunibiaʼtu Cristu, guyuutu zitu de guidxi Israel, ne qué ñunibiaʼtu ca pactu* stiʼ promesa. Qué ñápatu esperanza ne qué ñunibiaʼtu Dios dxi guzatu lu guidxilayú.
13 Peru yanna, laatu, ca ni maʼ nuu tobi si né Cristu Jesús, dxiqué guyuutu zitu, peru yanna maʼ nuutu gaxha pur rini stiʼ Cristu.
14 Purtiʼ laabe nga guluube paz,* bíʼnibe guiropaʼ grupu que tobi si ne bisábabe muru ni nuu galahuiʼ de laacaʼ, muru ni nuxheleʼ laacaʼ.
15 Pur mediu de cuerpu stibe guleebe ni cayuni laacaʼ enemigu* —Ley ra zeeda ca mandamientu que— para gúnibe guiropaʼ grupu ni nuuné laabe tobi si que ti binni* nacubi ne uguube paz ládecaʼ,
16 ne para gudxiguétabe guiropaʼ guidxi que ra nuu* Dios pur mediu de yaga* ra gútibe ne gúnibe laacaʼ ti cuerpu si, purtiʼ pur ni bíʼnibe guleebe ni cayuni laacaʼ enemigu.*
17 Beedabe ra nuutu, ca ni nuu zitu, ne gúdxibe laatu ca noticia galán para quixhedxibe ladxidoʼto,* ne para quixhedxibe ladxidóʼ ca ni nuu gaxha,
18 purtiʼ pur mediu de laabe zanda guidxíñanu —guiropaʼ guidxi riʼ— ra nuu Bixhózenu, purtiʼ ngueca espíritu gucuaanu.
19 Nga runi maʼ cadi nácatu binni de sti guidxi,* sínuque maʼ nuutu ndaaniʼ guidxi ra nuu ca xpinni Dios* ne maʼ nácatu de familia stiʼ Dios,
20 zeeda gácatu casi ti yoo ni cabí lu base ni gundaa* ca apóstol ne ca profeta, ne Cristu Jesús peʼ nga guié ni jma risaca* stiʼ base ca.
21 Yoo ni cabí riʼ la? tobi si nuu guiráʼ parte stini, ne cumu nuuni tobi si né Cristu la? ziroobaʼ ni para gaca ni ti templu ni maʼ bireechú* para Jehová.*
22 Cumu nuunetu Cristu tobi si la? maʼ guluu Dios laatu juntu para gácatu casi ti yoo ra cueza espíritu stiʼ.
Nota
^ O «biʼniʼ cometertu pecadu».
^ O «voluntad stiʼ».
^ O «napa Dios misericordia».
^ Lit. «Ne gundísabe laanu».
^ Lit. «laabe nga paz stinu».
^ Lit. «Pur mediu de beela ládibe biʼniʼ anularbe enemistad».
^ O «hombre».
^ O «guni reconciliarbe guiropaʼ guidxi que né».
^ Lit. «biitibe enemistad que».
^ O «uguube paz ra nuutu».
^ O «extranjeru».
^ Lit. «ca santo».
^ O «ni gudixhe».
^ O «ti templu santo».
