Efesios 3:1-21
3 Nga runi naa, Pablo, nuaaʼ ndaaniʼ cárcel pur Cristu Jesús ne pur gucaniaʼ laatu, ca binni de xcaadxi guidxi ni...*
2 Rabeʼ maʼ nánnatu gucuaaʼ dxiiñaʼ para gacaniaʼ laatu guiziiditu de guendanachaʼhuiʼ stiʼ Dios.*
3 Maca bizeeteʼ lutu gudxi Dios naa* ti secretu sagradu.*
4 Nga runi, ora gúʼndatu carta riʼ zudiitu cuenta rieneʼ secretu sagradu stiʼ Cristu.
5 Dxiqué la? qué nusiene chaahuiʼ Dios secretu riʼ binni, peru yanna maʼ biquiiñebe espíritu stibe para gusiénebe ni ca apóstol ni gulibe* ne ca profeta:
6 zacaa binni de xcaadxi nación herencia cásica chicaanu ra chuʼcaʼ tobi si né Cristu Jesús ne pur ni ná ca noticia galán, ne zácacabe ti grupu* si ne zacaacabe ni biʼniʼ prometer Dios gudii laanu.
7 Beeda gacaʼ esclavu stiʼ secretu sagradu que, purtiʼ guca Dios nachaʼhuiʼ né naa* ne laani nga ti regalu ni gucuaaʼ pur poder stiʼ.
8 Neca jma huaxiéʼ risacaʼ lade ca xpinni Dios,* peru guca Dios nachaʼhuiʼ né naa* para guneʼ predicar ca binni de xcaadxi nación ca noticia galán ni caníʼ de ca ndaayaʼ ni rudii Cristu, ne qué zanda guiníʼ íquenu pabiáʼ stale ndaayaʼ riʼ.
9 Xadxí bicaachiʼ Dios secretu sagradu* riʼ, peru yanna maʼ cayacaniaʼ binni guʼyaʼ ximodo cusiene* Dios ni, Dios ni bizáʼ guiráʼ cosa.
10 Ne guca ni zacá ti iquiiñebe congregación para guluiʼbe ca gobiernu ne ca autoridad ni nuu guibáʼ pabiáʼ nuu xpiaanibe.* Ne guendabiaaniʼ stibe la? rihuinni ni de gadxé gadxé modo.
11 Ne nuuni tobi si né propósito ni qué ziuu dxi guiluxe stiʼ Dios ne zaquiiñebe Cristu Jesús Señor stinu para guni cumplirbe ni modo racaláʼdxibe.
12 Pur laabe zanda guininu sin guidxíbinu ne zanda guidxíñanu ra nuu Dios né confianza, purtiʼ nápanu Cristu.
13 Nga runi canabaʼ laatu cadi guireetu gana neca cayuneʼ sufrir pur laatu, purtiʼ cayacanaʼyaʼ para guihuinni pabiáʼ risácatu.
14 Nga runi ruzuxibeʼ nezalú Bixhózenu,
15 pur laabe nga nuu cada familia guibáʼ ne lu guidxilayú.
16 Runeʼ orar Dios ni nabé risaca ne rinabaʼ laa iquiiñeʼ poder ni rudii espíritu stiʼ para gacané laatu gaca ladxidoʼto ne xquendabiaanitu nadipaʼ.
17 Ne pur fe stitu zanda cueza Cristu ndaaniʼ ladxidoʼto ne gannaxhiisaatu. Ne laaca runeʼ orar ti guzuhuaatu dxiichiʼ lu ti base, cásica ruzuhuaa dxiichiʼ ti yaga ni napa xcu dede gueteʼ.
18 Rinabaʼ Dios gusiene laatu ne gusiene ca xpinni* ni dxandíʼ. Zeeda gaca ni casi xiixa ni nalaga, ziuulaʼ, nasoo ne gueteʼ.
19 Rinabaʼ ganda guiénetu pabiáʼ nadxii Cristu laanu, purtiʼ jma risaca ni que ganna si binni stale cosa,* ti ganda gapa cada tobi de laatu ca cualidad stiʼ Dios.
20 Maʼ bidii Dios poder stiʼ laanu ne zanda iquiiñebe ni para gúnibe jma que biaʼ rinábanu o jma que biaʼ riníʼ íquenu.
21 Qué chuʼ dxi gusaana congregación de gusisaca Dios ne gusisaca guiráʼ binni* laabe pur Cristu Jesús. Amén.
Nota
^ O «nación».
^ O «maʼ gúnnatu gucuaaʼ responsabilidad de guneʼ administrar bondad inmerecida stiʼ Dios para beneficiu stitu». Biiyaʼ Glosario, bondad inmerecida.
^ O «biquiiñeʼ Dios ti revelación para gabi naa».
^ O «ca apóstol santo».
^ O «ti cuerpu».
^ Lit. «Neca naa nga ni jma nahuiiniʼ lade ca ni nahuiiniʼ de lade ca santo».
^ O «cayuni revelar».
^ O «pabiáʼ nápabe sabiduría».
^ Lit. «ca santo stiʼ».
^ O «gapa si binni conocimientu».
^ O «generación».
